Contact Us Latest News
నిజమైన వార్త. వేగమైన సమాచారం. ఆంధ్రప్రదేశ్ • తెలంగాణ • జాతీయం
Author Panel

Tag: B V APPALANAIDU

అల్లూరి సీతారామరాజు

మూడు విడతల్లో గ్రామ పంచాయతీ ఎన్నికలు.. పటిష్ట ఏర్పాట్లు

పాడేరు: అల్లూరి సీతారామరాజు జిల్లాలో రెండో సాధారణ గ్రామ పంచాయతీ ఎన్నికలను మూడు విడతల్లో నిర్వహించేందుకు పటిష్ట ఏర్పాట్లు చేస్తున్నట్లు జిల్లా కలెక్టర్ టి. నిశాంతి తెలిపారు. గురువారం పాడేరు కలెక్టరేట్‌లో నిర్వహించిన మీడియా సమావేశంలో ఎన్నికల షెడ్యూల్, ఏర్పాట్ల వివరాలను వెల్లడించారు. జిల్లాలో మొత్తం 244 గ్రామ పంచాయతీలు ఉండగా, 239 షెడ్యూల్డ్, ఐదు నాన్ షెడ్యూల్డ్ పంచాయతీలు ఉన్నాయి. 244 సర్పంచ్, 2,446 వార్డు సభ్యుల స్థానాలకు ఎన్నికలు నిర్వహించనున్నారు. మొత్తం 4,98,467 మంది ఓటర్లు తమ ఓటు హక్కును వినియోగించుకోనున్నారు. మొదటి విడతలో కోయ్యూరు, జి.కె.వీధి, చింతపల్లి మండలాల్లో నవంబర్ 26న 66 పంచాయతీలకు, రెండో విడతలో అనంతగిరి, జి.మాడుగుల, పెదబయలు, ముంచంగిపుట్టు మండలాల్లో నవంబర్ 29న 87 పంచాయతీలకు, మూడో విడతలో అరకు, డుంబ్రిగూడ, హుకుంపేట, పాడేరు మండలాల్లో డిసెంబర్ 2న 91 పంచాయతీలకు పోలింగ్ జరగనుంది.

అల్లూరి సీతారామరాజు

అరకు:ఎంపీటీసీ దంపతులకు కాంగ్రెస్ నేతల ఘన సన్మానం

అరకు: గన్నెల ఎంపీటీసీగా ఎన్నికైన చిట్టం నాయక్ జానకి–బలబదర్ దంపతులను గురువారం కాంగ్రెస్ పార్టీ కార్యాలయంలో జిల్లా అధ్యక్షుడు శతక బుల్లిబాబు ఆధ్వర్యంలో ఘనంగా సన్మానించారు. ఈ సందర్భంగా ఆయన మాట్లాడుతూ ప్రజల నమ్మకాన్ని నిలబెట్టుకుంటూ తాగునీరు, రహదారులు, విద్య, వైద్యం వంటి మౌలిక సదుపాయాల కల్పనకు కృషి చేయాలని పిలుపునిచ్చారు. కార్యక్రమంలో శెట్టి గంగాధర్ స్వామి, పాచిపెంట శాంతకుమారి పాల్గొన్నారు.

అల్లూరి సీతారామరాజు

సరిహద్దు గ్రామాల గర్భిణులకు మెరుగైన వైద్య సేవలు

ఆంధ్రప్రదేశ్–ఒడిశా అంతర్రాష్ట్ర సరిహద్దు గ్రామాల గర్భిణులకు సకాలంలో అల్ట్రాసౌండ్ స్కానింగ్ సేవలు అందించేందుకు ప్రత్యేక సమన్వయ సమావేశం నిర్వహించారు. మల్కన్‌గిరి, కోరాపుట్ జిల్లాల వైద్య ఆరోగ్య శాఖ అధికారులతో సేవల అందుబాటు, ఇరు రాష్ట్రాల మధ్య సమన్వయం, PCPNDT చట్టం పటిష్ట అమలుపై చర్చించారు. గర్భిణులకు నాణ్యమైన వైద్య సేవలు అందించడంతో పాటు చట్ట నిబంధనలు కచ్చితంగా పాటించాలని అధికారులు సూచించారు.

