Mumcipility Archives

పారిశుధ్యంపై మున్సిపల్ కమిషనర్ శేషన్న ప్రత్యేక నిఘా

నంద్యాల: పట్టణంలో పారిశుధ్య నిర్వహణను మెరుగుపరిచేందుకు మున్సిపల్ అధికారులు ప్రత్యేక దృష్టి సారించారు. ఇందులో భాగంగా మున్సిపల్ కమిషనర్ బి. శేషన్న పలు ప్రాంతాల్లో పర్యటించి పారిశుధ్య పనులను క్షేత్రస్థాయిలో పరిశీలించారు. రోడ్లు, కాలనీలు, ప్రధాన కూడళ్లలో ఎక్కడా చెత్త పేరుకుపోకుండా ఎప్పటికప్పుడు తొలగించాలని, డ్రైనేజీలను శుభ్రంగా ఉంచాలని సిబ్బందిని ఆదేశించారు.పట్టణ పరిశుభ్రత విషయంలో నిర్లక్ష్యం వహిస్తే సహించేది లేదని, అధికారులు-సిబ్బంది సమన్వయంతో పనిచేయాలని స్పష్టం చేశారు. పరిసరాలను పరిశుభ్రంగా ఉంచుకునేలా ప్రజల్లో అవగాహన కల్పించాలని సూచించారు. ఈ తనిఖీల్లో మున్సిపల్ రెవెన్యూ ఇన్‌స్పెక్టర్లు విక్రమ్, శభరిష్, శానిటేషన్ సూపర్‌వైజర్లు లక్ష్మీనారాయణ, శివప్రసాద్ రెడ్డి మరియు మున్సిపల్ సిబ్బంది పాల్గొన్నారు.

shaikabdulmazeed
September 11, 2026
0 Comments
11 Views

నంద్యాల

నంద్యాల మున్సిపాలిటీ వార్డులు 42 నుంచి 52కు పెంపు సరిహద్దులపై ప్రజల అభిప్రాయాలు, అభ్యంతరాలకు ఆహ్వానం ఈ నెల 5 నుంచి 11 వరకు గడువు

నంద్యాల: నంద్యాల పురపాలక సంఘ పరిధిలోని ప్రస్తుతం ఉన్న 42 వార్డులను 52 వార్డులుగా పునర్విభజిస్తున్నట్లు మున్సిపల్ కమిషనర్ బండి శేషన్న తెలిపారు. ఈ పునర్విభజన ప్రక్రియపై శనివారం జిల్లా కలెక్టర్ ఛాంబర్‌లో కలెక్టర్ జి. రాజకుమారి గారితో ఆయన చర్చించారు.సి అండ్ డిఎమ్‌ఎ సర్క్యులర్, హైకోర్టు ఉత్తర్వుల మేరకు వార్డుల పునర్విభజనకు కొత్త షెడ్యూల్ జారీ చేశామని తెలిపారు. ప్రతిపాదిత వార్డుల సరిహద్దులపై ప్రజల నుంచి సలహాలు, సూచనలు, అభ్యంతరాలను సెప్టెంబర్ 5 నుంచి 11వ తేదీ వరకు (7 రోజులు) స్వీకరించనున్నట్లు పేర్కొన్నారు.ప్రజల సౌకర్యార్థం ప్రతిపాదిత వార్డుల నోటిఫికేషన్ (ఫారం-1) ప్రతులను కలెక్టరేట్, ఆర్‌డిఓ, తహసీల్దార్, సబ్‌-రిజిస్ట్రార్, ఎంపీడీఓ, హెడ్ పోస్టాఫీస్ మరియు మున్సిపల్ కార్యాలయాల్లో ప్రదర్శించినట్లు వెల్లడించారు. సరిహద్దులపై ఏవైనా అభ్యంతరాలు లేదా సూచనలు ఉంటే ఆధారాలతో సహా గడువులోగా మున్సిపల్ కార్యాలయంలో లిఖితపూర్వకంగా అందజేయాలని కమిషనర్ కోరారు.

shaikabdulmazeed
September 5, 2026
0 Comments
19 Views

నంద్యాల

వినాయక నిమజ్జనానికి నంద్యాల చెరువు సిద్ధం

నంద్యాల: వినాయక విగ్రహాల నిమజ్జనానికి భక్తులకు ఎలాంటి ఇబ్బందులు కలగకుండా నంద్యాల చెరువులో నీటిని సిద్ధం చేసినట్లు మున్సిపల్ అధికారులు తెలిపారు. చెరువు వద్ద జరుగుతున్న పారిశుధ్య పనులను శుక్రవారం మున్సిపల్ కమిషనర్ బి. శేషన్న ప్రత్యక్షంగా పరిశీలించారు.నిమజ్జన ప్రాంతంలో పరిసరాలను పరిశుభ్రంగా ఉంచాలని, చెత్తాచెదారాన్ని వెంటనే తొలగించాలని శానిటేషన్ సిబ్బందిని ఆదేశించారు. భక్తులకు సదుపాయాలు కల్పించడంలో నిర్లక్ష్యం వహించవద్దని సూచించారు. ఈ కార్యక్రమంలో ఆర్ఐలు విక్రమ్, శభరిష్, శానిటేషన్ సూపర్‌వైజర్లు మురళీధర్, శివ ప్రసాద్ రెడ్డి తదితరులు పాల్గొన్నారు.

