Contact Us Latest News
నిజమైన వార్త. వేగమైన సమాచారం. ఆంధ్రప్రదేశ్ • తెలంగాణ • జాతీయం
Author Panel

Tag: అనకాపల్లి జిల్లా

అనకాపల్లి

యలమంచిలిలో మహిళ అదృశ్యం.. ఆచూకీ కోసం పోలీసుల విజ్ఞప్తి

యలమంచిలి పట్టణంలో మహిళ అదృశ్యమైన ఘటన కలకలం రేపింది. కోర్టు పేట, భాష్యం స్కూల్ సమీపంలో నివాసం ఉంటున్న ఉప్పులూరి సునీత (36) ఈ నెల 12వ తేదీ ఉదయం ఇంటి నుంచి వెళ్లి తిరిగి రాలేదు. భర్త ఉప్పులూరు కిరణ్ కుమార్ మధ్యాహ్నం 1.20 గంటలకు ఇంటికి వచ్చి చూడగా ఆమె కనిపించలేదు. దీంతో రైల్వే స్టేషన్, ఆర్టీసీ కాంప్లెక్స్, పెంజేరువు ప్రాంతాలతో పాటు ఇతర తెలిసిన ప్రదేశాల్లో వెతికినా ఆచూకీ లభించలేదు. తల్లి, అన్నయ్య, బంధువులను విచారించినప్పటికీ ఆమె వారి వద్దకు వెళ్లినట్లు తెలియలేదు. దీంతో భర్త పోలీసులకు ఫిర్యాదు చేయగా, యలమంచిలి పట్టణ పోలీసులు మహిళ అదృశ్యమైనట్లు కేసు నమోదు చేశారు.అదృశ్యమైన సునీత తెలుపు రంగు కలిగి, సుమారు 5 అడుగుల 6 అంగుళాల ఎత్తు ఉంటుందని, చివరిగా బ్లూ, వైట్ రంగు చుడిదార్ ధరించిందని పోలీసులు తెలిపారు. మహిళ ఆచూకీ తెలిసినవారు లేదా ఎక్కడైనా కనిపిస్తే వెంటనే యలమంచిలి పట్టణ పోలీస్ స్టేషన్‌కు 9440796103 నంబర్‌కు సమాచారం అందించాలని ఎస్ఐ సావిత్రి ప్రజలకు విజ్ఞప్తి చేశారు.

అనకాపల్లి

పద్మనాభరాజుపేటలో వైభవంగా దీపాలంకరణ.. భక్తులను ఆకట్టుకున్న ఆలయ సౌందర్యం!

అనకాపల్లి జిల్లా యలమంచిలి మండలం పద్మనాభరాజుపేట గ్రామంలో ఆధ్యాత్మిక శోభ వెల్లివిరిసింది. గ్రామంలోని శ్రీ నూకాలమ్మ, శ్రీ దుర్గమ్మ, శ్రీ శివపార్వతుల ఆలయాలను రంగురంగుల విద్యుత్ దీపాలతో ప్రత్యేకంగా అలంకరించారు. దీపాల కాంతులతో ఆలయ ప్రాంగణం కన్నుల పండువగా మారి భక్తులను విశేషంగా ఆకట్టుకుంది.ఆలయాల అందాలను వీక్షించేందుకు గ్రామస్తులు, భక్తులు పెద్ద సంఖ్యలో తరలివచ్చి అమ్మవార్లను, శివపార్వతులను దర్శించుకుని ప్రత్యేక పూజలు నిర్వహించారు. ఈ సందర్భంగా గ్రామంలో భక్తి భావం వెల్లివిరిసింది. ఈ కార్యక్రమంపై టీడీపీ యలమంచిలి మండల ఆర్గనైజింగ్ సెక్రటరీ యడ్ల చినబాబు మాట్లాడుతూ.. ఇటువంటి ఆధ్యాత్మిక, సంప్రదాయ కార్యక్రమాలకు తమ సహాయ సహకారాలు ఎల్లప్పుడూ ఉంటాయని తెలిపారు. ఆలయాల దీపాలంకరణ గ్రామానికి ప్రత్యేక ఆకర్షణగా నిలిచింది.

