స్పందన లేని ప్రజావాణి ఎందుకు? – అధికారుల నిర్లక్ష్యంపై PRG ఫౌండేషన్ అధ్యక్షులు రవీందర్ గుప్త ఆగ్రహం
యాచారం, జూలై 20:
ప్రజల సమస్యలను నేరుగా ప్రభుత్వ దృష్టికి తీసుకెళ్లి పరిష్కారం కల్పించేందుకు రాష్ట్ర ప్రభుత్వం ప్రతిష్టాత్మకంగా నిర్వహిస్తున్న ప్రజావాణి కార్యక్రమం అధికారుల నిర్లక్ష్యంతో లక్ష్యాన్ని కోల్పోతోందని PRG ఫౌండేషన్ అధ్యక్షులు రవీందర్ గుప్త విమర్శించారు. ప్రజావాణిలో సమర్పించిన వినతిపత్రాలకు నెలలు గడుస్తున్నా స్పందన లేకపోవడం బాధాకరమని, ప్రజల సమస్యలు కాగితాలకే పరిమితమవుతున్నాయని ఆయన ఆవేదన వ్యక్తం చేశారు.
ఈ సందర్భంగా ఆయన మాట్లాడుతూ, తెలంగాణ రాష్ట్ర ముఖ్యమంత్రి రేవంత్ రెడ్డి ప్రజావాణిలో వచ్చే ప్రతి వినతిపత్రాన్ని సంబంధిత అధికారులు వెంటనే పరిశీలించి సమస్యలను పరిష్కరించాలని స్పష్టమైన ఆదేశాలు ఇచ్చినా, జిల్లా స్థాయి అధికారులు మాత్రం వాటిని అమలు చేయడంలో విఫలమవుతున్నారని ఆరోపించారు. ప్రజావాణి కార్యక్రమంపై ప్రజల్లో నమ్మకం పెంచాల్సిన అధికారులు నిర్లక్ష్య ధోరణి అవలంబించడం వల్ల ప్రజలు తీవ్ర ఇబ్బందులు పడుతున్నారని అన్నారు.
సుమారు ఒక సంవత్సరం క్రితం రంగారెడ్డి జిల్లా కలెక్టర్కు ప్రజావాణిలో వినతిపత్రం అందజేసి, యాచారం మండలం మేడిపల్లి జడ్పీహెచ్ఎస్ (ZPHS) ప్రభుత్వ పాఠశాల నుంచి డిప్యుటేషన్పై వెళ్లిన ఉపాధ్యాయులను తిరిగి మేడిపల్లికి రప్పించేలా చర్యలు తీసుకోవాలని కోరినప్పటికీ ఇప్పటి వరకు ఎలాంటి స్పందన లేదన్నారు. ఉపాధ్యాయుల కొరత కారణంగా విద్యార్థుల చదువులు దెబ్బతింటున్నా సంబంధిత అధికారులు పట్టించుకోవడం లేదని ఆవేదన వ్యక్తం చేశారు.
అదేవిధంగా, ఇబ్రహీంపట్నం ప్రజావాణిలో రెండుసార్లు, రంగారెడ్డి జిల్లా కలెక్టర్ ప్రజావాణిలో ఒకసారి, కల్వకుర్తి ఆర్డీవో కార్యాలయంలో మరోసారి వినతిపత్రాలు సమర్పించి గ్రామీణ ప్రాంతాలకు రద్దు చేసిన ఆర్టీసీ బస్సులను తిరిగి ప్రారంభించాలని కోరినా ఎలాంటి చర్యలు తీసుకోలేదని తెలిపారు. ప్రజల రవాణా అవసరాలు, విద్యార్థులు, ఉద్యోగులు, వృద్ధులు ఎదుర్కొంటున్న ఇబ్బందులను వివరించినప్పటికీ అధికారులు స్పందించకపోవడం విచారకరమన్నారు.
ముఖ్యంగా రద్దు చేసిన బస్సుల కారణంగా గ్రామీణ ప్రజలు ప్రతి రోజు తీవ్ర ఇబ్బందులు ఎదుర్కొంటున్నారని పేర్కొన్నారు. విద్యార్థులు కళాశాలలకు, ఉద్యోగులు కార్యాలయాలకు, రోగులు ఆసుపత్రులకు వెళ్లేందుకు సరైన రవాణా సౌకర్యం లేక ప్రైవేటు వాహనాలపై ఆధారపడాల్సి వస్తోందన్నారు. దీంతో అదనపు ఆర్థిక భారం పడటంతో పాటు సమయం కూడా వృథా అవుతోందని తెలిపారు.
ప్రత్యేకంగా మేడిపల్లి–మాల్, మేడిపల్లి–హైదరాబాద్, మాల్ నైట్ హాల్ట్, మేడిపల్లి నైట్ హాల్ట్, అజిలాపురం, కొత్తపల్లి–మొండిగౌరెల్లి నైట్ హాల్ట్ బస్సులను వెంటనే పునఃప్రారంభించాలని ఆయన డిమాండ్ చేశారు. ఈ బస్సులు పునరుద్ధరిస్తే వేలాది మంది గ్రామీణ ప్రజలకు ప్రయోజనం చేకూరుతుందని చెప్పారు.
ప్రజావాణిలో ప్రజలు సమర్పిస్తున్న వినతిపత్రాలపై సంబంధిత శాఖల అధికారులు కాలపరిమితిలో చర్యలు తీసుకుని, పరిష్కార వివరాలను దరఖాస్తుదారులకు తెలియజేసే విధానాన్ని కచ్చితంగా అమలు చేయాలని ఆయన కోరారు. లేకపోతే ప్రజావాణి కార్యక్రమంపై ప్రజల్లో విశ్వాసం దెబ్బతింటుందని హెచ్చరించారు.
ఇప్పటికైనా రంగారెడ్డి జిల్లా కలెక్టర్, సంబంధిత ఆర్టీసీ అధికారులు, విద్యాశాఖ అధికారులు స్పందించి పెండింగ్లో ఉన్న వినతిపత్రాలను పరిశీలించి, ఉపాధ్యాయుల సమస్యతో పాటు రద్దు చేసిన బస్సుల పునరుద్ధరణపై తక్షణ చర్యలు తీసుకోవాలని PRG ఫౌండేషన్ అధ్యక్షులు రవీందర్ గుప్త ఒక ప్రకటనలో విజ్ఞప్తి చేశారు. ప్రజల సమస్యలు పరిష్కరించడమే ప్రజావాణి ముఖ్య ఉద్దేశమైతే, ఆ లక్ష్యాన్ని అధికారులు కార్యరూపంలో చూపించాలని ఆయన కోరారు.
