మధిర/ఖమ్మం
మధిర 100 పడకల ప్రభుత్వ ఆసుపత్రిలో రక్త పరీక్షల కోసం వచ్చే రోగులు తీవ్ర ఇబ్బందులు ఎదుర్కొంటున్నారని బీఆర్ఎస్ మధిర టౌన్ కమిటీ ఆరోపించింది. ఆసుపత్రిలో అవసరమైన రక్త పరీక్షల యంత్రాలు అందుబాటులో లేకపోవడంతో రోగుల నుంచి సేకరించిన రక్త నమూనాలను ఖమ్మం ప్రభుత్వ ఆసుపత్రికి పంపిస్తున్నారని బీఆర్ఎస్ నాయకులు తెలిపారు. అక్కడ పరీక్షలు పూర్తయిన అనంతరం రిపోర్టులు తిరిగి మధిరకు చేరే వరకు రోగులు వేచి చూడాల్సి వస్తోందని పేర్కొన్నారు.
రెండు రోజుల వరకు రిపోర్టుల కోసం ఎదురుచూపులు
మధిర ప్రభుత్వ ఆసుపత్రిలో రక్త నమూనాలు తీసుకున్నప్పటికీ పరీక్షలు స్థానికంగానే నిర్వహించే సౌకర్యం లేకపోవడంతో ఖమ్మం పంపించాల్సి వస్తోందని బీఆర్ఎస్ నాయకులు తెలిపారు. దీంతో కొన్ని సందర్భాల్లో రక్త పరీక్షల రిపోర్టులు రావడానికి రెండు రోజుల వరకు సమయం పడుతోందని, అత్యవసర వైద్యం అవసరమైన పేద రోగులు తీవ్ర ఇబ్బందులు ఎదుర్కొంటున్నారని ఆవేదన వ్యక్తం చేశారు. వైద్యం కోసం ప్రభుత్వ ఆసుపత్రికి వచ్చే పేదలకు త్వరగా పరీక్షలు నిర్వహించి, సకాలంలో రిపోర్టులు అందించాల్సిన అవసరం ఉందన్నారు.
ప్రైవేట్ ఆసుపత్రుల్లో గంటల్లోనే.. ప్రభుత్వ ఆసుపత్రిలో మాత్రం ఆలస్యం ఎందుకు?
మధిరలోని ప్రైవేట్ ఆసుపత్రుల్లో రక్త పరీక్షలు కొన్ని గంటల్లోనే పూర్తవుతున్నప్పుడు, ప్రభుత్వ ఆసుపత్రిలో మాత్రం రక్త నమూనాలను ఖమ్మం పంపించి రిపోర్టుల కోసం రెండు రోజుల వరకు వేచి చూడాల్సిన పరిస్థితి ఎందుకు ఏర్పడిందని బీఆర్ఎస్ మధిర టౌన్ కమిటీ ప్రశ్నించింది. ఈ పరిస్థితి వల్ల ప్రజలు ప్రైవేట్ ఆసుపత్రులను ఆశ్రయించాల్సి వస్తోందని, ప్రభుత్వ ఆసుపత్రిలోనే అవసరమైన రక్త పరీక్షల సౌకర్యాలు కల్పిస్తే పేద ప్రజలకు సమయం, డబ్బు రెండూ ఆదా అవుతాయని పేర్కొంది.
భట్టి విక్రమార్క దృష్టి సారించాలి
ఉపముఖ్యమంత్రి భట్టి విక్రమార్క ప్రాతినిధ్యం వహిస్తున్న మధిర నియోజకవర్గంలోనే 100 పడకల ప్రభుత్వ ఆసుపత్రిలో ప్రాథమిక రక్త పరీక్షలకు కూడా ఖమ్మం వెళ్లాల్సిన పరిస్థితి నెలకొనడం బాధాకరమని బీఆర్ఎస్ నాయకులు విమర్శించారు. 100 పడకల ఆసుపత్రి అంటే కేవలం భవనం మాత్రమే కాదని, పూర్తిస్థాయి ల్యాబ్, అవసరమైన రక్త పరీక్షల యంత్రాలు, సరిపడా సిబ్బంది, టెక్నీషియన్లు అందుబాటులో ఉండాలని డిమాండ్ చేశారు.
15 రోజుల్లో యంత్రాలు ఏర్పాటు చేయాలి
మధిర ప్రభుత్వ ఆసుపత్రిలో అవసరమైన రక్త పరీక్షల యంత్రాలను 15 రోజుల్లోగా ఏర్పాటు చేయాలని బీఆర్ఎస్ మధిర టౌన్ కమిటీ ప్రభుత్వాన్ని డిమాండ్ చేసింది. గడువులోగా యంత్రాలు ఏర్పాటు చేయకపోతే ప్రజల కోసం బీఆర్ఎస్ ఆధ్వర్యంలో నిరాహార దీక్ష చేపడతామని స్పష్టం చేసింది. ప్రభుత్వం వెంటనే స్పందించి మధిరలోనే రక్త పరీక్షలు నిర్వహించి, త్వరితగతిన రిపోర్టులు అందేలా చర్యలు తీసుకోవాలని కోరింది.