అనకాపల్లి

ఏటికొప్పాకలో కూటమి విజయోత్సవ సంబరాలు.. విజేతలకు ఘన సన్మానం!

ప్రజల ఆదరణే మా విజయానికి పునాది.. గెలుపును గ్రామ ప్రజలకు అంకితం చేసిన నాయకులు ఏటికొప్పాక గ్రామంలో జడ్పీటీసీ, ఎంపీటీసీ ఎన్నికల్లో ఘన విజయం సాధించిన కూటమి అభ్యర్థులను ఆదివారం సాయంత్రం గ్రామ ప్రజలు, కూటమి నాయకులు, కార్యకర్తలు ఘనంగా సన్మానించారు. జడ్పీటీసీగా విజయం సాధించిన రావి చలపతి, ఎంపీటీసీ-1గా గెలుపొందిన రాయి నాగేశ్వరరావు, ఎంపీటీసీ-2గా విజయం సాధించిన అన్నం స్వరాజ్యరావులకు పూలమాలలు వేసి శాలువాలతో సత్కరించారు. అనంతరం కేక్ కట్ చేసి విజయోత్సవ సంబరాలు నిర్వహించారు.ఈ సందర్భంగా విజేతలు మాట్లాడుతూ.. ఈ విజయం తమ వ్యక్తిగత విజయం కాదని, ఏటికొప్పాక గ్రామ ప్రజలు, కూటమి నాయకులు, కార్యకర్తలు అందించిన అపారమైన ఆదరణ, నమ్మకం, కష్టానికి దక్కిన ఫలితమని భావోద్వేగంగా పేర్కొన్నారు. తమపై ఉంచిన నమ్మకాన్ని నిలబెట్టుకుంటూ గ్రామ అభివృద్ధికి నిరంతరం కృషి చేస్తామని, ప్రజల సమస్యల పరిష్కారానికి అందుబాటులో ఉంటామని హామీ ఇచ్చారు. ఈ విజయాన్ని గ్రామ ప్రజలకు, కూటమి శ్రేణులకు అంకితం చేస్తున్నట్లు తెలిపారు. ఈ కార్యక్రమం గ్రామంలో పండుగ వాతావరణాన్ని తలపించింది. గ్రామ ప్రజలు, కూటమి నాయకులు, కార్యకర్తలు పెద్ద సంఖ్యలో పాల్గొని విజేతలకు శుభాకాంక్షలు తెలియజేస్తూ ఆనందోత్సాహాల మధ్య విజయోత్సవాలను ఘనంగా నిర్వహించారు.

అనకాపల్లి

ఏటికొప్పాకలో కూటమి విజయకేతనం.. జడ్పీటీసీతో పాటు రెండు ఎంపీటీసీ స్థానాలు సొంతం!

ఏటికొప్పాక గ్రామంలో జరిగిన జడ్పీటీసీ, ఎంపీటీసీ ఎన్నికల్లో ఎన్డీఏ కూటమి అభ్యర్థులు ఘన విజయం సాధించి విజయకేతనం ఎగురవేశారు. ఎంపీటీసీ-1 స్థానంలో టీడీపీ అభ్యర్థి రాయి నాగేశ్వరరావు 19 ఓట్ల మెజారిటీతో, ఎంపీటీసీ-2 స్థానంలో జనసేన అభ్యర్థి అన్నం స్వరాజరావు 140 ఓట్ల మెజారిటీతో విజయం సాధించారు. ఎంపీపీ పదవికి టీడీపీ తరఫున పోటీ చేసిన ఇత్తంశెట్టి శ్రీలక్ష్మి 843 ఓట్ల భారీ మెజారిటీతో విజయం సాధించారు. ఇక జడ్పీటీసీ స్థానంలో జనసేన అభ్యర్థి రావి చలపతి 8,666 ఓట్ల భారీ మెజారిటీతో అఖండ విజయాన్ని నమోదు చేశారు. విజయం అనంతరం గెలుపొందిన అభ్యర్థులు గ్రామ ప్రజలను కలుసుకుని కృతజ్ఞతలు తెలియజేశారు. ఈ సందర్భంగా గ్రామదేవత శ్రీ బండిమాంబ అమ్మవారిని దర్శించుకుని ఆశీస్సులు పొందారు. ప్రజలు తమపై ఉంచిన నమ్మకాన్ని నిలబెట్టుకుంటూ గ్రామ అభివృద్ధికి నిరంతరం కృషి చేస్తామని, ప్రజా సమస్యల పరిష్కారానికి ముందుండి పనిచేస్తామని హామీ ఇచ్చారు.కూటమి అభ్యర్థుల విజయంతో ఏటికొప్పాకలో కార్యకర్తలు, అభిమానులు సంబరాలు చేసుకున్నారు.

