హైదరాబాద్కు పాలు అందించే గ్రామాల భవిష్యత్తు ప్రశ్నార్థకం
రోజుకు 14 వేల లీటర్ల పాల ఉత్పత్తి.. ఫ్యూచర్ సిటీ పేరుతో 71 గ్రామాలపై ప్రభావం ఉంటుందా?
యాచారం: హైదరాబాద్ నగరానికి సమీపంలోని గ్రామాలు కేవలం నివాస ప్రాంతాలే కాదు.. నగరానికి ఆహారాన్ని అందించే ప్రధాన వనరులుగా నిలుస్తున్నాయి. ఈ గ్రామాల్లో వ్యవసాయంతో పాటు డెయిరీ ఫార్మింగ్పై ఆధారపడి వేలాది కుటుంబాలు జీవనం సాగిస్తున్నాయి. ముఖ్యంగా యువత పెద్ద సంఖ్యలో పాడి పరిశ్రమను ఉపాధిగా ఎంచుకుని ముందుకు సాగుతున్నారు.
ఒక్క ఈ గ్రామంలోనే రోజుకు సుమారు 14 వేల లీటర్ల పాలు ఉత్పత్తి అవుతున్నాయని, ఆ పాలను హైదరాబాద్ నగరానికి తరలిస్తున్నామని స్థానికులు చెబుతున్నారు. తెల్లవారుజామునే పాలు సేకరించి నగరంలోని వివిధ ప్రాంతాలకు పంపిస్తున్నారు. ఈ ప్రాంతంలోని అనేక గ్రామాలు హైదరాబాద్కు పాలు, కూరగాయలు, పండ్లు, వరి వంటి వ్యవసాయ ఉత్పత్తులను అందిస్తున్నాయి.
అయితే ప్రతిపాదిత ఫ్యూచర్ సిటీ అభివృద్ధి కోసం ఈ ప్రాంతంలోని 71 గ్రామాలపై భూసేకరణ లేదా ఇతర అభివృద్ధి చర్యలు చేపడితే తమ జీవనోపాధి దెబ్బతింటుందని రైతులు, డెయిరీ రైతులు ఆందోళన వ్యక్తం చేస్తున్నారు.
యువతకు డెయిరీ ఫార్మింగ్నే ప్రధాన ఆధారం
ఈ ప్రాంతంలో డెయిరీ ఫార్మింగ్ను సంప్రదాయ వృత్తిగా మాత్రమే కాకుండా.. యువత స్వయం ఉపాధిగా ఎంచుకుంటోంది. పశువులను పెంచుతూ పాలు విక్రయించడం ద్వారా కుటుంబాలను పోషించుకుంటున్నారు. పశువుల మేత, పాల సేకరణ, రవాణా, పాల విక్రయాల ద్వారా ప్రత్యక్షంగా, పరోక్షంగా అనేక మందికి ఉపాధి లభిస్తోంది.
గ్రామాలు అభివృద్ధి చెందాల్సిందేనని, అయితే వ్యవసాయ భూములు, పాడి పరిశ్రమలు, రైతుల జీవనోపాధి దెబ్బతినకుండా అభివృద్ధి ప్రణాళికలు రూపొందించాలని స్థానికులు కోరుతున్నారు.
“గ్రామాలను అభివృద్ధి చేయాలి.. కానీ గ్రామాలనే కోల్పోయే విధంగా అభివృద్ధి వద్దు. హైదరాబాద్కు ఆహారం అందించే ఈ ప్రాంత వ్యవసాయం, డెయిరీ రంగాన్ని కాపాడాలి” అని రైతులు, యువ డెయిరీ ఫార్మర్లు కోరుతున్నారు.
ఫ్యూచర్ సిటీ అభివృద్ధి నేపథ్యంలో ఈ గ్రామాల భవిష్యత్తు, రైతుల జీవనోపాధి, హైదరాబాద్కు ఆహార సరఫరాపై ఎలాంటి ప్రభావం పడుతుందనే అంశం ఇప్పుడు చర్చనీయాంశంగా మారింది.
Uploaded Video:
