వర్షపు నీటికి దారి లేక.. రాకపోకలకు ఇక్కట్లు
అనకాపల్లి జిల్లా, సెప్టెంబర్ 5 (పున్నమి న్యూస్ రిపోర్టర్ ఆనంద్):
ఎస్. రాయవరం మండలం దార్లపూడి గ్రామంలో వర్షం పడితే రహదారుల పరిస్థితి ఆందోళనకరంగా మారుతోంది. వర్షపు నీరు వెళ్లేందుకు సరైన డ్రైనేజీ వ్యవస్థ లేకపోవడంతో నీరంతా రోడ్లపైనే నిలిచిపోతోంది. దీంతో రహదారులు చెరువులను తలపిస్తున్నాయి.
కొద్దిసేపు వర్షం కురిసినా రోడ్లపై నీరు నిలిచి పాదచారులు, ద్విచక్ర వాహనదారులు తీవ్ర ఇబ్బందులు ఎదుర్కొంటున్నారు. ముఖ్యంగా వర్షం సమయంలో రహదారిపై ఎక్కడ గుంత ఉందో, ఎక్కడ నీరు లోతుగా ఉందో తెలియని పరిస్థితి నెలకొంటోంది. దీంతో వాహనదారులు అప్రమత్తంగా రాకపోకలు సాగించాల్సి వస్తోంది.
వర్షపు నీటికి దారి లేక.. ప్రజలకు నడిచే దారి లేక! అన్నట్టుగా పరిస్థితి మారుతోంది. నీరు ఎక్కువసేపు నిలిచి ఉండటంతో రోడ్డు పరిసరాల్లో పారిశుధ్య సమస్యలు తలెత్తే అవకాశం ఉందని గ్రామస్థులు ఆందోళన వ్యక్తం చేస్తున్నారు.
ప్రజలకు ఇబ్బందులు కలగకుండా వర్షపు నీరు సులభంగా బయటకు వెళ్లేలా డ్రైనేజీ వ్యవస్థను మెరుగుపరచాల్సిన అవసరం ఉంది. దార్లపూడి గ్రామంలోని పరిస్థితిని సంబంధిత అధికారులు క్షేత్రస్థాయిలో పరిశీలించి, సమస్యకు తగిన పరిష్కార మార్గాలను చేపట్టాలని గ్రామస్థులు కోరుతున్నారు.
రోడ్డు రాకపోకలకు ఉపయోగపడాలి.. వర్షం పడితే చెరువుగా మారకూడదు. ప్రజల ఇబ్బందులను దృష్టిలో ఉంచుకుని అధికారులు స్పందించి అవసరమైన చర్యలు తీసుకోవాలని స్థానికులు విజ్ఞప్తి చేస్తున్నారు.
