Contact Us Latest News
నిజమైన వార్త. వేగమైన సమాచారం. ఆంధ్రప్రదేశ్ • తెలంగాణ • జాతీయం
Author Panel

Tag: B V APPALANAIDU

అల్లూరి సీతారామరాజు

పాడేరు: స్థానిక ఎన్నికల నిర్వహణపై కలెక్టర్ సమీక్ష

పాడేరు, అక్టోబర్ 16: స్థానిక సంస్థల ఎన్నికల నిర్వహణపై జిల్లా కలెక్టర్ టి. నిషాంతి శుక్రవారం రాజకీయ పార్టీల ప్రతినిధులతో సమావేశమయ్యారు. ఎన్నికల షెడ్యూల్, ప్రవర్తనా నియమావళి, నిర్వహణ ఏర్పాట్లపై వివరించారు. నియమావళిని తప్పనిసరిగా పాటించాలని సూచించారు. అనంతరం జాయింట్ కలెక్టర్ తిరుమణి శ్రీపూజ, ఐటీడీఏ పీవో ఆదిత్య వర్మ తదితర అధికారులతో ఎన్నికల సన్నద్ధతపై సమీక్షించారు.

అల్లూరి సీతారామరాజు

అరకు జడ్పీటీసీ అభ్యర్థిగా అవకాశం కల్పించండి: కొర్ర రాధిక విజ్ఞప్తి

అరకువేలి మండల జడ్పీటీసీ అభ్యర్థిగా అవకాశం కల్పించాలని వైసీపీ జిల్లా మహిళా విభాగం అధికార ప్రతినిధి కొర్ర రాధిక పార్టీ నాయకులను కోరారు. పెదలబుడు సర్పంచ్‌గా రెండుసార్లు పనిచేసిన తన తాత జన్ని పండు స్ఫూర్తితో ప్రజాసేవలోకి వచ్చానన్నారు. గతంలో కొత్తబల్లుగుడ సర్పంచ్‌గా, అరకువేలి మండల సర్పంచ్‌ల ఫోరం ఉపాధ్యక్షురాలిగా సేవలందించానని తెలిపారు. గత అసెంబ్లీ ఎన్నికల సమయంలో ఎమ్మెల్యే అభ్యర్థిగా ముందుకు వచ్చానని, పార్టీ అధినేత వైఎస్ జగన్ సూచనలతో స్థానిక ఎన్నికల్లో అవకాశం ఆశిస్తున్నానని పేర్కొన్నారు. ఎంపీ గుమ్మ తనూజారాణి, ఎమ్మెల్యే రేగం మత్స్యలింగం, మాజీ ఎమ్మెల్యే చెట్టి ఫాల్గుణతో పాటు పార్టీ నాయకులు ఆశీస్సులు అందించాలని విజ్ఞప్తి చేశారు.

అల్లూరి సీతారామరాజు

అల్లూరి జిల్లాలో 6 జడ్పీటీసీ, 5 ఎంపీపీ స్థానాలను ఎస్టీ మహిళలకే రిజర్వ్

పాడేరు, అక్టోబర్ 14: అల్లూరి సీతారామరాజు జిల్లాలో రెండో సాధారణ ఎన్నికలు–2026కు సంబంధించి స్థానిక సంస్థల రిజర్వేషన్లను జిల్లా కలెక్టర్, జిల్లా ఎన్నికల అధికారి టి. నిశాంతి బుధవారం ప్రకటించారు. జిల్లాలోని 11 మండలాల్లో జిల్లా పరిషత్ చైర్‌పర్సన్‌, జడ్పీటీసీ, ఎంపీపీ స్థానాలన్నీ షెడ్యూల్డ్ తెగల (ఎస్టీ)కు కేటాయించారు. ఏజెన్సీ ప్రాంతం కావడంతో ఎస్టీలకు ప్రాధాన్యం లభించగా, జడ్పీటీసీ స్థానాల్లో ఆరు మహిళలకు, ఐదు జనరల్‌కు, ఎంపీపీ స్థానాల్లో ఐదు మహిళలకు, ఆరు జనరల్‌కు రిజర్వ్ చేశారు. జిల్లాలో మొత్తం 172 ఎంపీటీసీ స్థానాలుండగా, 155 ఎస్టీలకు, 17 అన్‌రిజర్వుడ్‌ (యూఆర్‌) కేటగిరీకి కేటాయించారు. ఎంపీటీసీ స్థానాల్లో 84 మహిళలకు, 88 జనరల్‌ కేటగిరీకి దక్కాయి. ఎస్సీ, బీసీలకు ఒక్క స్థానం కూడా కేటాయించలేదు. ఆంధ్రప్రదేశ్ పంచాయతీరాజ్ చట్టం–1994లోని సెక్షన్ 268(1), హైకోర్టు అక్టోబర్ 1న ఇచ్చిన ఆదేశాలు, ప్రభుత్వం అక్టోబర్ 12న జారీ చేసిన జీవో ఎంఎస్ నం.154 ప్రకారం రిజర్వేషన్లను ఖరారు చేసినట్లు కలెక్టర్ తెలిపారు. ఈ రిజర్వేషన్లతో జిల్లాలో స్థానిక సంస్థల ఎన్నికలపై రాజకీయ వర్గాల్లో ఆసక్తి నెలకొంది.

