అక్రిడేషన్ ఉంటేనే విలేకరులా? అక్రిడేషన్ కార్డు… పాత్రికేయ హోదానా? లేక పరిపాలనా గుర్తింపా?

అక్రిడేషన్ ఉంటేనే విలేకరులా? అక్రిడేషన్ కార్డు… పాత్రికేయ హోదానా? లేక పరిపాలనా గుర్తింప? పున్నమి ప్రతినిధి ఖమ్మం జిల్లా బ్యూరో గుగులోత్ భావుసింగ్ నాయక్ ప్రజల్లో అవగాహన కల్పించాల్సిన అవసరం – పాత్రికేయ వృత్తిపై అపోహలు వీడాలంటున్న మీడియా వర్గాలు “అక్రిడేషన్ కార్డు ఉన్నవారే విలేకరులు… లేనివారు విలేకరులు కారు” అనే అభిప్రాయం ఇటీవల కొన్ని వర్గాల్లో వినిపిస్తోంది. అయితే మీడియా రంగానికి చెందిన పలువురు సీనియర్ పాత్రికేయులు, పాత్రికేయ సంఘాలు ఈ అభిప్రాయం సరైనది కాదని స్పష్టం చేస్తున్నాయి. వారి అభిప్రాయం ప్రకారం అక్రిడేషన్ కార్డు అనేది ప్రభుత్వం కొన్ని అర్హతల ఆధారంగా జారీ చేసే అధికారిక గుర్తింపు మాత్రమే. అది పాత్రికేయ వృత్తికి లైసెన్స్ కాదు; పాత్రికేయుడిని నిర్వచించే ఏకైక ప్రమాణం కూడా కాదు. అక్రిడేషన్ కార్డు ఉన్న పాత్రికేయుడు ప్రభుత్వం నిర్దేశించిన అర్హతలు పూర్తి చేసిన వారికి అక్రిడేషన్ మంజూరు అవుతుంది. ప్రభుత్వ కార్యాలయాలు, అధికారిక కార్యక్రమాల్లో కొన్ని పరిపాలనా సౌకర్యాలు లభించవచ్చు. ప్రభుత్వ గుర్తింపు పొందిన మీడియా ప్రతినిధిగా వ్యవహరించే అవకాశం ఉంటుంది. అక్రిడేషన్ కార్డు లేని పాత్రికేయుడు నమోదు చేయబడిన పత్రిక, టీవీ, డిజిటల్ లేదా ఇతర వార్తా సంస్థ కోసం వార్తలు సేకరించి ప్రచురించవచ్చు. ప్రజా సమస్యలను వెలుగులోకి తీసుకురావడం, వార్తలు రాయడం, ప్రజల గొంతుకగా నిలవడం వంటి బాధ్యతలు నిర్వర్తించవచ్చు. అక్రిడేషన్ లేకపోవడం వల్ల మాత్రమే అతను పాత్రికేయుడు కాదని చెప్పడం సరైన అభిప్రాయం కాదని మీడియా వర్గాలు పేర్కొంటున్నాయి. ప్రజా సేవే పాత్రికేయ ధర్మం పాత్రికేయుడి ప్రధాన బాధ్యత ప్రజా సమస్యలను వెలుగులోకి తేవడం, ప్రజలకు వాస్తవ సమాచారాన్ని అందించడం, అధికారులను ప్రజా సమస్యలపై ప్రశ్నించడం. ఈ బాధ్యతలు అక్రిడేషన్ కార్డుతో కాకుండా వృత్తి నిబద్ధతతో ముడిపడి ఉంటాయని పలువురు సీనియర్ పాత్రికేయులు అభిప్రాయపడుతున్నారు. అధికారులు, ప్రజాప్రతినిధులు తెలుసుకోవాల్సింది అక్రిడేషన్ కార్డు ఉన్నా, లేకపోయినా చట్టబద్ధంగా పనిచేస్తున్న మీడియా ప్రతినిధులను గౌరవంగా చూడడం, అవసరమైన సమాచారాన్ని నిబంధనల మేరకు అందించడం ప్రజాస్వామ్య వ్యవస్థలో భాగం. అదే సమయంలో ప్రతి పాత్రికేయుడు కూడా వాస్తవాలు, నైతిక విలువలు, చట్టపరమైన పరిమితులను పాటిస్తూ బాధ్యతాయుతంగా వ్యవహరించాల్సిన అవసరం ఉంది.