అల్లూరి సీతారామరాజు

ఓటు హక్కు వినియోగంపై విద్యార్థులకు అవగాహన పోటీలు

అరకు ప్రభుత్వ డిగ్రీ కళాశాలలో పొలిటికల్ సైన్స్ విభాగం ఆధ్వర్యంలో ఓటు హక్కు ప్రాధాన్యతపై క్విజ్, వ్యాసరచన పోటీలు నిర్వహించారు. ప్రిన్సిపాల్ డాక్టర్ సీహెచ్ కేశవరావు అధ్యక్షతన జరిగిన కార్యక్రమంలో మండల రెవెన్యూ అధికారి మాట్లాడుతూ రాజ్యాంగం కల్పించిన ఓటు హక్కును యువత సద్వినియోగం చేసుకుని భవిష్యత్తులో సమర్థవంతమైన నాయకత్వాన్ని తీర్చిదిద్దాలని సూచించారు. 18 ఏళ్లు నిండిన ప్రతి విద్యార్థి ఓటు హక్కును వినియోగించుకోవాలని అధ్యాపకురాలు డాక్టర్ సంధ్యారాణి కోరారు. విజేతలకు ప్రథమ, ద్వితీయ, తృతీయ బహుమతులు అందించగా, ఎంపికైన వారిని మండల, జిల్లా స్థాయి పోటీలకు పంపించనున్నారు. ఈ కార్యక్రమంలో అధ్యాపకులు, ఎన్ఎస్ఎస్ అధికారులు, విద్యార్థులు పాల్గొన్నారు.

అల్లూరి సీతారామరాజు

కౌంటింగ్ కేంద్రాలను పరిశీలించిన జనరల్ అబ్జర్వర్

పాడేరు/అరకులోయ, నవంబర్ 6: జెడ్పీటీసీ, ఎంపీటీసీ ఓట్ల లెక్కింపు ప్రక్రియను పకడ్బందీగా, పారదర్శకంగా నిర్వహించేందుకు అవసరమైన ఏర్పాట్లను పరిశీలించి, వేగవంతం చేయాలని ఎన్నికల జనరల్ అబ్జర్వర్ ఆర్.కుర్మనాధ్ అధికారులను ఆదేశించారు. శుక్రవారం ఆయన పాడేరు, అరకు వ్యాలీ, అనంతగిరి, డుంబ్రిగూడ, హుకుంపేట మండలాల్లో ఏర్పాటు చేసిన ఓట్ల లెక్కింపు కేంద్రాలు, స్ట్రాంగ్ రూములను స్వయంగా పరిశీలించారు. కౌంటింగ్ హాళ్లలో టేబుళ్ల అమరిక, బ్యాలెట్ బాక్సుల భద్రత, సీసీటీవీ కెమెరాల నిఘా, లైటింగ్, మైక్ సిస్టమ్, విద్యుత్ సరఫరా, కౌంటింగ్ ఏజెంట్లకు కేటాయించిన సీటింగ్ ఏర్పాట్లను నిశితంగా తనిఖీ చేశారు. అనంతరం ఎన్నికల అధికారులతో సమావేశమై లెక్కింపు రౌండ్లు, సిబ్బంది నియామకం, ఫలితాల నమోదు విధానం, కేంద్రాల వద్ద భద్రతా ఏర్పాట్ల వివరాలను అడిగి తెలుసుకున్నారు. ఈ సందర్భంగా జనరల్ అబ్జర్వర్ మాట్లాడుతూ, ఎన్నికల నిబంధనలను కచ్చితంగా పాటిస్తూ, ఎలాంటి లోటుపాట్లు లేకుండా లెక్కింపును శాంతియుతంగా పూర్తి చేయాలని సూచించారు. కౌంటింగ్ కేంద్రాల వెలుపల తాగునీరు, ప్రథమ చికిత్స కేంద్రాలు వంటి మౌలిక సదుపాయాలు కల్పించాలని, పటిష్టమైన పోలీసు బందోబస్తు ఏర్పాటు చేయాలని ఆదేశించారు. ఈ పరిశీలనలో జిల్లా సర్వే అధికారి ఈశ్వర దొర, జిల్లా టూరిజం అధికారి చలపతి, స్థానిక రిటర్నింగ్ అధికారులు, తహసీల్దార్లు, ఎంపీడీవోలు, గుజ్జిలి కొండబాబు, పోలీసు అధికారులు, ఇతర ఎన్నికల సిబ్బంది పాల్గొన్నారు.