అనకాపల్లి

అచ్యుతాపురం జెడ్పీటీసీపై టీడీపీ విజయదుందుభి.. 7,337 ఓట్ల భారీ మెజార్టీతో పీలా హైమవతి తులసీరామ్ ఘన విజయం!

అచ్యుతాపురం జెడ్పీటీసీ ఎన్నికల్లో తెలుగుదేశం పార్టీ ఘన విజయం సాధించింది. టీడీపీ అభ్యర్థి పీలా హైమవతి తులసీరామ్ తన ప్రత్యర్థిపై 7,337 ఓట్ల భారీ మెజార్టీతో విజయకేతనం ఎగురవేశారు. ఈ భారీ విజయం మండల రాజకీయాల్లో చర్చనీయాంశంగా మారింది.ఫలితాలు వెలువడగానే టీడీపీ శ్రేణుల్లో సంబరాలు అంబరాన్నంటాయి. నాయకులు, కార్యకర్తలు, అభిమానులు హర్షం వ్యక్తం చేస్తూ విజేతకు అభినందనలు తెలిపారు. భారీ మెజార్టీతో ప్రజలు తమపై ఉంచిన నమ్మకాన్ని నిలబెట్టుకోవాల్సిన బాధ్యత మరింత పెరిగిందని పార్టీ శ్రేణులు పేర్కొన్నాయి.మండలంలోని గ్రామాల్లో రహదారులు, తాగునీరు, పారిశుద్ధ్యం, విద్య, వైద్యం, రైతులు, మహిళల సమస్యల పరిష్కారానికి ప్రాధాన్యతనిస్తూ అభివృద్ధి కార్యక్రమాలు చేపట్టాలని ప్రజలు ఆశిస్తున్నారు. పార్టీలకు అతీతంగా అన్ని గ్రామాలను సమానంగా అభివృద్ధి పథంలో నడిపించాలని స్థానికులు కోరుతున్నారు.7,337 ఓట్ల భారీ మెజార్టీతో విజయం సాధించిన పీలా హైమవతి తులసీరామ్‌కు పలువురు అభినందనలు తెలియజేశారు.

అనకాపల్లి

పేట బయ్యవరం ఎంపీటీసీ స్థానంలో టీడీపీ ఘన విజయం.. 719 ఓట్ల భారీ మెజార్టీతో యల్లపు లక్ష్మి గెలుపు!

అనకాపల్లి జిల్లా యలమంచిలి మండలం పేట బయ్యవరం ఎంపీటీసీ ఎన్నికల్లో తెలుగుదేశం పార్టీ అభ్యర్థి యల్లపు లక్ష్మి 719 ఓట్ల భారీ మెజార్టీతో ఘన విజయం సాధించారు. ఈ విజయంతో టీడీపీ శ్రేణుల్లో నూతనోత్సాహం వెల్లివిరిసింది. యలమంచిలి మండల టీడీపీ ఆర్గనైజింగ్ సెక్రటరీ యడ్ల చినబాబు ఆధ్వర్యంలో నాయకులు, కార్యకర్తలు సమష్టిగా కృషి చేసి విజయానికి బాటలు వేశారు. ఈ సందర్భంగా యడ్ల చినబాబు మాట్లాడుతూ.. యల్లపు లక్ష్మికి భారీ విజయాన్ని అందించిన ఓటర్లందరికీ హృదయపూర్వక కృతజ్ఞతలు తెలిపారు. పార్టీ నాయకులు, కూటమి నేతలు, కార్యకర్తలు, అభిమానుల కృషి మరువలేనిదన్నారు.ప్రజలు తమపై ఉంచిన నమ్మకాన్ని నిలబెట్టుకుంటూ గ్రామ అభివృద్ధికి కృషి చేస్తామని పేర్కొన్నారు. ఈ విజయంతో పేట బయ్యవరంలో టీడీపీ శ్రేణులు సంబరాలు జరుపుకుంటూ యల్లపు లక్ష్మికి అభినందనలు తెలిపారు.

