ఆత్మకూరు, జూలై 10 (హరికిరణ్, పున్నమి ప్రతినిధి):
ఆంధ్రప్రదేశ్ రాష్ట్ర దేవాదాయ, ధర్మదాయ శాఖ మంత్రి ,ఆత్మకూరు శాసనసభ్యులు ఆనం రామనారాయణ రెడ్డి జన్మదినాన్ని పురస్కరించుకుని శుక్రవారం ఆత్మకూరు పట్టణంలో సేవా కార్యక్రమాలు ఘనంగా నిర్వహించారు. 7వ వార్డు అధ్యక్షులు సయ్యద్ మల్లిక్ (బాషా) ఆధ్వర్యంలో 7వ, 8వ, 9వ వార్డుల పరిధిలోని అంగన్వాడీ కేంద్రాల్లో చిన్నారులతో కలిసి జన్మదిన వేడుకలు నిర్వహించి, వారికి అవసరమైన పలు వస్తువులను పంపిణీ చేశారు.
ఈ సందర్భంగా మూడు అంగన్వాడీ కేంద్రాల్లో చిన్నారులతో కలిసి కేక్ కట్ చేసి మంత్రి ఆనం రామనారాయణ రెడ్డికి జన్మదిన శుభాకాంక్షలు తెలిపారు. అనంతరం చిన్నారులు సౌకర్యవంతమైన వాతావరణంలో విద్యాభ్యాసం కొనసాగించేందుకు అవసరమైన కుర్చీలు, భోజనానికి ప్లేట్లు, గ్లాసులు, ఫ్యాన్లు తదితర సామగ్రిని అంగన్వాడీ కేంద్రాలకు అందజేశారు. చిన్నారుల సంక్షేమం, వారి విద్యాభివృద్ధికి ఇటువంటి కార్యక్రమాలు ఎంతో ఉపయోగపడతాయని నిర్వాహకులు పేర్కొన్నారు.
ఈ కార్యక్రమానికి ముఖ్య అతిథిగా టీడీపీ ఆత్మకూరు పట్టణ అధ్యక్షులు తుమ్మల చంద్రారెడ్డి హాజరై చిన్నారులకు సామగ్రిని పంపిణీ చేశారు. మంత్రి ఆనం రామనారాయణ రెడ్డి ప్రజాసేవను ఆదర్శంగా తీసుకుని ఆయన జన్మదినాన్ని ఆడంబరాలకు దూరంగా సేవా కార్యక్రమాలతో నిర్వహించడం అభినందనీయమని అన్నారు. సమాజంలోని చిన్నారుల సంక్షేమానికి ప్రతి ఒక్కరూ తమ వంతు బాధ్యతగా సేవా కార్యక్రమాల్లో పాల్గొనాలని పిలుపునిచ్చారు.
అంగన్వాడీ కేంద్రాల సిబ్బంది ఈ సందర్భంగా నిర్వాహకులకు కృతజ్ఞతలు తెలిపారు. చిన్నారులకు అందించిన సామగ్రి కేంద్రాల నిర్వహణకు ఎంతో ఉపయోగపడుతుందని పేర్కొన్నారు. కార్యక్రమంలో పాల్గొన్న చిన్నారులు కొత్తగా అందించిన కుర్చీలు, ప్లేట్లు, గ్లాసులు స్వీకరించి ఆనందం వ్యక్తం చేశారు.
ఈ కార్యక్రమంలో షేక్ షానవాస్, పఠాన్ జాకీర్, మహబూబ్ బాషా, మోబినా, స్థానిక పార్టీ నాయకులు, కార్యకర్తలు, అంగన్వాడీ సిబ్బంది, తల్లిదండ్రులు, 7వ, 8వ, 9వ వార్డుల ప్రజలు పాల్గొని మంత్రి ఆనం రామనారాయణ రెడ్డికి జన్మదిన శుభాకాంక్షలు తెలియజేశారు. సేవా కార్యక్రమాల ద్వారా సమాజానికి ఉపయోగపడే విధంగా జన్మదినాన్ని నిర్వహించడం పట్ల పలువురు ప్రశంసలు వ్యక్తం చేశారు.