Contact Us Latest News
నిజమైన వార్త. వేగమైన సమాచారం. ఆంధ్రప్రదేశ్ • తెలంగాణ • జాతీయం
Author Panel

Tag: B V APPALANAIDU

అల్లూరి సీతారామరాజు

పోలింగ్ సామాగ్రి పంపిణీపై సబ్ కలెక్టర్ సమీక్ష

పాడేరు, నవంబర్ 4: పోలింగ్ సామాగ్రి పంపిణీ ప్రక్రియను పాడేరు సబ్ కలెక్టర్ కె. సాహిత్ బుధవారం కలెక్టరేట్ కంట్రోల్ రూమ్ నుంచి సమీక్షించారు. నోడల్ అధికారి, డీఆర్డీఏ పీడీ జయకృష్ణ, జడ్పీ సీఈఓ, డీఎల్పీఓలతో కలిసి పీఓలు, ఏపీఓలు, ఓపీఓల హాజరు వివరాలను క్షుణ్ణంగా పరిశీలించారు. కేటాయించిన రూట్ల ప్రకారం పోలింగ్ కేంద్రాలకు బయలుదేరే వాహనాల పురోగతి, రవాణా ఏర్పాట్లపై అధికారులతో మాట్లాడి సూచనలు చేశారు. సిబ్బంది సమర్థంగా పనిచేసి పోలింగ్‌ను సజావుగా పూర్తి చేయాలని ఆదేశించారు. పోలింగ్ వివరాలను ప్రతి గంటకు ఒకసారి పీఓలు డిజిటల్ అసిస్టెంట్ ద్వారా పీఎంఎస్‌లో అప్‌లోడ్ చేయాలని సూచించారు. సమావేశంలో జడ్పీ సీఈఓ పి. వాసుదేవరావు, డీఎల్పీఓ పి.ఎస్. కుమార్, డీఎల్డీఓ ఎ. జయప్రకాష్ పాల్గొన్నారు.

అల్లూరి సీతారామరాజు

అల్లూరి జిల్లా నూతన డీఆర్ఓగా వెంకటేశ్వరరావు బాధ్యతల స్వీకరణ

అల్లూరి సీతారామరాజు జిల్లా నూతన రెవెన్యూ అధికారి (డీఆర్ఓ)గా ఎం. వెంకటేశ్వరరావు బుధవారం పాడేరులో బాధ్యతలు స్వీకరించారు. అనంతరం కలెక్టర్ టి. నిషాంతిని మర్యాదపూర్వకంగా కలిశారు. డీఆర్ఓ కార్యాలయ సిబ్బంది ల్యాండ్ సెక్షన్ సూపరింటెండెంట్ పోలరాజు, కోఆర్డినేషన్ సూపరింటెండెంట్ కుమారస్వామి, మెజిస్టీరియల్ సూపరింటెండెంట్ రామకృష్ణ, ఏఓ అప్పలస్వామి ఆయనను కలిసి శుభాకాంక్షలు తెలిపారు. వెంకటేశ్వరరావు గతంలో రాజోలు తహసీల్దార్‌గా, మార్కాపురం–వెలిగొండ ప్రాజెక్టు ఎస్డీసీగా పనిచేశారు.

అల్లూరి సీతారామరాజు

చిరుధాన్యాలపై అరకు డిగ్రీ కళాశాలలో అవగాహన

అరకు ప్రభుత్వ డిగ్రీ కళాశాల ఎన్‌ఎస్‌ఎస్ ఆధ్వర్యంలో బ్రిక్స్ సుస్థిర జీవన విధాన వారంలో భాగంగా “స్థిరమైన ఆహార వ్యవస్థలను అవలంబించడం” అంశంపై అవగాహన కార్యక్రమం జరిగింది. ప్రిన్సిపాల్ డాక్టర్ సిహెచ్ కేశవరావు మాట్లాడుతూ, పాశ్చాత్య ఆహార సంస్కృతికి దూరంగా ఉండి, ప్రాంతంలో పండే సంప్రదాయ చిరుధాన్యాలను ఆహారంలో భాగం చేసుకోవాలన్నారు. ఎన్‌ఎస్‌ఎస్ పీఓలు సుధీర్, విజయలక్ష్మి, లచ్చన్న మాట్లాడుతూ, రాగులు, సజ్జలు, జొన్నలతో రోగనిరోధక శక్తి పెరుగుతుందని, ఆహార వృథాను తగ్గించి కంపోస్టింగ్ చేపట్టాలని సూచించారు. వైస్ ప్రిన్సిపాల్ నిర్మల, అధ్యాపకులు, వాలంటీర్లు పాల్గొన్నారు.

