Contact Us Latest News
నిజమైన వార్త. వేగమైన సమాచారం. ఆంధ్రప్రదేశ్ • తెలంగాణ • జాతీయం
Author Panel

Tag: కలెక్టర్

నంద్యాల

రెవెన్యూ దరఖాస్తులు పెండింగ్‌ ఉండొద్దు జాప్యం లేకుండా పరిష్కరించాలి : కలెక్టర్‌

నంద్యాల: రెవెన్యూ శాఖకు సంబంధించిన దరఖాస్తులు పెండింగ్‌లో లేకుండా క్షేత్రస్థాయిలోనే సత్వర పరిష్కారం చూపాలని జిల్లా కలెక్టర్‌ జి. రాజకుమారి గణియా అధికారులను ఆదేశించారు. బుధవారం మానవ వనరుల అభివృద్ధి కేంద్రంలో రెవెన్యూ అధికారులతో నిర్వహించిన సమీక్షలో ఆమె మాట్లాడారు.22ఏ, ఇనాం పట్టాలు, మ్యుటేషన్లు, సర్వే సర్టిఫికెట్ల దరఖాస్తులను జాప్యం లేకుండా పరిష్కరించాలని సూచించారు. ప్రజలు ఒకే సమస్యపై పలుమార్లు కార్యాలయాల చుట్టూ తిరగాల్సిన పరిస్థితి రాకుండా అధికారులు బాధ్యతతో పనిచేయాలని అన్నారు. పెండింగ్‌ దరఖాస్తులపై ప్రతిరోజూ పర్యవేక్షణ చేపట్టి, అవసరమైన ఫైళ్లను వెంటనే పైస్థాయికి పంపాలని ఆదేశించారు. స్థానిక సంస్థల ఎన్నికల నేపథ్యంలో కుల, నో డ్యూస్‌ ధ్రువీకరణ పత్రాలను నిబంధనల మేరకు సత్వరం జారీ చేయాలని సూచించారు. పీజీఆర్ఎస్‌ దరఖాస్తులపై దరఖాస్తుదారులతో స్వయంగా మాట్లాడి సమస్య పరిష్కార స్థితిని తెలుసుకోవడంతో పాటు ప్రజల సంతృప్తిని నిర్ధారించేలా చర్యలు చేపట్టాలని కలెక్టర్‌ స్పష్టం చేశారు. సమావేశంలో జాయింట్‌ కలెక్టర్‌ సూరజ్‌ ధనుంజయ్‌, సబ్‌ కలెక్టర్‌ మనీషా, డీఆర్వో రామునాయక్‌, ఆర్డీఓలు, తహసీల్దార్లు పాల్గొన్నారు.

నంద్యాల

అంతరిక్షంపై ఆసక్తి పెంచుకోవాలి జిల్లా కలెక్టర్ రాజకుమారి గణియా

నంద్యాల : విద్యార్థులు అంతరిక్ష విజ్ఞానంపై ఆసక్తి పెంచుకొని, ప్రయోగాత్మక అభ్యసనం, పరిశోధనా దృక్పథంతో భవిష్యత్ శాస్త్రవేత్తలుగా ఎదగాలని జిల్లా కలెక్టర్ జి. రాజకుమారి పిలుపునిచ్చారు. బుధవారం నంద్యాలలోని ఎస్‌వీఆర్ ఇంజనీరింగ్ కళాశాలలో ఇస్రో శాస్త్రవేత్తల ఆధ్వర్యంలో నిర్వహించిన ప్రపంచ అంతరిక్ష వారోత్సవాలను ఆమె ప్రారంభించారు.ఇస్రో ఎంపిక చేసిన దక్షిణ భారతదేశంలోని ఆరు కార్యక్రమ వేదికల్లో నంద్యాలకు చోటు దక్కడం గర్వకారణమన్నారు. విద్యార్థులు తరగతి గదులకే పరిమితం కాకుండా ప్రయోగాలు, పరిశీలన, అన్వేషణ ద్వారా జ్ఞానాన్ని పెంపొందించుకోవాలని సూచించారు. అంతరిక్ష సాంకేతికతతో వాతావరణ అంచనాలు, తుఫాన్లు, వరదలపై ముందస్తు హెచ్చరికలతో పాటు వ్యవసాయంలో నేలతేమ, పంటల పరిస్థితిని తెలుసుకునేందుకు ఎంతో ఉపయోగపడుతోందన్నారు. డాక్టర్ ఏపీజే అబ్దుల్ కలాం ఆశయాలను స్ఫూర్తిగా తీసుకొని పెద్ద కలలు కని, వాటిని సాకారం చేసుకునేందుకు కృషి చేయాలని విద్యార్థులకు సూచించారు.కార్యక్రమంలో షార్ ఇస్రో డిప్యూటీ డైరెక్టర్ డాక్టర్ ఎస్. శంకరన్, సీనియర్ శాస్త్రవేత్త టి. శ్రీనివాసరెడ్డి, శాస్త్రవేత్త ఆదిత్య, కళాశాల అధ్యాపకులు, విద్యార్థులు పాల్గొన్నారు. అనంతరం సాంస్కృతిక ప్రదర్శనలు చేసిన విద్యార్థులకు కలెక్టర్ జ్ఞాపికలు అందజేశారు.

