రూ.1.25 కోట్లతో ఐపిహెచ్ఎల్ ల్యాబ్ ఏర్పాటు: ఎమ్మెల్యే నల్లమిల్లి
అనపర్తి, సెప్టెంబరు 12 (పున్నమి ప్రతినిధి): ప్రభుత్వ ఆసుపత్రుల్లో కార్పొరేట్, ప్రైవేట్ ఆసుపత్రులకు దీటుగా నాణ్యమైన వైద్య సేవలు అందించడమే ప్రభుత్వ లక్ష్యమని అనపర్తి ఎమ్మెల్యే నల్లమిల్లి రామకృష్ణారెడ్డి అన్నారు. అనపర్తి ఏరియా ఆసుపత్రిలో **రూ.1.25 కోట్ల వ్యయంతో ఏర్పాటు చేసిన ఇంటిగ్రేటెడ్ పబ్లిక్ హెల్త్ లాబొరేటరీ (ఐపిహెచ్ఎల్)**ను ఆయన ప్రారంభించారు.
ముఖ్యమంత్రి చంద్రబాబు నాయుడు, కేంద్ర ఆరోగ్య శాఖ మంత్రి జేపీ నడ్డా, రాష్ట్ర వైద్య ఆరోగ్య శాఖ మంత్రి సత్యకుమార్ యాదవ్ విజయవాడ నుంచి వర్చువల్గా ల్యాబ్ను ప్రారంభించగా, అనపర్తిలో ఎమ్మెల్యే నల్లమిల్లి రామకృష్ణారెడ్డి, టీడీపీ నియోజకవర్గ ఇన్చార్జ్ నల్లమిల్లి మనోజ్రెడ్డి, ఆర్డీవో శివరాముడు, డీఎంహెచ్వో కోమల తదితరులు పాల్గొన్నారు.
ఈ సందర్భంగా ఎమ్మెల్యే మాట్లాడుతూ ఐపిహెచ్ఎల్లో సుమారు 134 రకాల వైద్య పరీక్షలను ఉచితంగా నిర్వహించే అవకాశం ఉందన్నారు. రక్త పరీక్షలకు సంబంధించి అధునాతన పరికరాలను అందుబాటులోకి తీసుకొచ్చామని తెలిపారు. ఈ ల్యాబ్తో పేద, మధ్యతరగతి ప్రజలకు వైద్య పరీక్షల ఖర్చు తగ్గడంతో పాటు సమయం కూడా ఆదా అవుతుందని పేర్కొన్నారు.
తూర్పుగోదావరి జిల్లాలోని కమ్యూనిటీ హెల్త్ సెంటర్లను ఈ ల్యాబ్కు అనుసంధానం చేసినట్లు ఎమ్మెల్యే తెలిపారు. ఆయా కేంద్రాల నుంచి సేకరించిన నమూనాలను అనపర్తి ల్యాబ్కు తరలించి పరీక్షలు నిర్వహించి, సంబంధిత కేంద్రాలకు నివేదికలు పంపించే విధానం ఉంటుందని వివరించారు. జిల్లాకు ఈ ఐపిహెచ్ఎల్ ల్యాబ్ ఒక ముఖ్యమైన వైద్య వసతిగా నిలుస్తుందని అన్నారు.
ఇటీవల బ్లడ్ స్టోరేజ్ యూనిట్ను కూడా ఏర్పాటు చేశామని, నిర్మాణంలో ఉన్న 100 పడకల ఆసుపత్రి భవన సముదాయం త్వరలో అందుబాటులోకి వస్తే ప్రజలకు మరింత మెరుగైన వైద్య సేవలు అందుతాయని తెలిపారు.
ఐపిహెచ్ఎల్ ల్యాబ్ ఏర్పాటుకు సహకరించిన ముఖ్యమంత్రి, వైద్య ఆరోగ్య శాఖ మంత్రి, ఉన్నతాధికారులతో పాటు ఆసుపత్రి సూపరింటెండెంట్ డాక్టర్ పద్మశ్రీ, డీసీహెచ్ఎస్, డీఎంఅండ్హెచ్వో, మాజీ సూపరింటెండెంట్ డాక్టర్ రామగుర్రెడ్డి, వైద్యులు, వైద్యేతర సిబ్బంది, ల్యాబ్ సమన్వయకర్తలకు ఎమ్మెల్యే నల్లమిల్లి రామకృష్ణారెడ్డి కృతజ్ఞతలు తెలిపారు.
కార్యక్రమంలో అనపర్తి నియోజకవర్గ కూటమి నాయకులు, అనపర్తి మండలం, టౌన్ కూటమి నాయకులు, కార్యకర్తలు, వైద్యులు, వైద్యేతర సిబ్బంది, అధికారులు పాల్గొన్నారు.