అల్లూరి సీతారామరాజు

కిల్లోగూడ పీహెచ్సీలో పొగాకు నియంత్రణపై అవగాహన, ప్రతిజ్ఞ

డుంబ్రిగుడ మండలం కిల్లోగూడ పీహెచ్సీలో వైద్యాధికారి డా. కె. కుమార్ రత్న ఆధ్వర్యంలో ఆశా కార్యకర్తల సమావేశం, జాతీయ పొగాకు నియంత్రణ కార్యక్రమం నిర్వహించారు. అల్లూరి జిల్లా వైద్యారోగ్య అధికారి డా. రియాజ్ బేగ్, డీసీఎం మనోజ్ పాల్గొన్నారు. పొగాకు వినియోగం వల్ల కలిగే అనర్థాలను గ్రామాల్లో ప్రజలకు వివరించి, అవగాహన కల్పించాలని ఆశా కార్యకర్తలకు సూచించారు. అనంతరం పొగాకు నియంత్రణపై ప్రతిజ్ఞ చేయించారు. పీహెచ్ఎన్ జానకమ్మ, ఎఎన్ఎమ్ లు, క్షేత్ర స్ధాయి సిబ్బంది హాజరయ్యారు.

అల్లూరి సీతారామరాజు

అరకు డిగ్రీ కళాశాలలో నీటి సంరక్షణపై అవగాహన

బ్రిక్స్ సుస్థిర జీవన విధాన వారోత్సవాల్లో భాగంగా అరకు వ్యాలీ ప్రభుత్వ డిగ్రీ కళాశాల ఎన్ఎస్ఎస్ ఆధ్వర్యంలో నీటి సంరక్షణపై అవగాహన కార్యక్రమం నిర్వహించారు. ప్రిన్సిపాల్ డా. సీహెచ్ కేశవరావు మాట్లాడుతూ, నీటి సరఫరా వ్యవస్థలను తరచూ తనిఖీ చేసి లీకేజీలను అరికట్టాలని, వృథా నివారణలో విద్యార్థులు, సిబ్బంది భాగస్వాములు కావాలని సూచించారు. ఎన్ఎస్ఎస్ పీఓలు డా. జి. సుధీర్, వై. విజయలక్ష్మి, బి. లచ్చన్న మాట్లాడుతూ, నేడు నీటిని కాపాడితేనే భావితరాల భవిష్యత్తు సురక్షితంగా ఉంటుందన్నారు. అనంతరం అధ్యాపకులు, విద్యార్థులు ప్రతిజ్ఞ చేశారు.

అల్లూరి సీతారామరాజు

పోలింగ్, కౌంటింగ్ ఏర్పాట్లపై జడ్పీ సీఈఓ సమీక్ష

అల్లూరి సీతారామరాజు జిల్లాలో ఎన్నికలను పారదర్శకంగా, ప్రశాంతంగా నిర్వహించేందుకు ఏర్పాట్లు పూర్తిచేసినట్లు జడ్పీ సీఈఓ పి. వాసుదేవరావు తెలిపారు. వ్యయ పరిశీలకులు నీరజ్ హన్స్‌తో కలిసి మంగళవారం పీఓలు, ఏపీఓలతో టెలీకాన్ఫరెన్స్ నిర్వహించారు. పోలింగ్ సామగ్రిని కేంద్రాలకు సురక్షితంగా చేర్చాలని, ఏజెన్సీ కొండప్రాంతాల్లో ప్రత్యామ్నాయ రవాణా సిద్ధం చేయాలని ఆదేశించారు. కేంద్రాల్లో తాగునీరు, నీడ, విద్యుత్‌తో పాటు వృద్ధులు, దివ్యాంగులకు ర్యాంపులు, ట్రైసైకిళ్లు కల్పించాలన్నారు. పోలింగ్‌కు గంట ముందు మాక్ పోల్ నిర్వహించాలని, స్ట్రాంగ్ రూమ్‌ల వద్ద మూడంచెల భద్రత, సీసీ కెమెరాల నిఘా ఉండాలని సూచించారు. నిబంధనలు ఉల్లంఘిస్తే కఠిన చర్యలు తప్పవని హెచ్చరించారు.

అల్లూరి సీతారామరాజు

ఏఎస్ఆర్ జిల్లాలో ఎన్నికల సామగ్రి పంపిణీ, స్ట్రాంగ్ రూమ్, కౌంటింగ్ కేంద్రాల గుర్తింపు

అల్లూరి సీతారామరాజు జిల్లాలో జరగనున్న రెండో సాధారణ జెడ్పీటీసీ, ఎంపీటీసీ ఎన్నికలను పారదర్శకంగా, ప్రశాంతంగా నిర్వహించేందుకు 11 మండలాల్లో ఎన్నికల సామగ్రి పంపిణీ, రిసెప్షన్, స్ట్రాంగ్ రూమ్, ఓట్ల లెక్కింపు కేంద్రాలను కలెక్టర్ టి. నిషాంతి గుర్తిస్తూ ఉత్తర్వులు జారీ చేశారు. పంచాయతీరాజ్ (ఎన్నికల నిర్వహణ) నియమాలు–2006, రాష్ట్ర ఎన్నికల సంఘం మార్గదర్శకాల మేరకు ఈ కేంద్రాలను ఎంపిక చేశారు. అరకు వ్యాలీలో ప్రభుత్వ జూనియర్ కళాశాల, పాడేరులో ప్రభుత్వ డిగ్రీ కళాశాల, డుంబ్రిగూడలో గిరిజన సంక్షేమ ఆశ్రమ ఉన్నత పాఠశాల, కొయ్యూరులో కేజీబీవీ పాఠశాల, చింతపల్లిలో గిరిజన సంక్షేమ రెసిడెన్షియల్ జూనియర్ కళాశాలను కేంద్రాలుగా ఖరారు చేశారు. జోనల్, రూట్ అధికారులు తమ పరిధిలోని పోలింగ్ కేంద్రాల్లో కనీస సౌకర్యాలు కల్పించాలని, ఓటర్లు ఇబ్బందులు లేకుండా ఓటు వేసేలా ఏర్పాట్లు చేయాలని కలెక్టర్ ఆదేశించారు. పోలీసు బందోబస్తును పర్యవేక్షించడంతో పాటు, సిబ్బంది ఎన్నికల సామగ్రితో సురక్షితంగా కేంద్రాలకు చేరేలా చూడాలని, నిర్ణీత సమయానికి పోలింగ్ ప్రారంభమయ్యేలా పర్యవేక్షించాలని సూచించారు. ప్రవర్తనా నియమావళి అమలు, అక్రమ మద్యం రవాణా, పంపిణీ నియంత్రణపై ప్రత్యేక దృష్టి సారించాలన్నారు. పోలింగ్ అనంతరం బ్యాలెట్ బాక్సులు, ఇతర సామగ్రిని రిసెప్షన్ కేంద్రాలకు చేర్చి, స్ట్రాంగ్ రూముల్లో భద్రపరచాలని, ఎలాంటి అవాంఛనీయ సంఘటనలు జరగకుండా అప్రమత్తంగా ఉండాలని ఆదేశించారు.

అల్లూరి సీతారామరాజు

ఏఎస్ఆర్ జిల్లాలో ఎన్నికలకు పటిష్ట ఏర్పాట్లు: కలెక్టర్ నిషాంతి

అల్లూరి సీతారామరాజు జిల్లాలో ఈ నెల 5న జరగనున్న ఎంపీటీసీ, జెడ్పీటీసీ ఎన్నికలకు పటిష్ట ఏర్పాట్లు చేసినట్లు కలెక్టర్ టి. నిషాంతి తెలిపారు. పాడేరు కలెక్టరేట్‌లో మంగళవారం నిర్వహించిన మీడియా సమావేశంలో ఆమె మాట్లాడుతూ, 11 జెడ్పీటీసీ, 172 ఎంపీటీసీ స్థానాలకు 617 కేంద్రాల్లో పోలింగ్ జరుగుతుందని, 4,98,467 మంది ఓటర్లు ఓటు హక్కు వినియోగించుకోనున్నారని చెప్పారు. పోలింగ్ విధుల్లో 3,702 మంది ఉద్యోగులు ఉంటారని, 78 మంది జోనల్, 117 మంది రూట్ అధికారులను నియమించామన్నారు. 149 సున్నిత, 91 అతిసున్నిత కేంద్రాల్లో ప్రత్యేక భద్రతతో పాటు వెబ్‌కాస్టింగ్, వీడియోగ్రఫీ ఏర్పాటు చేశామని, 78 మంది మైక్రో అబ్జర్వర్లను నియమించామని వివరించారు. పోలింగ్ సామగ్రి బుధవారం పంపిణీ చేస్తామని, సాధారణ కేంద్రాల్లో ఉదయం 7 నుంచి సాయంత్రం 5 వరకు, 44 మారుమూల కేంద్రాల్లో మధ్యాహ్నం 3 వరకు పోలింగ్ ఉంటుందన్నారు. ఓట్ల లెక్కింపు 7న జరుగుతుంది. సమావేశంలో ఎన్నికల పరిశీలకులు కూర్మనాథ్, ధీరజ్ హన్స్, జడ్పీ సీఈఓ వాసుదేవరావు పాల్గొన్నారు.