అల్లూరి సీతారామరాజు

దల్లాపల్లిలో పర్యాటక కాటేజీల నిర్మాణానికి భూమిపూజ

పాడేరు: అల్లూరి సీతారామరాజు జిల్లా పాడేరు మండలం దల్లాపల్లి గ్రామంలో పర్యాటక కాటేజీల నిర్మాణానికి మంగళవారం భూమిపూజ నిర్వహించారు. ఏపీటీడీసీ, స్వయం సహాయక సంఘాలు, దల్లాపల్లి గ్రామ యువత సంయుక్త ఆధ్వర్యంలో చేపట్టనున్న ఈ నిర్మాణ పనులకు ప్రభుత్వం నిధులు మంజూరు చేసింది. ఈ కార్యక్రమానికి జిల్లా జాయింట్ కలెక్టర్ తిరుమణి శ్రీపూజ, జిల్లా పర్యాటక శాఖ అధికారి చలపతిరావు, ఇతర అధికారులు హాజరయ్యారు. స్థానికంగా పర్యాటక రంగాన్ని అభివృద్ధి చేయడం, గిరిజన యువతకు ఉపాధి అవకాశాలు కల్పించడం, స్వయం సహాయక సంఘాల ఆర్థికాభివృద్ధికి తోడ్పడటం ఈ ప్రాజెక్టు ప్రధాన లక్ష్యాలు. కాటేజీల నిర్మాణంతో దల్లాపల్లికి పర్యాటక గుర్తింపు పెరగడంతో పాటు స్థానికులకు జీవనోపాధి అవకాశాలు మెరుగుపడనున్నాయి.

అల్లూరి సీతారామరాజు

జాతీయ ఆర్చరీ పోటీలకు అల్లూరి క్రీడాకారులు

పాడేరు, అక్టోబర్ 13: భీమవరంలో నిర్వహించిన రాష్ట్రస్థాయి ఆర్చరీ ఛాంపియన్‌షిప్‌లో ఐటీడీఏ పాడేరు అల్లూరి ఆర్చరీ అకాడమీ క్రీడాకారులు ప్రతిభ చాటారు. ఇండియన్ రౌండ్ పురుషుల విభాగంలో సొలగం సాంబశివ స్వర్ణం, చిట్టపులి మోహిత్ సాయి కాంస్య పతకాలు సాధించి సీనియర్ జాతీయ పోటీలకు ఎంపికయ్యారు. ఐటీడీఏ పీవో ఆదిత్య వర్మ విజేతలతో పాటు కోచ్ సుధాకర్ నాయుడును సత్కరించి అభినందించారు. జాతీయ స్థాయిలోనూ రాణించి జిల్లాకు, రాష్ట్రానికి పేరు తీసుకురావాలని ఆకాంక్షించారు.

