Contact Us Latest News
నిజమైన వార్త. వేగమైన సమాచారం. ఆంధ్రప్రదేశ్ • తెలంగాణ • జాతీయం
Author Panel

Tag: అనకాపల్లి జిల్లా

అనకాపల్లి

గ్రామాల్లో వివాదాలకు చెక్‌.. కోర్టు కేసులకు గుడ్‌బై..!

యలమంచిలి (పున్నమి న్యూస్ రిపోర్టర్ ఆనంద్): గ్రామీణ ప్రాంతాల్లో కమ్యూనిటీ మధ్యవర్తిత్వానికి NALSA శ్రీకారం గ్రామీణ ప్రాంతాల్లో చిన్నచిన్న వివాదాలు కోర్టుల వరకు వెళ్లకుండా సామరస్యపూర్వకంగా పరిష్కరించేందుకు నేషనల్ లీగల్ సర్వీసెస్ అథారిటీ (NALSA) కమ్యూనిటీ మధ్యవర్తిత్వ వ్యవస్థను రూపొందించింది. “Community Mediation – Towards a Litigation-Free Rural India” పేరిట రూపొందించిన స్టాండర్డ్ ఆపరేటింగ్ ప్రొసీజర్ (SOP) ద్వారా గ్రామాల్లో కోర్టు కేసులు లేని వాతావరణం కల్పించడమే లక్ష్యంగా ముందుకు సాగుతోంది. కుటుంబ కలహాలు, పొరుగువారి మధ్య వివాదాలు, భూ సరిహద్దులు, ఆస్తి సమస్యలు, నీటి వినియోగం, చిన్నపాటి డబ్బు బకాయిలు తదితర వివాదాలను ప్రారంభ దశలోనే పరస్పర చర్చలు, అవగాహన, మధ్యవర్తిత్వం ద్వారా పరిష్కరించుకునే అవకాశం ఉంటుంది. ఇరుపక్షాల అంగీకారంతో సమస్యకు పరిష్కారం కనుగొనడం ద్వారా వివాదాలు పెద్దవిగా మారకుండా అడ్డుకోవచ్చు. కమ్యూనిటీ మధ్యవర్తిత్వంతో గ్రామీణ ప్రజలకు సమయం, ఖర్చు ఆదా కావడంతో పాటు కుటుంబ, సామాజిక సంబంధాలు కూడా దెబ్బతినకుండా కాపాడే అవకాశం ఉంటుంది. గ్రామాల్లో శాంతియుత వాతావరణాన్ని పెంపొందిస్తూ “కోర్టు కేసులు లేని గ్రామాల” దిశగా ప్రజలను చైతన్యపరచడమే ఈ కార్యక్రమం ప్రధాన ఉద్దేశ్యమని పేర్కొన్నారు.

అనకాపల్లి

ముఖ్యమంత్రి పర్యటనకు పటిష్ట భద్రత.. ఎ.కోడూరులో ఐజీ, ఎస్పీ విస్తృత పరిశీలన…!

పున్నమి న్యూస్ | అనకాపల్లి జిల్లా | రిపోర్టర్ ఆనంద్ అనకాపల్లి జిల్లా కె.కోటపాడు మండలం ఎ.కోడూరు గ్రామంలో శనివారం జరగనున్న ‘స్వర్ణాంధ్ర–స్వచ్ఛ ఆంధ్ర’ కార్యక్రమానికి ముఖ్యమంత్రి నారా చంద్రబాబు నాయుడు హాజరుకానున్న నేపథ్యంలో పోలీసులు పటిష్ట భద్రతా ఏర్పాట్లు చేపట్టారు. ఈ నేపథ్యంలో శుక్రవారం విశాఖ రేంజ్ ఐజీ గోపినాథ్ జట్టి, జిల్లా ఎస్పీ తుహిన్ సిన్హా ఎ.కోడూరులో క్షేత్రస్థాయిలో పర్యటించి భద్రతా ఏర్పాట్లను పరిశీలించారు. కార్యక్రమ ప్రాంగణం, హెలిప్యాడ్, వీఐపీ రూట్, బందోబస్తు ప్రాంతాలను నిశితంగా సమీక్షించారు. సీఎం పర్యటనలో విధులు నిర్వహించే అధికారులు, సిబ్బంది అత్యంత అప్రమత్తంగా ఉండాలని ఐజీ సూచించారు. ఎలాంటి అలసత్వానికి తావులేకుండా నిబద్ధతతో విధులు నిర్వర్తించాలని ఆదేశించారు. భద్రతా పరంగా ఎలాంటి లోటుపాట్లు లేకుండా వివిధ శాఖల అధికారులతో సమన్వయం చేసుకోవాలని సూచించారు. ముఖ్యమంత్రి పర్యటనను విజయవంతంగా నిర్వహించేందుకు అవసరమైన అన్ని చర్యలు చేపట్టాలని అధికారులను ఆదేశించారు. ఈ పరిశీలనలో మాడుగుల ఎమ్మెల్యే బండారు సత్యనారాయణమూర్తి, స్థానిక ప్రజాప్రతినిధులు, పోలీసు అధికారులు, సిబ్బంది పాల్గొన్నారు.

