తెలంగాణకు వర్ష సూచన

బంగాళాఖాతంలో ఉపరితల ఆవర్తనం ప్రభావం హైదరాబాద్, ఆగస్టు 05, పున్నమి ప్రతినిధి: బంగాళాఖాతంలో ఏర్పడ్డ ఉపరితల ఆవర్తనం ప్రభావంతో రాష్ట్రంలో వాతావరణం మారుతోంది. దక్షిణ బంగాళాఖాతంలో ఈ ఉపరితల ఆవర్తనం ప్రభావం మంగళవారం, బుధవారం (ఆగస్ట్ 5, 6) తెలంగాణపై ఉంటుందని వాతావరణ శాఖ ప్రకటించింది. వర్ష సూచన రాష్ట్ర వ్యాప్తంగా పలుచోట్ల ఉరుములు, మెరుపులతో కూడిన మోస్తరు వర్షాలు కురిసే అవకాశం ఉందనీ, కొన్ని ప్రాంతాల్లో భారీ వర్షాలు కురిసే అవకాశమూ ఉందని అధికారులు హెచ్చరిస్తున్నారు. తెలంగాణలోని మేడ్చల్, హైదరాబాద్, సంగారెడ్డి, రంగారెడ్డి, నాగర్ కర్నూల్, మహబూబ్ నగర్, వనపర్తి, నారాయణపేట, గద్వాల్ జిల్లాల్లో భారీ వర్షాలు కురుస్తాయని హైదరాబాద్ వాతావరణ కేంద్రం తెలిపింది. ప్రొఫెసర్ జయశంకర్ భూపాలపల్లి, ములుగు, కొత్తగూడెం, ఖమ్మం, నల్గొండ, సూర్యాపేట, మహబూబాబాద్, వరంగల్, హన్మకొండ, జనగాం, సిద్దిపేట, భువనగిరి, వికారాబాద్, మెదక్, కామారెడ్డిలో పిడుగులతో కూడిన వర్షాలు కురిసే ఛాన్స్ ఉందని పేర్కొంది. ఇతర చోట్ల తేలికపాటి వర్షాలు పడతాయని అంచనా వేసింది. ఈదురుగాలుల తీవ్రత వర్షాల సమయంలో గంటకు 30 నుంచి 40 కిలోమీటర్ల వేగంతో ఈదురుగాలులు వీస్తాయని హవామాన శాఖ హెచ్చరించింది. ప్రజలు అప్రమత్తంగా ఉండాలని ఐఎండీ సూచనలిచ్చింది. హెచ్చరికలు: గగనతల విద్యుత్‌ స్ఫోటాల నుంచి జాగ్రత్తగా ఉండాలనీ, విద్యుత్ లైన్‌ల దగ్గరగా వెళ్లకుండా ఉండాలనీ, రైతులు పొలాల్లో ఉండే సమయాన్ని తగ్గించుకోవాలనీ, నీటి ప్రవాహాల వద్ద, పురుగు మందుల పిచికారీ సమయంలో సురక్షిత దూరం పాటించాలనీ సంబంధిత అధికారులు ముందస్తు సూచనలు జారీ చేశారు. రైతులకు సూచన: వర్షాభావ పరిస్థితులు మారే సూచనలు ఉన్నందున సాగు కార్యక్రమాలను వాయిదా వేయవచ్చు. వర్షపాతం ఆశించదగిన పంటలను ఎంచుకోవాలని వ్యవసాయ శాఖ సలహా ఇచ్చింది.