అల్లూరి సీతారామరాజు

రోడ్డు ప్రమాద బాధితుడికి అండగా డీఎంహెచ్‌వో డాక్టర్ రియాజ్

సుంకరమెట్ట పీహెచ్‌సీలో విధులు ముగించుకుని తిరిగి వస్తున్న అల్లూరి సీతారామరాజు జిల్లా వైద్య ఆరోగ్యశాఖ అధికారి డాక్టర్ రియాజ్, మార్గమధ్యంలో రోడ్డు ప్రమాదంలో స్పృహ కోల్పోయి పడి ఉన్న గుర్తుతెలియని వ్యక్తిని గమనించారు. బాధితుడి పేరు, ఊరు తెలియకపోయినా వెంటనే స్పందించి, స్థానిక పీహెచ్‌సీకి సమాచారం ఇచ్చి అంబులెన్స్ రప్పించారు. బాధితుడిని అరకు ఏరియా ఆసుపత్రికి తరలించేలా చర్యలు తీసుకున్నారు. అంతేకాకుండా ఏరియా ఆసుపత్రి సూపరింటెండెంట్‌తో ఫోన్‌లో మాట్లాడి, తక్షణమే అత్యవసర వైద్యం అందించేలా చొరవ చూపారు. ప్రాథమిక చికిత్స అనంతరం బాధితుడి పరిస్థితిని బట్టి మెరుగైన వైద్యం కోసం విశాఖపట్నం కేజీహెచ్‌కు రిఫర్ చేయాలని సూచించారు. కేజీహెచ్ సూపరింటెండెంట్‌తో కూడా మాట్లాడి అవసరమైన వైద్య ఏర్పాట్లు చేయించారు. సకాలంలో వైద్య సహాయం అందేలా చూసిన డాక్టర్ రియాజ్ మానవత్వం, బాధ్యతాయుత స్పందనను జిల్లా ప్రజలు అభినందిస్తున్నారు.

అల్లూరి సీతారామరాజు

అరకు ఏరియా ఆసుపత్రికి రాష్ట్ర బృందం ప్రశంసలు

అరకులోయ ఏరియా ఆసుపత్రిని రాష్ట్ర స్థాయి బృందం ఆకస్మికంగా సందర్శించింది. ఎన్‌హెచ్‌ఎం జాయింట్ డైరెక్టర్ (అడ్మిన్) డి.ప్రకాశరావు, రాష్ట్ర ఇమ్యునైజేషన్ ప్రోగ్రామ్ ఆఫీసర్ డాక్టర్ ఎల్.దేవి, ట్రైనింగ్ కన్సల్టెంట్ ఎ.వాసుబాబు అన్ని వార్డులు, లేబర్ రూమ్, ఐపీహెచ్‌ఎల్, ఎస్‌ఎన్‌సీయూ, ఏబీడీఎం రిజిస్ట్రేషన్ విభాగం, ఫార్మసీని క్షుణ్ణంగా పరిశీలించారు. వైద్య సేవలు, నిర్వహణ, పారిశుద్ధ్యం, రోగులకు కల్పిస్తున్న సౌకర్యాలు, అభివృద్ధి పనుల పురోగతిని సమీక్షించారు. పరిశుభ్రత, విభాగాల పనితీరుపై సంతృప్తి వ్యక్తం చేస్తూ వైద్యులు, నర్సింగ్ సిబ్బందిని అభినందించారు. ఏజెన్సీ ప్రజలకు మెరుగైన వైద్యం అందించడంలో ఆసుపత్రి కృషిని ప్రశంసించారు. డీసీహెచ్‌ఎస్ డాక్టర్ ఎల్.రాము, ఆర్‌ఎంవో డాక్టర్ శివ బాలాజీ, అనస్థీషియాలజిస్ట్ డాక్టర్ అప్పారావు, గైనకాలజిస్ట్ డాక్టర్ శోభారాణి, డీఎంహెచ్‌వో డాక్టర్ రియాజ్ బేగ్ పాల్గొన్నారు.

అల్లూరి సీతారామరాజు

ప్రకృతిని ప్రత్యక్షంగా పరిశీలించాలి: ప్రిన్సిపాల్ కేశవరావు

అరకులోయ ప్రభుత్వ డిగ్రీ కళాశాల బోటనీ విభాగం ఆధ్వర్యంలో బోటనీ ప్రథమ, ద్వితీయ, తృతీయ సంవత్సరం విద్యార్థులకు అరకు పైనరీ ఫారెస్ట్‌లో బొటానికల్ టూర్ నిర్వహించారు. ప్రిన్సిపాల్ డాక్టర్ సి.హెచ్. కేశవరావు మాట్లాడుతూ, విద్యార్థులు పాఠ్యపుస్తకాలకే పరిమితం కాకుండా ప్రకృతిని ప్రత్యక్షంగా పరిశీలించాలని, పర్యావరణ, జీవవైవిధ్య పరిరక్షణలో బాధ్యతగా వ్యవహరించాలని సూచించారు. అధ్యాపకులు బి.లచ్చన్న దొర వృక్షజాతులు, పైన్ చెట్ల ప్రత్యేకతలు, శాస్త్రీయ నామాలు, ఔషధ ప్రాధాన్యతను వివరించారు. అరకు రేంజ్ అటవీ అధికారులు అటవీ సంరక్షణపై అవగాహన కల్పించారు. ఎన్ఎస్ఎస్ పీవోలు డా విజయలక్ష్మి, డా సుధీర్ పాల్గొన్నారు.