అనకాపల్లి

పొలం బాట కార్యక్రమంలో పొలంబడి..!!

అనకాపల్లి జిల్లా | పున్నమి న్యూస్ రిపోర్టర్ ఆనంద్ యలమంచిలి: మండలంలోని ఏటికొప్పాక గ్రామంలో వ్యవసాయ శాఖ ఆధ్వర్యంలో రైతుల పొలాల్లో పొలంబడి కార్యక్రమాన్ని నిర్వహించారు. గ్రామానికి చెందిన కర్రీ రామకృష్ణ, సూరిశెట్టి నర్సింగరావు రైతుల పొలాలను ప్రదర్శన క్షేత్రాలుగా ఎంపిక చేసి రైతులకు సాగు పద్ధతులపై అవగాహన కల్పించారు. గ్రామంలోని 25 మంది రైతులకు చెందిన 25 ఎకరాల్లో పొలంబడి కార్యక్రమాన్ని అమలు చేస్తూ, సాధారణ సాగు పద్ధతులకు పొలంబడి విధానానికి మధ్య ఉన్న వ్యత్యాసాలను వ్యవసాయ అధికారులు వివరించారు. విత్తనం వేసిన దశ నుంచి పంట చేతికి వచ్చే వరకు శాస్త్రీయ యాజమాన్య పద్ధతులను పాటిస్తే అధిక దిగుబడులు సాధించవచ్చని మండల వ్యవసాయ అధికారి మోహన్రావు తెలిపారు. ప్రకృతి పరిస్థితులకు అనుగుణంగా పంటలకు వచ్చే చీడపీడలు, మిత్ర పురుగులను గుర్తించే విధానాలను చార్టుల ద్వారా రైతులకు వివరించారు. అనంతరం రైతుల పొలాల్లోనే ప్రదర్శన నిర్వహించి పంటల యాజమాన్యంపై అవగాహన కల్పించారు. ఈ కార్యక్రమంలో వ్యవసాయ సహాయకుడు కుమార్, ఏపీసీఎన్‌ఎఫ్ సిబ్బంది వనజ, పద్మజ తదితరులు పాల్గొన్నారు.

అనకాపల్లి

ప్రమాదంలో గాయపడిన మహిళా కార్మికులకు అండగా సీఐటీయూ…!

అనకాపల్లి జిల్లా | పున్నమి న్యూస్ రిపోర్టర్ ఆనంద్ యలమంచిలి, మోసయ్యపేట, ఆగస్టు 20: టాటా ఏస్ వాహనం ప్రమాదంలో తీవ్రంగా గాయపడిన మహిళా కార్మికులను సీఐటీయూ నాయకులు పరామర్శించి భరోసా కల్పించారు. గత నెలలో యలమంచిలి, మోసయ్యపేట, కొత్త మోసయ్యపేట, చోడపల్లి గ్రామాలకు చెందిన మహిళా కార్మికులు ప్రయాణిస్తున్న టాటా ఏస్ వాహనం చెట్టును ఢీకొని ప్రమాదానికి గురైన విషయం తెలిసిందే. ప్రమాదంలో గాయపడిన కొందరు మహిళలు ఆసుపత్రి నుంచి డిశ్చార్జ్ అయి ఇళ్లకు చేరుకోగా, మరికొందరు నెలరోజులుగా ఆసుపత్రిలో చికిత్స పొందుతున్నారు. ముచ్చు నాగమణి కాలు విరగడంతో నడవలేని పరిస్థితిలో ఉన్నారని, ముచ్చు రామలక్ష్మి, కొండపల్లి చౌడమ్మ, శెట్టి లక్ష్మి ఆసుపత్రిలో చికిత్స పొందుతున్నారని నేతలు తెలిపారు. వైద్య ఖర్చులతో పాటు కుటుంబాలను పోషించుకోవడం కూడా బాధితులకు భారంగా మారిందని ఆవేదన వ్యక్తం చేశారు. మహిళా కార్మికులు పూర్తిగా కోలుకునే వరకు వేతనంతో కూడిన సెలవులు, పౌష్టికాహారం, తగిన పరిహారం అందించి పరిశ్రమ యాజమాన్యం ఆదుకోవాలని సీఐటీయూ నేతలు డిమాండ్ చేశారు. బాధిత కుటుంబాలకు తక్షణమే భరోసా కల్పించాలని కోరారు. కార్యక్రమంలో సీఐటీయూ జిల్లా కార్యదర్శి ఆర్. రాము, మోసయ్యపేట ఉపసర్పంచ్ పుర్రె శ్రీనివాసరావు తదితరులు పాల్గొన్నారు.

