ధూమపానం చేసేవారు రోజుకొక నిమ్మకాయ తినడం మంచిది

మానవ శరీరంలో రోగనిరోధక శక్తి, కణాల పునరుద్ధరణ, రక్తనాళాల ఆరోగ్యానికి విటమిన్‌-సి కీలకం. ధూమపానం చేసేవారిలో దీని అవసరం మరింత పెరుగుతుంది. పొగ ద్వారా శరీరంలోకి చేరే విషపూరిత రసాయనాలు, ఫ్రీ రాడికల్స్ ఊపిరితిత్తులు, రక్తనాళాలపై ఆక్సీకరణ ఒత్తిడిని పెంచుతాయి. వీటిని ఎదుర్కొనే క్రమంలో శరీరంలోని విటమిన్‌-సి ఎక్కువగా వినియోగమవుతుంది. ఆరోగ్య మార్గదర్శకాల ప్రకారం ధూమపానం చేసేవారికి సాధారణ వ్యక్తుల కంటే రోజుకు సుమారు 35 మి.గ్రా. అదనపు విటమిన్‌-సి అవసరం. అందుకే నిమ్మ, బత్తాయి, నారింజ వంటి సిట్రస్ పండ్లను ఆహారంలో చేర్చుకోవడం ప్రయోజనకరం. రోజూ ఒక నిమ్మకాయను ఆహారంలో భాగంగా తీసుకోవచ్చు. ఉసిరి, జామ, బొప్పాయి, కివీ, పైనాపిల్ కూడా విటమిన్‌-సి, యాంటీఆక్సిడెంట్లకు మంచి సహజ వనరులు. మాత్రల కంటే పండ్ల ద్వారా విటమిన్‌-సి పొందడం వల్ల పీచు, ఇతర పోషకాలు కూడా లభిస్తాయి. అయితే నిమ్మకాయ లేదా విటమిన్‌-సి తీసుకోవడం ధూమపానం వల్ల కలిగే నష్టాన్ని పూర్తిగా నివారించదు. గుండె జబ్బులు, ఊపిరితిత్తుల వ్యాధులు, క్యాన్సర్ ప్రమాదాన్ని తగ్గించేందుకు ధూమపానాన్ని పూర్తిగా మానేయడమే అత్యుత్తమ మార్గం.