అనకాపల్లి

సొంత ఖర్చులతో ప్రధాన రహదారికి మరమ్మతులు.. ప్రజల ఇబ్బందుల తొలగింపునకు పిట్టా శ్రీనివాస్ చొరవ!

యలమంచిలి: యర్రవరం, సింగవరం, ఏఎస్‌ఆర్ కాలనీ, పెద్దపల్లి గ్రామాలకు యలమంచిలి నుంచి రాకపోకలకు అనుసంధానంగా ఉన్న ప్రధాన రహదారికి కౌన్సిలర్ పిట్టా శ్రీనివాస్ తన సొంత ఖర్చులతో మరమ్మతులు చేయించారు. రాత్రి వేళల్లో ప్రయాణించే ప్రజలు, వివిధ కంపెనీలకు వెళ్లి వచ్చే ఉద్యోగులు ఇబ్బందులు పడకుండా రహదారి పొడవునా పెరిగిన తుప్పలు, లైటింగ్‌కు అడ్డుగా ఉన్న చెట్ల కొమ్మలను తొలగించారు. ప్రజల సౌకర్యమే లక్ష్యంగా అభివృద్ధికి తొలి అడుగు వేశారు. అదేవిధంగా రాత్రి వేళల్లో ప్రయాణికులకు మరింత సౌకర్యంగా ఉండేందుకు ఫోకస్ లైట్లు ఏర్పాటు చేస్తామని హామీ ఇచ్చారు. ప్రజా సమస్యల పరిష్కారానికి వ్యక్తిగతంగా ముందుకు రావడం పట్ల స్థానికులు హర్షం వ్యక్తం చేస్తున్నారు. ఈ కార్యక్రమంలో కౌన్సిలర్ పిట్టా శ్రీనివాస్, జనసేన సీనియర్ నాయకులు గొర్లె సత్తిబాబు, కూటమి సభ్యులు పాల్గొన్నారు.

అనకాపల్లి

ప్రధాని మోదీకి బహుమతిగా ఏటికొప్పాక లక్క కళాకృతి.. జాతీయస్థాయిలో మెరిసిన స్థానిక కళాకారుడి ప్రతిభ!

జపాన్‌లోని ఐచి–నగోయాలో జరిగిన 5వ ఆసియా పారా గేమ్స్‌లో భారత క్రీడాకారులు 114 పతకాలు సాధించడం దేశానికి గర్వకారణంగా నిలిచింది. ఈ సందర్భంగా ప్రధాని నరేంద్ర మోదీ భారత క్రీడాకారులకు విందు ఏర్పాటు చేయనున్న నేపథ్యంలో ఆయనకు బహూకరించేందుకు దేశవ్యాప్తంగా సుమారు 100 ప్రత్యేక కళాకృతులు పంపగా, వాటిలో కేవలం ఆరు మాత్రమే ఎంపికయ్యాయి. ఈ ఆరు కళాకృతుల్లో అనకాపల్లి జిల్లా ఏటికొప్పాకకు చెందిన లక్క కళాకృతి చోటు దక్కించుకోవడం విశేషం. ఏటికొప్పాకకు చెందిన పెదపాటి నాని (పైడికొండ), సత్తిబాబు కుమారుడు ఈ అరుదైన కళాకృతిని రూపొందించారు. ఇందులో వివిధ క్రీడలకు సంబంధించిన ఆటలను సూక్ష్మరూపంలో (మినియేచర్) అద్భుతంగా తీర్చిదిద్దారు. ఇండియన్ బ్యాడ్మింటన్ కోచ్ శ్రీ మురళీకృష్ణ కోరిక మేరకు, జాతీయ అవార్డు గ్రహీత శ్రీశైలపు చిన్నయాచారి గారి ప్రోత్సాహంతో దీనిని తయారు చేసినట్లు నాని తెలిపారు.ప్రధానికి అందించే బహుమతుల కోసం ఎంపికైన ఆరు కళాకృతుల్లో ఏటికొప్పాక లక్క కళకు చోటు దక్కడం గ్రామానికే కాకుండా ఆంధ్రప్రదేశ్ రాష్ట్రానికి గర్వకారణంగా మారింది. ఏటికొప్పాక కళా వైభవాన్ని జాతీయస్థాయిలో చాటిన పెదపాటి నానిని గ్రామ ప్రజలు అభినందిస్తూ ఆనందం వ్యక్తం చేస్తున్నారు.