అనకాపల్లి

వర్షాకాల సీజనల్ వ్యాధులపై విద్యార్థులకు అవగాహన

అనకాపల్లి జిల్లా | పున్నమి న్యూస్ రిపోర్టర్ ఆనంద్ ) యలమంచిలి: వర్షాకాలంలో ప్రబలే సీజనల్ వ్యాధులపై విద్యార్థులు అప్రమత్తంగా ఉండాలని వైద్య నిపుణులు సూచించారు. యలమంచిలి రైల్వే స్టేషన్ రోడ్డులోని జిల్లా పరిషత్ ఉన్నత పాఠశాలలో గురువారం సీజనల్ వ్యాధులపై అవగాహన కార్యక్రమం నిర్వహించారు. ఈ కార్యక్రమంలో ఆయుర్వేద వైద్య నిపుణులు డాక్టర్ ధినయ్ కుమార్, హోమియో వైద్య నిపుణులు డాక్టర్ ఎల్. రిషిత పాల్గొన్నారు. వర్షాకాలంలో వచ్చే వ్యాధులు, వాటి లక్షణాలు, నివారణ చర్యలపై విద్యార్థులకు అవగాహన కల్పించారు. పరిసరాలను పరిశుభ్రంగా ఉంచుకోవాలని, దోమలు వృద్ధి చెందకుండా జాగ్రత్తలు తీసుకోవాలని, వ్యక్తిగత పరిశుభ్రత పాటించాలని సూచించారు. అనంతరం విద్యార్థులు, ఉపాధ్యాయులకు ప్రివెంటివ్ మెడిసిన్ (నివారణ మందులు) పంపిణీ చేశారు. కార్యక్రమంలో ఇంచార్జ్ ప్రధానోపాధ్యాయుడు మల్లిపాటి సత్యనారాయణ, ఉపాధ్యాయులు డి.వి. భారతి, కె. రాజేష్, పి. శ్రీనివాసరావు తదితరులు పాల్గొన్నారు.

అనకాపల్లి

విద్యార్థుల సమస్యలు పరిష్కరించాలి – ఏఐఎస్ఎఫ్…!

అనకాపల్లి జిల్లా (పున్నమి న్యూస్ రిపోర్టర్ ఆనంద్ ) : అనకాపల్లి: విద్యార్థుల సమస్యలను తక్షణమే పరిష్కరించాలని డిమాండ్ చేస్తూ ఏఐఎస్ఎఫ్ ఆధ్వర్యంలో విద్యార్థులు భారీ నిరసన చేపట్టారు. ఎర్రజెండాలు, ప్లకార్డులు చేతబట్టి నినాదాలు చేస్తూ విద్యార్థులు ర్యాలీ నిర్వహించారు. ప్రభుత్వ విద్యారంగాన్ని బలోపేతం చేసి, విద్యార్థులకు నాణ్యమైన విద్య అందించేందుకు ప్రత్యేక చర్యలు చేపట్టాలని ఏఐఎస్ఎఫ్ నాయకులు డిమాండ్ చేశారు. ప్రభుత్వ విద్యాసంస్థల్లో నెలకొన్న సమస్యలను ప్రభుత్వం తక్షణమే గుర్తించి పరిష్కరించాలని కోరారు. పాఠశాలలు, కళాశాలల్లో మౌలిక వసతుల కొరతను తీర్చడంతో పాటు తాగునీరు, మరుగుదొడ్లు, విద్యుత్, తరగతి గదులు వంటి సౌకర్యాలను మెరుగుపరచాలని డిమాండ్ చేశారు. విద్యాసంస్థల్లో ఖాళీగా ఉన్న ఉపాధ్యాయులు, అధ్యాపకులు, ఇతర సిబ్బంది పోస్టులను వెంటనే భర్తీ చేయాలని కోరారు. పేద, మధ్యతరగతి విద్యార్థులపై ఫీజుల భారం పడకుండా ప్రభుత్వం చర్యలు తీసుకోవాలని, అర్హులైన విద్యార్థులకు స్కాలర్‌షిప్‌లు, ఫీజు రీయింబర్స్‌మెంట్‌ను సకాలంలో అందించాలని నాయకులు అన్నారు. విద్యార్థులకు అవసరమైన పాఠ్యపుస్తకాలు, యూనిఫాంలు, వసతి సౌకర్యాలు సమయానికి అందించాలని కోరారు. విద్యార్థుల సమస్యలను నిర్లక్ష్యం చేస్తే ఉద్యమాన్ని మరింత ఉధృతం చేస్తామని ఏఐఎస్ఎఫ్ నాయకులు హెచ్చరించారు. విద్యార్థుల భవిష్యత్తును దృష్టిలో పెట్టుకుని ప్రభుత్వం వెంటనే స్పందించి సమస్యల పరిష్కారానికి చర్యలు చేపట్టాలని వారు డిమాండ్ చేశారు.