నంద్యాల

పింఛన్లు సకాలంలో అందేలా చర్యలు పోలూరులో మంత్రి ఫరూక్, కలెక్టర్ రాజకుమారి పంపిణీ

నంద్యాల: అర్హులైన ప్రతి లబ్ధిదారుడికి పింఛన్ సకాలంలో అందేలా చర్యలు తీసుకుంటున్నట్లు రాష్ట్ర న్యాయశాఖ, మైనార్టీ సంక్షేమ శాఖ మంత్రి ఎన్ఎండి ఫరూక్ తెలిపారు. నంద్యాల మండలం పోలూరు గ్రామంలో గురువారం నిర్వహించిన పింఛన్ పంపిణీ కార్యక్రమంలో మంత్రి ఫరూక్, జిల్లా కలెక్టర్ జి. రాజకుమారి పాల్గొన్నారు. ఈ సందర్భంగా లబ్ధిదారులతో మంత్రి, కలెక్టర్ మాట్లాడి వారి సమస్యలను తెలుసుకున్నారు. ప్రభుత్వం ప్రతి నెలా నిర్ణీత సమయంలో పింఛన్లు అందిస్తున్నట్లు మంత్రి తెలిపారు. జిల్లాలో 16 రకాల పింఛన్లను సుమారు 2.09 లక్షల మందికి రూ.92 కోట్ల మేర పంపిణీ చేస్తున్నట్లు కలెక్టర్ రాజకుమారి తెలిపారు. అర్హత కలిగిన వారికి నిబంధనల మేరకు పింఛన్లు మంజూరు చేయాలని అధికారులను ఆదేశించారు. కార్యక్రమంలో మార్కెట్ యార్డ్ చైర్మన్ గుంటుపల్లి హరిబాబు, తహసీల్దార్ శ్రీవాణి, ఎంపీడీవో సుగుణశ్రీ, అధికారులు, ప్రజాప్రతినిధులు, లబ్ధిదారులు పాల్గొన్నారు.

నంద్యాల

చిన్నారుల పోషణపై శ్రద్ధ పోలూరు అంగన్వాడీ కేంద్రాన్ని పరిశీలించిన కలెక్టర్

నంద్యాల: పోలూరు గ్రామంలోని అంగన్వాడీ కేంద్రం-1ను జిల్లా కలెక్టర్ జి. రాజకుమారి గురువారం సందర్శించారు. చిన్నారులతో ముచ్చటించి వారి ఆరోగ్యం, చదువు, ఆహారపు అలవాట్లను తెలుసుకున్నారు. కేంద్రంలో అందుతున్న పౌష్టికాహారం, ప్రీ-స్కూల్ విద్య, ఆరోగ్య సేవలను పరిశీలించారు. పోషకాహార లోపం ఉన్న చిన్నారులపై ప్రత్యేక శ్రద్ధ తీసుకోవాలని, కేంద్రంలో పరిశుభ్రత, మౌలిక వసతులు మెరుగ్గా ఉండేలా చర్యలు చేపట్టాలని సిబ్బందిని ఆదేశించారు.

