ఎన్నికల నగారా మోగనుంది.. విశాఖలో రాజకీయ వేడి! ఎలక్షన్ కసరత్తు వేగం.. 120 వార్డులపై కొత్త లెక్కలు.. కార్పొరేటర్ల పనితీరుపై ప్రజల్లో చర్చ

విశాఖపట్నం, పున్నమి ప్రతినిధి: విశాఖ మహానగరంలో స్థానిక సంస్థల ఎన్నికల సందడి క్రమంగా ఊపందుకుంటోంది. ఎన్నికల ప్రక్రియకు ముందస్తు ఏర్పాట్లు వేగం పుంజుకోవడంతో రాజకీయ పార్టీల్లోనూ, ఆశావహుల్లోనూ కదలిక మొదలైంది. ముఖ్యంగా జీవీఎంసీ పరిధిలో వార్డుల పునర్విభజనకు సంబంధించిన ప్రాథమిక నోటిఫికేషన్ వెలువడటం ఎన్నికల వాతావరణానికి మరింత ఊపునిచ్చింది. గతంలో ఉన్న 98 వార్డులను 120 వార్డులుగా విభజించే ప్రతిపాదనను జీవీఎంసీ మే 17న ప్రకటించింది. ప్రజల నుంచి అభ్యంతరాలు, సూచనలు స్వీకరించే ప్రక్రియను కూడా చేపట్టింది. 120 వార్డులు.. 120 కొత్త రాజకీయ సమీకరణాలు! వార్డుల సంఖ్య పెరగడంతో విశాఖ నగర రాజకీయ ముఖచిత్రంలోనూ మార్పులు వచ్చే అవకాశం కనిపిస్తోంది. కొత్త వార్డు హద్దులు, జనాభా ప్రాతిపదికన విభజన, రిజర్వేషన్లు తదితర అంశాలు ఖరారైన తర్వాతే ఏ ప్రాంతం నుంచి ఎవరు పోటీ చేయాలన్న దానిపై స్పష్టత రానుంది. దీంతో ఇప్పటికే రాజకీయ పార్టీల్లో టికెట్ల కోసం ఆశావహుల కదలికలు మొదలైనట్లు చర్చ సాగుతోంది. పాత కార్పొరేటర్లకు పనితీరు పరీక్ష ఇప్పటి వరకు కార్పొరేటర్లుగా పనిచేసిన ప్రజాప్రతినిధులకు రానున్న ఎన్నికలు ఒక రకంగా పనితీరు పరీక్షగా మారనున్నాయి. తమ డివిజన్‌లో రహదారులు, డ్రైనేజీ, తాగునీరు, పారిశుధ్యం, వీధి దీపాలు, పార్కులు, మౌలిక వసతులు వంటి సమస్యలపై ఎంతవరకు స్పందించారు? ప్రజలకు ఎంత అందుబాటులో ఉన్నారు? అధికారుల వద్ద సమస్యలను ఎంతవరకు పరిష్కరించగలిగారు? అన్న అంశాలపై ఓటర్లు లెక్కలు వేసే అవకాశం ఉంది. కొత్త ముఖాలకు అవకాశం? మరోవైపు యువ నాయకులు, మహిళలు, స్థానికంగా ప్రజా సమస్యలపై పనిచేస్తున్న నాయకులు కూడా ఎన్నికల బరిలోకి రావాలని ఉత్సాహం చూపుతున్నారు. కొత్త వార్డు హద్దులు, రిజర్వేషన్లు ఖరారైన తర్వాత ఆశావహుల లెక్క మరింత పెరిగే అవకాశం ఉంది. గతంలో ఉన్న రాజకీయ సమీకరణాలు కొత్త వార్డుల్లో ఎంతవరకు పనిచేస్తాయన్నది కూడా ఆసక్తికరంగా మారింది. పార్టీలకు ప్రతిష్టాత్మక పోరు విశాఖ కార్పొరేషన్ ఎన్నికలు ప్రధాన రాజకీయ పార్టీలకు ప్రతిష్టాత్మకంగా మారనున్నాయి. పార్టీ బలం ఒకవైపు.. అభ్యర్థి వ్యక్తిగత పరిచయాలు, ప్రజలతో అనుబంధం మరోవైపు.. స్థానిక సమస్యలపై పోరాటం, గత పనితీరు ఇంకోవైపు.. ఇలా అనేక అంశాలు ఒక్కో వార్డులో ఫలితాలను ప్రభావితం చేయనున్నాయి. ప్రజలే అసలు నిర్ణేతలు ఎన్నికలు సమీపిస్తున్న కొద్దీ రాజకీయ నాయకుల కంటే ప్రజల సమస్యలే ప్రధాన చర్చగా మారనున్నాయి. “ఎవరు అందుబాటులో ఉన్నారు? ఎవరు సమస్యను పరిష్కరించారు? ఎవరు మాట నిలబెట్టుకున్నారు? ఎవరు కేవలం ఎన్నికల సమయంలో మాత్రమే కనిపించారు?” అనే ప్రశ్నలకు ప్రజల సమాధానమే అభ్యర్థుల భవితవ్యాన్ని నిర్ణయించనుంది. వార్డు వారీగా ‘పున్నమి’ ప్రత్యేక పరిశీలన రానున్న స్థానిక సంస్థల ఎన్నికల నేపథ్యంలో విశాఖ నగరంలోని ప్రతి వార్డుపై ‘పున్నమి’ ప్రత్యేక దృష్టి సారించనుంది. ఆయా ప్రాంతాల్లోని ప్రధాన సమస్యలు, గత ప్రజాప్రతినిధుల పనితీరు, ప్రజల్లో ఉన్న అభిప్రాయం, రాజకీయ పార్టీల బలం, ఆశావహుల పోటీ, కొత్త సమీకరణాలు వంటి అంశాలను వార్డు వారీగా విశ్లేషించే ప్రత్యేక కథనాలు అందించనున్నాం. 98 నుంచి 120 వార్డులు.. పాత లెక్కలకు కొత్త రూపం.. కార్పొరేటర్ల పనితీరుకు ప్రజల తీర్పు.. కొత్త ముఖాలకు అవకాశాలపై ఉత్కంఠ.. విశాఖలో ఎన్నికల సమరానికి రంగం సిద్ధమవుతోందా? రానున్న రోజుల్లో ప్రతి వార్డులో ఎవరి బలం ఎంత? ఎవరి వెంట ప్రజలు ఉన్నారు? ఎవరి పనితీరు ఎలా ఉంది? ఏ పార్టీకి ఎక్కడ అనుకూల పరిస్థితులు ఉన్నాయి? అనే అంశాలపై ‘పున్నమి’ ప్రత్యేక కథనాలు కొనసాగనున్నాయి.