అల్లూరి సీతారామరాజు

మహిళల భద్రతకు వన్ స్టాప్ సెంటర్‌ అండ: నూతన భవనం ప్రారంభం

పాడేరు, అక్టోబర్ 07: మహిళల రక్షణ, భద్రతకు రాష్ట్ర ప్రభుత్వం ప్రాధాన్యత ఇస్తోందని అధికారులు తెలిపారు. గిరిజన ప్రాంత మహిళలకు మెరుగైన సేవలు అందించేందుకు అత్యాధునిక సదుపాయాలతో ఏర్పాటు చేసిన మిషన్ శక్తి–వన్ స్టాప్ సెంటర్ నూతన భవనాన్ని పాడేరులో ప్రారంభించారు. హింస, వేధింపులు, ఆపదలను ఎదుర్కొనే మహిళలకు ఒకే చోట పోలీస్, వైద్య, ఉచిత న్యాయ సహాయం, సైకో–సోషల్ కౌన్సెలింగ్, తాత్కాలిక ఆశ్రయం వంటి సేవలు అందిస్తామని వన్ స్టాప్ సెంటర్ సెంట్రల్ అడ్మిన్ కోళ్ల ఎర్నమ్మ తెలిపారు. మారుమూల ప్రాంత మహిళలకు సేవలు వేగంగా చేరేలా అవగాహన కార్యక్రమాలు నిర్వహించాలని ప్రజాప్రతినిధులు సూచించారు. కార్యక్రమంలో సీహెచ్. బాలమణీ దేవి, జి. ప్రసన్న, వంతల సీత, గిడ్డి విజయలక్ష్మి తదితరులు పాల్గొన్నారు.

అల్లూరి సీతారామరాజు

అక్టోబర్ 16న ఎస్‌ఐఆర్‌–2026 తుది ఓటర్ల జాబితా

పాడేరు, అక్టోబర్ 08: భారత ఎన్నికల సంఘం మార్గదర్శకాల మేరకు అల్లూరి సీతారామరాజు జిల్లాలో ఎస్‌ఐఆర్‌–2026 కింద ఓటర్ల జాబితా ప్రత్యేక పునఃపరిశీలన కొనసాగుతోందని కలెక్టర్ టి. నిశాంతి, ఐఏఎస్ తెలిపారు. జిల్లాలో సంబంధిత ఓటర్లకు 4,088 నోటీసులు జారీ చేయగా, 385 కేసులను ధృవీకరణకు తీసుకున్నారు. పరిశీలన అనంతరం 133 మందిని ASDD కింద అనర్హులుగా గుర్తించినట్లు తెలిపారు. అర్హులైన ఓటర్ల పేర్లు పొరపాటున తొలగిపోకుండా, అనర్హమైన ఎంట్రీలను తొలగించేందుకు చర్యలు చేపడుతున్నామన్నారు. అక్టోబర్ 08 నుంచి అవసరమైన ప్రాంతాల్లో BLOలు ఇంటింటికీ వెళ్లి ఓటర్ల వివరాలను పునఃపరిశీలించనున్నారు. అర్హత ఉన్నప్పటికీ పేరు లేకుంటే Form–6 ద్వారా నమోదు చేసుకోవచ్చన్నారు. ఎస్‌ఐఆర్‌–2026 తుది ఓటర్ల జాబితాను అక్టోబర్ 16న ప్రచురించనున్నట్లు కలెక్టర్ వెల్లడించారు.

అల్లూరి సీతారామరాజు

సీఈసీ రాజీనామా చేయాలని డిమాండ్‌.. అరకు పోలీస్ స్టేషన్ వద్ద కాంగ్రెస్ నిరసన

అరకు లోయ, అక్టోబర్ 08: చీప్ ఎలక్షన్ కమీషనర్ జ్ఞానేష్ కుమార్ రాజీనామా చేయాలని డిమాండ్ చేస్తూ కాంగ్రెస్ నాయకులు అరకు లోయ పోలీస్ స్టేషన్ వద్ద నిరసన తెలిపారు. ఓటు చోరీ ఆరోపణలపై ప్రశ్నిస్తున్న రాహుల్ గాంధీ, ఇండియా కూటమి ఎంపీలపై ఢిల్లీలో పోలీసుల చర్యలను నిరసిస్తూ ఈ కార్యక్రమం చేపట్టారు. ప్రజాస్వామ్యబద్ధంగా ర్యాలీ నిర్వహించేందుకు అనుమతి ఇవ్వాలని పోలీసులను కాంగ్రెస్ పార్టీ నాయకులు డిమాండ్ చేశారు. ప్రజల ఓటు హక్కు, ఎన్నికల ప్రక్రియలో పారదర్శకతను కాపాడాలని కోరారు. ఈ కార్యక్రమంలో ఏపీ కాంగ్రెస్ రాష్ట్ర ప్రధాన కార్యదర్శి పాచిపెంట శాంతకుమారి, జిల్లా కాంగ్రెస్ అధ్యక్షుడు శతక బుల్లిబాబు, అరకు నియోజకవర్గ ఇన్‌చార్జ్ శెట్టి గంగాధర్ స్వామి, నాయకులు, కార్యకర్తలు పాల్గొన్నారు.

అల్లూరి సీతారామరాజు

పెదబయలు A4 మద్యం దుకాణానికి లాటరీ ప్రక్రియ పూర్తి

పాడేరు, అక్టోబర్ 08: 2026–27 ఎక్సైజ్ పాలసీలో భాగంగా అల్లూరి సీతారామరాజు జిల్లాలో A4 మద్యం దుకాణాల నిర్వహణకు చర్యలు కొనసాగుతున్నాయని జిల్లా ప్రొహిబిషన్ అండ్ ఎక్సైజ్ అధికారి గౌరీశ్వరరావు తెలిపారు. జిల్లా గెజిట్ నోటిఫికేషన్ ద్వారా మూడు A4 దుకాణాలు నోటిఫై చేయగా, పెదబయలు మండలంలోని నాన్-రిన్యూడ్ దుకాణానికి నాలుగు దరఖాస్తులు వచ్చాయి. అర్హత పరిశీలన అనంతరం గురువారం జాయింట్ కలెక్టర్ సమక్షంలో లాటరీ ద్వారా ఎంపిక ప్రక్రియను పారదర్శకంగా పూర్తి చేశారు. మిగిలిన రెండు దుకాణాల్లో జి.కె.వీధి మండలం సీలేరు నాన్-రిన్యూడ్, జి.మాడుగుల నాన్-ఫంక్షనింగ్ దుకాణాలు ఉన్నాయి. వీటికి అక్టోబర్ 10న తాజా నోటిఫికేషన్ జారీ చేయనున్నట్లు అధికారులు తెలిపారు. అర్హులైన అభ్యర్థులు నోటిఫికేషన్‌లోని నిబంధనలు, అర్హతలు, గడువును పరిశీలించి దరఖాస్తు చేసుకోవాలని సూచించారు.

అల్లూరి సీతారామరాజు

స్థానిక ఎన్నికల సన్నద్ధతను పకడ్బందీగా చేపట్టాలి

పాడేరు, అక్టోబర్ 08: స్థానిక సంస్థల ఎన్నికల నిర్వహణకు జిల్లాల వారీగా సన్నద్ధతను పకడ్బందీగా చేపట్టాలని రాష్ట్ర ఎన్నికల కమిషనర్ అనిల్ చంద్ర పునేఠా అధికారులను ఆదేశించారు. గురువారం కలెక్టర్లు, పోలీసు అధికారులతో వీడియో కాన్ఫరెన్స్ నిర్వహించారు. వార్డుల పునర్విభజన, ఓటర్ల జాబితా ప్రక్రియను వేగవంతం చేయాలని, ఎన్నికల సిబ్బందికి సమగ్ర శిక్షణ ఇవ్వాలని సూచించారు. ఎన్నికల షెడ్యూల్‌పై సోషల్ మీడియాలో వచ్చే వదంతులను నమ్మకుండా, అధికారిక ప్రకటనలను మాత్రమే పరిగణనలోకి తీసుకోవాలని స్పష్టం చేశారు. శాంతిభద్రతలకు ప్రాధాన్యతనిస్తూ సమస్యాత్మక ప్రాంతాలను గుర్తించి ముందస్తు చర్యలు చేపట్టాలని ఆదేశించారు. కార్యక్రమంలో పాడేరు జేసీ తిరుమణి శ్రీపూజ, ASP శృతి, జిల్లా పంచాయితీ అధికారి చంద్రశేఖర్, DDO జయప్రకాశ్, మండల పరిషత్ అభివృద్ధి అధికారులు పాల్గొన్నారు.