నంద్యాల

రెవెన్యూ లక్ష్యాలపై దృష్టి బకాయిల వసూళ్లు వేగవంతం చేయాలి

నంద్యాల: 2026–27 ఆర్థిక సంవత్సరానికి వివిధ శాఖలకు నిర్దేశించిన రెవెన్యూ లక్ష్యాలను సమన్వయంతో సాధించాలని జిల్లా కలెక్టర్ రాజకుమారి గణియా అధికారులను ఆదేశించారు. కలెక్టరేట్‌లో రెవెన్యూ వసూళ్లపై నిర్వహించిన సమీక్ష సమావేశంలో శాఖల వారీగా లక్ష్యాలు, ఇప్పటివరకు సాధించిన ప్రగతి, బకాయిల వసూళ్ల పరిస్థితిని సమీక్షించారు.బకాయిల వసూళ్లకు ప్రత్యేక కార్యాచరణ రూపొందించి నిర్దేశిత లక్ష్యాలను సాధించాలని సూచించారు. శాఖల మధ్య సమన్వయంతో పనిచేస్తూ అంతరశాఖ సమస్యలను పరిష్కరించుకోవాలని తెలిపారు. ప్రస్తుత ఆర్థిక సంవత్సరం లక్ష్యాల సాధనకు స్పష్టమైన కార్యాచరణతో ముందుకు సాగాలని అధికారులను ఆదేశించారు.సమావేశంలో వాణిజ్య పన్నులు, పోలీస్, గనులు, ఎక్సైజ్, రిజిస్ట్రేషన్, రవాణా, విద్య, ట్రెజరీ, మున్సిపల్ తదితర శాఖల అధికారులు పాల్గొన్నారు.

నంద్యాల

ప్రజా అర్జీలకు సత్వర పరిష్కారం పెండింగ్‌ అర్జీలను వెంటనే పరిష్కరించాలి: జేసీ

నంద్యాల : పిజిఆర్ఎస్‌లో పెండింగ్‌లో ఉన్న ప్రజా అర్జీలను వెంటనే పరిశీలించి నిర్ణీత గడువులోగా పరిష్కరించాలని జాయింట్ కలెక్టర్ సూరజ్ ధనుంజయ్ అధికారులను ఆదేశించారు. అర్జీలు బియాండ్‌ ఎస్‌ఎల్‌ఏకు వెళ్లకుండా చర్యలు తీసుకోవాలని, ప్రతి దరఖాస్తుపై తీసుకున్న చర్యలను పిజిఆర్ఎస్‌లో సక్రమంగా నమోదు చేయాలని స్పష్టం చేశారు. కలెక్టరేట్‌లో నిర్వహించిన ప్రజా సమస్యల పరిష్కార వేదికలో ప్రజల నుంచి అర్జీలు స్వీకరించిన జేసీ, పిజిఆర్ఎస్ ద్వారా 299 దరఖాస్తులు అందినట్లు తెలిపారు. అధికారుల లాగిన్‌లలో పరిశీలించని 135 అర్జీలను వెంటనే ఓపెన్ చేసి పరిష్కరించాలని ఆదేశించారు. రీఓపెన్‌ అయిన 13 అర్జీలను కూడా త్వరితగతిన పరిష్కరించాలన్నారు. రెవెన్యూ క్లినిక్స్ ద్వారా 158 దరఖాస్తులు అందినట్లు తెలిపారు. భూ సమస్యలు, అడంగల్ సవరణలు, అసైన్డ్ భూములు, సర్వే తదితర అంశాలపై వచ్చిన అర్జీలను క్షేత్రస్థాయిలో పరిశీలించి, సంబంధిత శాఖల సమన్వయంతో సత్వరమే పరిష్కరించాలని జేసీ ఆదేశించారు. కార్యక్రమంలో డీఆర్వో రాము నాయక్, పిజిఆర్ఎస్ నోడల్ అధికారి ఉమామహేశ్వరి, ఆర్డీఓ విశ్వనాథ్, వివిధ శాఖల అధికారులు పాల్గొన్నారు.