అనకాపల్లి

యలమంచిలిలో సద్భావన దివస్‌ సందర్భంగా న్యాయ అవగాహన సదస్సు…!

యలమంచిలి | పున్నమి న్యూస్ రిపోర్టర్ ఆనంద్ యలమంచిలిలో సద్భావన దివస్‌ను పురస్కరించుకుని అదనపు జూనియర్ సివిల్ జడ్జి కె. రమేష్ ఆధ్వర్యంలో న్యాయ అవగాహన సదస్సు నిర్వహించారు. ఈ సందర్భంగా ఆయన మాట్లాడుతూ భిన్నత్వంలో ఏకత్వమే భారతీయ సంస్కృతికి మూలమని, కుల, మత, ప్రాంతీయ, భాషా భేదాలకు అతీతంగా మత సామరస్యం, జాతీయ సమగ్రతను పెంపొందించుకోవాలని సూచించారు. హింసకు తావులేకుండా పరస్పరం గౌరవించుకుంటూ శాంతియుతంగా జీవించాలని పిలుపునిచ్చారు. గ్రామాల్లో తలెత్తే పగలు, ప్రతీకారాలు, చిన్నచిన్న విభేదాలను న్యాయస్థానాల వెలుపల సామరస్యపూర్వకంగా పరిష్కరించుకుని విభేదరహిత గ్రామాలుగా తీర్చిదిద్దేందుకు కృషి చేయాలని కోరారు. కార్యక్రమంలో న్యాయవాదులు, కోర్టు సిబ్బంది తదితరులు పాల్గొన్నారు.

అనకాపల్లి

వ్యవసాయ సబ్‌డివిజన్ పరిధిలో ఘనంగా కిసాన్ మేళా…!

యలమంచిలి | పున్నమి న్యూస్ రిపోర్టర్ ఆనంద్ యలమంచిలి గ్రామంలో రాపేటి శ్రీను కల్లాల వద్ద ఆత్మ సౌజన్యంతో కిసాన్ మేళా నిర్వహించారు. నాలుగు మండలాలకు చెందిన అభ్యుదయ రైతులు, వ్యవసాయ శాఖ సిబ్బంది పాల్గొన్నారు. ఈ సందర్భంగా జిల్లా రిసోర్స్ సెంటర్ డిప్యూటీ డైరెక్టర్ సుబ్రహ్మణ్యం మాట్లాడుతూ ఎల్‌నినో పరిస్థితులను దృష్టిలో ఉంచుకుని వరికి ప్రత్యామ్నాయంగా రాగులు, కందులు, జనుము, ఉలవలు వంటి తక్కువ నీటి పంటలను సాగు చేయాలని సూచించారు. ఏడీఏ శ్రీధర్ రైతులు స్థానిక పరిస్థితులకు అనుగుణంగా పంటలను ఎంపిక చేసుకోవాలని తెలిపారు. రైతులు ఫసల్ బీమా యోజన కింద పంట బీమా నమోదు చేసుకోవాలని వ్యవసాయ శాఖ అధికారులు సూచించారు. రైతు సేవా కేంద్రాల ద్వారా అవసరమైన విత్తనాలను సకాలంలో అందుబాటులో ఉంచుతామని తెలిపారు. కార్యక్రమంలో వ్యవసాయ అధికారులు, శాస్త్రవేత్తలు, వ్యవసాయ విస్తరణ అధికారులు, రైతు సేవా కేంద్రాల సిబ్బంది, అభ్యుదయ రైతులు పాల్గొన్నారు.