అనకాపల్లి

మెగాస్టార్ చిరంజీవి అభిమాన సంఘం ప్రతినిధి కుటుంబ సమేతంగా ఓటు హక్కు వినియోగం!

అనకాపల్లి జిల్లా గోకివాడ గ్రామానికి చెందిన ద్వారపురెడ్డి నాగేశ్వరరావు తన కుటుంబ సభ్యులతో కలిసి జెడ్పీటీసీ, ఎంపీటీసీ ఎన్నికల్లో ఓటు హక్కును వినియోగించుకున్నారు.ప్రస్తుతం బ్రాంచ్ పోస్ట్ మాస్టర్‌గా విధులు నిర్వహిస్తున్న నాగేశ్వరరావు, అఖిల భారత చిరంజీవి యువత కన్వీనర్‌గా కూడా సేవలందిస్తున్నారు.ప్రజాస్వామ్యంలో ఓటు హక్కు ఎంతో విలువైనదని, ప్రతి ఒక్కరూ తమ ఓటును బాధ్యతగా వినియోగించుకోవాలని ఈ సందర్భంగా ఆయన సందేశం ఇచ్చారు.మెగాస్టార్ చిరంజీవి అభిమానిగా సామాజిక సేవా కార్యక్రమాల్లో చురుకుగా పాల్గొంటున్న నాగేశ్వరరావు కుటుంబ సమేతంగా ఓటు వేయడం స్థానికంగా ప్రత్యేక ఆకర్షణగా నిలిచింది.

అనకాపల్లి

ఓటరు స్లిప్పుల పంపిణీలో నిర్లక్ష్యం.. ఓటు హక్కు వినియోగించుకోకుండానే వెనుదిరుగుతున్న ఓటర్లు!

ఓటరు స్లిప్పుల పంపిణీలో నిర్లక్ష్యం.. ఓటు హక్కు వినియోగించుకోకుండానే వెనుదిరుగుతున్న ఓటర్లు! అనకాపల్లి జిల్లా యలమంచిలి మండలం ఏటికొప్పాక గ్రామంలో జరుగుతున్న జెడ్పీటీసీ, ఎంపీటీసీ ఎన్నికల పోలింగ్‌లో ఓటర్లకు ఇబ్బందికర పరిస్థితులు ఎదురయ్యాయి. పంచాయతీ సిబ్బంది ముందస్తు ఏర్పాట్లలో నిర్లక్ష్యం వహించడంతో పలువురు ఓటర్లకు ఓటరు స్లిప్పులు అందలేదు. దీంతో పోలింగ్ కేంద్రాలకు ఉత్సాహంగా వచ్చిన ఓటర్లు స్లిప్పులు లేక ఇబ్బందులు పడుతూ ఓటు వేయకుండానే వెనుదిరుగుతున్న పరిస్థితి నెలకొంది. ఓటు హక్కును వినియోగించుకోవాలనే ఉద్దేశంతో వచ్చిన ప్రజలకు కనీస సమాచారం, సహకారం అందకపోవడంపై అసహనం వ్యక్తమవుతోంది. ఎన్నికల నిర్వహణలో కీలకమైన ఓటరు స్లిప్పుల పంపిణీ విషయంలో సంబంధిత సిబ్బంది నిర్లక్ష్యం ఎందుకు వహించారనే ప్రశ్నలు వ్యక్తమవుతున్నాయి. ఇప్పటికైనా ఎన్నికల అధికారులు స్పందించి స్లిప్పులు అందని ఓటర్లకు తగిన సహకారం అందించాలని, ఓటు హక్కు వినియోగించుకునేలా అవసరమైన ఏర్పాట్లు చేయాలని ఓటర్లు కోరుతున్నారు.