నంద్యాల

దివ్యాంగులకు ప్రత్యేక గ్రీవెన్స్ ఏర్పాటు చేయాలి

నంద్యాల జిల్లాలో దివ్యాంగులకు ప్రత్యేక గ్రీవెన్స్(స్వాభిమాన్ ) ఏర్పాటు చేయాలని డిసేబుల్డ్ రైట్స్ వెల్ఫేర్ అసోసియేషన్ ఏపీ (DRWA/AP) వ్యవస్థాపక అధ్యక్షులు డిపి మస్తాన్ వలి డిమాండ్ చేశారు. కాకినాడ, తూర్పుగోదావరి,అనంతపురం, మరియు అనేక జిల్లాలలో త్రివ్యాంగులకు ప్రతి నెల మూడవ శుక్రవారం దివ్యాంగులకు ప్రత్యేక గ్రీవెన్స్ ( స్వాభిమాన్ ) కార్యక్రమం ఏర్పాటు చేసి దివ్యాంగుల సమస్యలను వివిధ ప్రభుత్వ శాఖల అధికారులతో సమస్యలను పరిష్కరిస్తున్నారని అదేవిధంగా నంద్యాల జిల్లాలో కూడా దివ్యాంగులకు ప్రత్యేక గ్రీవెన్స్ నిర్వహించాలని దీనివల్ల నంద్యాల జిల్లా వ్యాప్తంగా దూర ప్రాంతాల నుండి దివ్యాంగులు తమ సమస్యలను చెప్పుకోవడానికి వీలుంటుందని అలాగే నంద్యాల జిల్లాలో దివ్యాంగుల అసిస్టెంట్ డైరెక్టర్ (AD)కార్యాలయాలు ఉండాలని, దీనివలన దివ్యాంగులకు సుదూర ప్రాంతాల ప్రయాణం చేయకుండా సౌకర్యవంతంగా ఉంటుందన్నారు. దివ్యాంగులకు సంబంధించి ఏ సమస్య వచ్చినా వెంటనే పరిష్కారం అవుతాయని ప్రస్తుతం ఉమ్మడి జిల్లా ఎడి కార్యాలయము 72 కిలోమీటర్లు దూరంలో ఉందని దివ్యాంగులు అక్కడికి వెళ్లడానికి చాలా ఇబ్బందులు పడుతున్నారని అన్నారు. ఈ సమస్యను ప్రజా సమస్యల పరిష్కార వేదిక కార్యక్రమంలో జాయింట్ కలెక్టర్ సూరజ్ ధనుంజయ్ గారికి మెమరాండం అందించారు.ఈ కార్యక్రమంలో డిసేబుల్డ్ రైట్స్ వెల్ఫేర్ అసోసియేషన్ ఉపాధ్యక్షులు కిరణ్ కుమార్, సభ్యులు హుస్సేన్ వలి, వెంకటసుబ్బయ్య మరియు సాక్ష్యం సేవా కేంద్ర ప్రముక్ సంపత్ కుమార్ తదితరులు పాల్గొన్నారు.

నంద్యాల

నంద్యాలలో ఘనంగా ప్రపంచ పర్యాటక దినోత్సవం

నంద్యాల: నంద్యాల కలెక్టరేట్‌లోని PGRS హాలులో ప్రపంచ పర్యాటక దినోత్సవ వేడుకలు ఘనంగా ప్రారంభమయ్యాయి. జాయింట్ కలెక్టర్ సూరజ్ ధనంజయ్, జిల్లా పర్యాటక శాఖ అధికారి సునీల్ కన్నా, సోషల్ వెల్ఫేర్ అధికారి శివారెడ్డిలతో కలిసి ఈ వేడుకలను ప్రారంభించారు. ఈ సందర్భంగా జాయింట్ కలెక్టర్ మాట్లాడుతూ, పర్యాటక ప్రాంతాల చరిత్ర, విశిష్టతలను విద్యార్థులు సోషల్ మీడియా ద్వారా విస్తృతంగా ప్రచారం చేయాలని సూచించారు. పర్యాటక ప్రాంతాల్లో పరిశుభ్రత పాటిస్తూ ప్లాస్టిక్ రహిత వాతావరణాన్ని కల్పించడం ప్రతి ఒక్కరి బాధ్యతని, పర్యాటకం పెరిగితే స్థానికంగా ఉపాధి అవకాశాలు పెరుగుతాయని పేర్కొన్నారు. అనంతరం పోటీల్లో విజేతలైన విద్యార్థులకు బహుమతులు అందజేశారు.జిల్లా పర్యాటక శాఖ అధికారి సునీల్ కన్నా మాట్లాడుతూ.. నంద్యాల జిల్లాలో 28 ప్రసిద్ధ పర్యాటక ప్రాంతాలను గుర్తించామని తెలిపారు. పర్యాటకరంగ అభివృద్ధిలో భాగంగా ఇప్పటికే శ్రీశైలంలో అందుబాటులో ఉన్న రోప్‌వే సౌకర్యంతో పాటు యాగంటి, అహోబిలం క్షేత్రాలలోనూ కొత్తగా రోప్‌వే ప్రాజెక్టుల ఏర్పాటుకు ప్రభుత్వానికి ప్రతిపాదనలు పంపినట్లు వెల్లడించారు.ఈ కార్యక్రమంలో పలువురు అధికారులు, విద్యార్థులు పెద్ద ఎత్తున పాల్గొన్నారు.

నంద్యాల

నంద్యాలలో ఘనంగా ‘జిల్లా స్థాయి చిరుధాన్యాల మేళా’: కలెక్టర్ రాజ కుమారి గనియా

నంద్యాల : జిల్లా కలెక్టరేట్‌లోని పీజీఆర్‌ఎస్ ప్రాంగణంలో వ్యవసాయ శాఖ, రైతు సాధికార సంస్థ సంయుక్త ఆధ్వర్యంలో ‘శ్రీ అన్న’ జిల్లా స్థాయి చిరుధాన్యాల మేళా మరియు శిక్షణా కార్యక్రమం ఘనంగా జరిగింది.ఈ కార్యక్రమానికి ముఖ్య అతిథిగా హాజరైన జిల్లా కలెక్టర్ రాజ కుమారి గనియా మాట్లాడుతూ.. ఆరోగ్య పరిరక్షణకు, పోషకాహార లోపాన్ని నివారించేందుకు రైతులు చిరుధాన్యాల సాగుపై దృష్టి పెట్టాలని పిలుపునిచ్చారు. వరి, జొన్నల స్థానంలో 50% మేర చిరుధాన్యాలు సాగు చేయాలని, ప్రకృతి వ్యవసాయం, ‘ప్రీ-మాన్సూన్ డ్రై సోయింగ్’ (PMDS) విధానాలను సద్వినియోగం చేసుకోవాలని సూచించారు. గ్రామీణ నిరుద్యోగులకు ఫుడ్ ప్రాసెసింగ్ యూనిట్ల మంజూరుకు యంత్రాంగం సిద్ధంగా ఉందన్నారు.అనంతరం ప్రకృతి వ్యవసాయ ఉత్పత్తులు, చిరుధాన్యాలతో శరీర అవయవాల ప్రాముఖ్యతను వివరించే ప్రత్యేక స్టాళ్లను కలెక్టర్ పరిశీలించి, నిర్వాహకులను అభినందించారు. ఈ మేళాలో వ్యవసాయ అధికారులు, శాస్త్రవేత్తలు, మహిళా సంఘాల సభ్యులు మరియు రైతులు పాల్గొన్నారు

నంద్యాల

బయోచార్‌తో భూసార పరిరక్షణ: నంద్యాల జిల్లాలో పైలట్ ప్రాజెక్టు

పంట అవశేషాలను కాల్చకుండా ‘కోంటికి’ పరికరంతో బయోచార్‌గా మార్చి, భూసారాన్ని పెంచేలా బయోచార్ వినియోగాన్ని ప్రోత్సహించాలని నంద్యాల జిల్లా కలెక్టర్ జి. రాజకుమారి అధికారులను ఆదేశించారు. కలెక్టరేట్‌లో నిర్వహించిన సమావేశంలో ప్రయోగాత్మకంగా ఈ కార్యక్రమాన్ని చేపట్టేందుకు కార్యాచరణ ప్రణాళిక రూపొందించాలని తెలిపారు.ప్రాజెక్టు అమలుకు సంబంధించిన ప్రతిపాదనలను వారం రోజుల్లో సమర్పించాలని ఫోర్ రెడ్డి ఫౌండేషన్, క్లైమిత్ర సంస్థలను కోరారు. మూడు నుంచి ఆరు నెలల్లో ఫలితాలను శాస్త్రీయంగా అంచనా వేస్తామన్నారు. ఈ సమావేశంలో పలు శాఖల అధికారులు, సంస్థ ప్రతినిధులు పాల్గొన్నారు