అనకాపల్లి

ఎకో క్లబ్ ఫర్ మిషన్ లైఫ్ ఆధ్వర్యంలో మొక్కలు నాటే కార్యక్రమం..!

అనకాపల్లి జిల్లా: పున్నమి న్యూస్ రిపోర్టర్ ఆనంద్ ఎస్. రాయవరం: ఎస్. రాయవరం మండలం రేవుపోలవరం జెడ్.పి.హెచ్.ఎస్. పాఠశాలలో పర్యావరణ పరిరక్షణలో భాగంగా “ఎకో క్లబ్ ఫర్ మిషన్ లైఫ్” కార్యక్రమాన్ని ఉత్సాహంగా నిర్వహించారు. పాఠశాల ప్రధానోపాధ్యాయురాలు శ్రీమతి అరుణ ఆధ్వర్యంలో జరిగిన ఈ కార్యక్రమంలో పి.డి. మాస్టర్ శ్రీ కృష్ణ, జీవశాస్త్ర ఉపాధ్యాయులు, ఎకో క్లబ్ ఇన్‌ఛార్జ్ శ్రీ కె. ప్రవీణ్ కుమార్ సమక్షంలో విద్యార్థులు ఉత్సాహంగా పాల్గొన్నారు. విద్యార్థులు పాఠశాల ఆవరణలో వివిధ రకాల మొక్కలను నాటి, వాటికి నీరు పోసి పర్యావరణ పరిరక్షణకు తమ వంతు బాధ్యతను చాటుకున్నారు. కార్యక్రమంలో పాల్గొన్న విద్యార్థులకు “ఎకో క్లబ్ ఫర్ మిషన్ లైఫ్” సర్టిఫికెట్లను ప్రధానోపాధ్యాయురాలు అరుణ, ఉపాధ్యాయులు అందజేసి అభినందించారు. ఈ సందర్భంగా హెచ్.ఎం. అరుణ మాట్లాడుతూ “ప్రతి విద్యార్థి కనీసం ఒక మొక్కను నాటి, దానిని సంరక్షించి పెంచడం మనందరి కర్తవ్యం” అని పిలుపునిచ్చారు.

అనకాపల్లి

పశువైద్యశాల ఉంది.. వైద్యుడే లేడు! అత్యవసర వేళ పశువుల పరిస్థితి ఏంటి?

పేరుకే మేజర్ పంచాయతీ.. సమస్యలే సమస్యలు.. పరిష్కారాలు కరువు! యలమంచిలి , ఆగస్టు 20 (పున్నమి న్యూస్ రిపోర్టర్ ఆనంద్): ఎలమంచిలి మండలంలోని మేజర్ పంచాయతీ ఏటికొప్పాకలో పశువైద్యశాల ఉన్నా రెగ్యులర్ పశువైద్యాధికారి లేకపోవడం పశుపోషకులకు తీవ్ర ఇబ్బందిగా మారింది. ప్రస్తుతం ఎస్‌ఓ, ఒక అటెండర్‌తోనే పశువైద్యశాల నడుస్తుండగా, ఎలమంచిలి నుంచి వారంలో రెండు రోజులు మాత్రమే వైద్య సేవలు అందుతున్నాయని స్థానికులు చెబుతున్నారు. రూమ్ ఉంది.. కుర్చీ ఉంది.. డాక్టర్ మాత్రం లేరు! పశువులకు అనారోగ్యం, ప్రమాదం లేదా ప్రసవ సమయంలో అత్యవసర పరిస్థితి ఏర్పడితే వెంటనే వైద్యం అందకపోవడంతో పశుపోషకులు ఆందోళన వ్యక్తం చేస్తున్నారు. అత్యవసర సమయంలో పశువులను ఎలమంచిలి తీసుకెళ్లాల్సిన పరిస్థితి ఏర్పడుతోందని వాపోతున్నారు. మేజర్ పంచాయతీ స్థాయిలో ఉన్న పశువైద్యశాలలోనే పూర్తిస్థాయి వైద్య సేవలు అందకపోవడంపై ప్రజలు ప్రశ్నిస్తున్నారు. అధికారులు, స్థానిక ప్రజాప్రతినిధులు వెంటనే స్పందించి ఏటికొప్పాకకు శాశ్వత పశువైద్యాధికారిని నియమించాలని కోరుతున్నారు. ముఖ్యంగా ఎలమంచిలి ఎమ్మెల్యే ప్రత్యేక దృష్టి సారించి పశువైద్యశాలకు పూర్తిస్థాయి సిబ్బందిని అందుబాటులోకి తీసుకురావాలని పశుపోషకులు విజ్ఞప్తి చేస్తున్నారు.