సముద్రాల గ్రామంలో మౌలిక వసతులు కల్పించాలి: సీపీఎం మండల కార్యదర్శి మునిగెల రమేష్

​స్టేషన్ ఘనపూర్ మండలం సముద్రాల గ్రామంలో నెలకొన్న మౌలిక వసతుల సమస్యలను వెంటనే పరిష్కరించాలని సీపీఎం మండల కార్యదర్శి మునిగెల రమేష్ ప్రభుత్వ అధికారులను డిమాండ్ చేశారు. శుక్రవారం సీపీఎం పార్టీ ఆధ్వర్యంలో గ్రామంలో గ్రామ సమస్యలపై ప్రత్యేకంగా సర్వే నిర్వహించారు. ​ఈ సందర్భంగా గ్రామంలోని ప్రధాన సమస్యలను పరిశీలించి మాట్లాడారు. గ్రామం నుండి వైకుంఠ ధామం (స్మశాన వాటిక) వెళ్లే రహదారిపై వర్షాలు పడితే పూర్తిగా బురదమయంగా మారుతుందని, అత్యవసర సమయాల్లోనూ వెళ్లలేని దుస్థితి ఉందని ఆందోళన వ్యక్తం చేశారు. తక్షణమే ఆ మార్గంలో సీసీ రోడ్డు నిర్మించాలని కోరారు. అలాగే, గ్రామంలో డ్రైనేజీ వ్యవస్థ అస్తవ్యస్తంగా మారి మురుగునీరు నిలిచిపోతుండటంతో పిచ్చిమొక్కలు పెరిగి, దోమలు వ్యాపించి విషజ్వరాలు ప్రబలే ప్రమాదం ఉందని హెచ్చరించారు. వెంటనే కాలువలను శుభ్రం చేసి సైడ్ డ్రైనేజీలు నిర్మించాలని తెలిపారు. ​ఇంకా, గ్రామంలోని రెండో వార్డులో విద్యుత్ స్తంభాలు ఉన్నప్పటికీ వైరింగ్ లేకపోవడంతో వీధి దీపాలు వెలగక రాత్రివేళల్లో ప్రజలు, వృద్ధులు అంధకారంలో తీవ్ర ఇబ్బందులు పడుతున్నారని పేర్కొన్నారు. తాగునీరు, పారిశుద్ధ్యం తదితర సమస్యలపై అధికారులు ప్రత్యేక దృష్టి సారించాలని కోరారు. ​ఈ కార్యక్రమంలో కత్తుల రాజు, మంద మహేందర్, ఓరిగంటి మల్లయ్య, తాటికొండ నాగరాజు, మేకల కొమురయ్య, బండి ఐలయ్య, తాడం రమేష్, తాటికొండ అశోక్, ఉప్పలయ్య, ఎండీ ఫక్రుద్దీన్, ఎండీ యాకూబ్, కోల అనిల్, చందు, వెంకన్న తదితరులు పాల్గొన్నారు.