అల్లూరి సీతారామరాజు

అరకులో ఈ-వ్యర్థాల తగ్గింపుపై విద్యార్థుల్లో అవగాహన

బ్రిక్స్ సుస్థిర జీవనశైలి వారోత్సవాల్లో భాగంగా అరకు వ్యాలీలోని ప్రభుత్వ డిగ్రీ కళాశాల, ప్రభుత్వ మహిళా డిగ్రీ కళాశాలల్లో “ఈ-వ్యర్థాలను తగ్గించడం” అంశంపై అవగాహన కార్యక్రమాలు నిర్వహించారు. ప్రభుత్వ డిగ్రీ కళాశాలలో ఎన్ఎస్ఎస్ ఆధ్వర్యంలో ప్రిన్సిపాల్ డాక్టర్ సిహెచ్ కేశవరావు మాట్లాడుతూ, ఎలక్ట్రానిక్ వ్యర్థాలను సురక్షితంగా రీసైక్లింగ్ చేస్తే నేల, నీటి కాలుష్యాన్ని నివారించవచ్చన్నారు. ఎన్ఎస్ఎస్ పీవోలు డాక్టర్ జి.సుధీర్, వై.విజయలక్ష్మి, బి.లచ్చన్న మాట్లాడుతూ, ఈ-వ్యర్థాల నుంచి వెలువడే హానికర రసాయనాల వల్ల మనుషులకు, జంతువులకు వచ్చే అనారోగ్య సమస్యలను రీసైక్లింగ్ ద్వారా తగ్గించవచ్చన్నారు. వైస్ ప్రిన్సిపాల్ కె.నిర్మల, అధ్యాపకులు, వాలంటీర్లు పాల్గొన్నారు. ప్రభుత్వ మహిళా డిగ్రీ కళాశాలలో నవంబర్ 6న ప్రిన్సిపాల్ డాక్టర్ ఆర్.కుసుమ కుమారి ఆదేశాల మేరకు కార్యక్రమం జరిగింది. పాత మొబైల్స్, కంప్యూటర్లు, ఛార్జర్లు, బ్యాటరీలను పడేయకుండా సేకరించి, అధీకృత రీసైక్లింగ్ కేంద్రాలకు అందించాలని విద్యార్థినులకు సూచించారు. ఎన్ఎస్ఎస్ కోఆర్డినేటర్ డాక్టర్ సి.హెచ్.మురళీకృష్ణ, సభ్యులు, అధ్యాపకులు, విద్యార్థినులు నినాదాలతో ర్యాలీ నిర్వహించారు.

అల్లూరి సీతారామరాజు

ఓట్ల లెక్కింపునకు 11 మండలాల్లో మీడియా కేంద్రాలు; కలెక్టరేట్‌లో ప్రత్యక్ష ఫలితాల ప్రదర్శన

ఎంపీటీసీ, జెడ్పీటీసీ ఓట్ల లెక్కింపు సందర్భంగా జిల్లాలోని 11 మండలాల కౌంటింగ్ కేంద్రాల్లో మండలాల వారీగా ప్రత్యేక మీడియా కేంద్రాలను ఏర్పాటు చేసినట్లు జిల్లా కలెక్టర్ నిశాంతి టి., ఐఏఎస్ తెలిపారు. కలెక్టరేట్‌లో ఏర్పాటు చేసిన మీడియా మానిటరింగ్ అండ్ కమ్యూనికేషన్ సెంటర్ (ఎంసీఎంసీ) ద్వారా ఎన్నికల ఫలితాలను ప్రత్యక్షంగా ప్రదర్శించేందుకు ప్రత్యేక ఏర్పాట్లు చేసినట్లు వెల్లడించారు. ఈ సందర్భంగా కలెక్టర్, ఐటీడీఏ పీవో ఆదిత్య వర్మ, సబ్ కలెక్టర్ కె.చిరంజీవి నాగ వెంకట సాహిత్, జెడ్పీ సీఈఓ వాసుదేవరావుతో కలిసి కలెక్టరేట్‌లోని ఎంసీఎంసీ మీడియా కేంద్రాన్ని సందర్శించి, అక్కడ చేపట్టిన ఏర్పాట్లను పరిశీలించారు. మీడియా ప్రతినిధులు ఎన్నికల ఫలితాలను ఎప్పటికప్పుడు తెలుసుకునేందుకు, ప్రజలకు వేగంగా, ఖచ్చితమైన సమాచారం అందించేందుకు అవసరమైన సాంకేతిక, సమాచార సదుపాయాలు కల్పించినట్లు కలెక్టర్ తెలిపారు. అలాగే మీడియా ప్రతినిధుల సౌకర్యార్థం కౌంటింగ్ కేంద్రాల్లోని మీడియా కేంద్రాల్లో మధ్యాహ్న భోజన సదుపాయం కూడా ఏర్పాటు చేసినట్లు కలెక్టర్ వెల్లడించారు.