అల్లూరి సీతారామరాజు

రాష్ట్ర స్థాయికి అరకు విద్యార్థిని.. యూత్ పార్లమెంట్‌లో నిత్య జీవని ప్రతిభ

మేరా యువ భారత్ ఆధ్వర్యంలో నిర్వహించిన వికసిత్ భారత్ – యంగ్ లీడర్స్ డైలాగ్ జిల్లా స్థాయి పోటీల్లో అరకులోయ ప్రభుత్వ మహిళా డిగ్రీ కళాశాల విద్యార్థినులు ప్రతిభ చాటారు. జిల్లాలోని వివిధ కళాశాలల నుంచి 70 మందికి పైగా పాల్గొన్న ఈ పోటీల్లో బీఎస్సీ జువాలజీ ద్వితీయ సంవత్సరం విద్యార్థిని చటారి నిత్య జీవని రెండో స్థానం సాధించి, విజయవాడలో జరిగే రాష్ట్ర స్థాయి యూత్ పార్లమెంట్‌కు ఎంపికైంది. తొలి పది స్థానాల్లో వి. విష్ణుప్రియ (4వ), చటారి ఆషిని (7వ), రేచెల్ (9వ) నిలిచారు. ప్రిన్సిపాల్ డా. ఆర్. కుసుమ కుమారి విద్యార్థినులను అభినందించారు. విజయానికి కృషి చేసిన ఎన్‌ఎస్‌ఎస్ కోఆర్డినేటర్ డా. సి.హెచ్. మురళీకృష్ణ, అధ్యాపకులను ప్రత్యేకంగా ప్రశంసించారు.

అల్లూరి సీతారామరాజు

స్ట్రాంగ్ రూములు, కౌంటింగ్ కేంద్రాల్లో పకడ్బందీ ఏర్పాట్లు: పరిశీలకులు

అల్లూరి సీతారామరాజు జిల్లాలో జరగనున్న రెండో సాధారణ ఎంపీటీసీ, జెడ్పీటీసీ ఎన్నికలను పారదర్శకంగా, ప్రశాంతంగా నిర్వహించేందుకు పకడ్బందీ ఏర్పాట్లు చేపట్టాలని ఎన్నికల పరిశీలకులు ఆర్. కూర్మనాథ్, వ్యయ పరిశీలకులు ధీరజ్ అధికారులకు సూచించారు. సోమవారం అనంతగిరి, పెదబయలు, ముంచంగిపుట్టు మండలాల్లోని స్ట్రాంగ్ రూములు, కౌంటింగ్ కేంద్రాలను క్షేత్రస్థాయిలో పరిశీలించారు. స్ట్రాంగ్ రూముల వద్ద పటిష్ట భద్రత ఉండాలని, ఎన్నికల సంఘం మార్గదర్శకాలను కచ్చితంగా పాటించాలన్నారు. కౌంటింగ్ కేంద్రాల్లో సిబ్బందికి అవసరమైన సదుపాయాలు కల్పించి, ముందస్తు ప్రణాళికతో సిద్ధంగా ఉండాలని చెప్పారు. రిటర్నింగ్ అధికారులు, ఎంపీడీవోలు సమన్వయంతో పనిచేయాలని, ఎలాంటి నిర్లక్ష్యానికి తావివ్వరాదని స్పష్టం చేశారు. అనంతరం ముంచంగిపుట్టు మండలం కిలగడ గ్రామంలోని పోలింగ్ కేంద్రాన్ని పరిశీలించి, ఓటర్లకు ఇబ్బందులు లేకుండా చర్యలు తీసుకోవాలని సూచించారు. లైజనింగ్ అధికారి చలపతిరావు, జిల్లా సర్వే అధికారి ఈశ్వర్ దొర తదితరులు పాల్గొన్నారు.