shaikabdulmazeed
September 4, 2026
0 Comments
19 Views

నంద్యాల

మెప్మాలో సీఆర్పీల తొలగింపుపై రాజకీయ ఒత్తిళ్లు.. కలెక్టర్‌కు బాధితుల ఫిర్యాదు

నంద్యాల : మెప్మా కార్యాలయంలో కమ్యూనిటీ రీసోర్స్ పర్సన్స్ (CRP) తొలగింపు వ్యవహారం రాజకీయ రంగు పులుముకుంది. సీఆర్పీలుగా పనిచేస్తున్న కొందరిని తొలగించాలని అధికార పార్టీ నాయకుల నుంచి అధికారులపై తీవ్ర ఒత్తిళ్లు వస్తున్నట్లు ఆరోపణలు వెల్లువెత్తుతున్నాయి.ఈ నేపథ్యంలో ఎలాంటి కారణాలు చూపకుండా తమను విధుల నుంచి తొలగించారని, తమకు న్యాయం చేయాలని కోరుతూ బాధిత సీఆర్పీలు జిల్లా కలెక్టర్ నిర్వహించే ‘ప్రజా సమస్యల పరిష్కార వేదిక’లో కలెక్టర్‌కు మొరపెట్టుకున్నారు. ఒకవైపు అధికార పార్టీ నేతల ఒత్తిళ్లు, మరోవైపు బాధితుల ఫిర్యాదులతో ఏం చేయాలో పాలుపోక మెప్మా పీడీ కార్యాలయ అధికారులు సతమతమవుతున్నారు. అర్హులైన సీఆర్పీలకు అన్యాయం జరగకుండా, ఈ వ్యవహారంపై సమగ్ర విచారణ జరిపించాలని పలువురు డిమాండ్ చేస్తున్నారు

shaikabdulmazeed
September 3, 2026
0 Comments
22 Views

నంద్యాల

రాయలసీమ నీటి హక్కులపై మౌనం ఎందుకు?: బొజ్జా దశరథరామిరెడ్డి ప్రశ్నాస్త్రం

నంద్యాల : శ్రీశైలం జలాశయంలో క్యారీ ఓవర్ నీటిని నిల్వ చేయకుండా కేవలం 39.26 టీఎంసీలకే పరిమితం చేయడంపై రాయలసీమ సాగునీటి సాధన సమితి అధ్యక్షుడు బొజ్జా దశరథరామిరెడ్డి తీవ్ర ఆగ్రహం వ్యక్తం చేశారు. గత ఏడాది సమృద్ధిగా కృష్ణా జలాలు వచ్చినప్పటికీ నిల్వ చేయకపోవడం వల్ల ప్రస్తుతం రాయలసీమ సాగు, తాగునీటి ప్రాజెక్టులకు తీవ్ర ముప్పు వాటిల్లే ప్రమాదం ఉందని ఆందోళన చెందారు.విద్యుత్ ఉత్పత్తి నెపంతో శ్రీశైలం నీటిని నాగార్జున సాగర్‌కు తరలిస్తూ, రాయలసీమ ఆయకట్టుకు నీరు ఇవ్వకపోవడం సరికాదని, నీరు రాయలసీమ ప్రజల హక్కు అని తేల్చి చెప్పారు. ఎల్‌నినోను సాకుగా చూపకుండా జలాశయ విధివిధానాలను అమలు చేసి, సీమలోని ప్రాజెక్టులు, ఆయకట్టు, చెరువులు, కుంటలకు వెంటనే నీరు విడుదల చేయాలని ప్రభుత్వాన్ని డిమాండ్ చేశారు.

shaikabdulmazeed
September 3, 2026
0 Comments
19 Views

నంద్యాల

ధరల పెంపుపై సీపీఎం వినూత్న నిరసన: కూటమికి ప్రజలే బుద్ధి చెప్తారని హెచ్చరిక!

నంద్యాల: పెరిగిన నిత్యవసర వస్తువుల ధరలను అదుపు చేయడంలో కేంద్ర, రాష్ట్ర ప్రభుత్వాలు పూర్తిగా విఫలమయ్యాయని సీపీఎం పట్టణ కార్యదర్శి దర్శనం లక్ష్మణ్ విమర్శించారు. నిత్యావసరాల ధరల పెంపునకు నిరసనగా సీపీఎం పట్టణ కమిటీ ఆధ్వర్యంలో శనివారం స్థానిక గాంధీ చౌక్ సెంటర్‌లో వినూత్న నిరసన చేపట్టారు. నాయకులు మెడలో ఉల్లిగడ్డలు, మిరపకాయల దండలు వేసుకుని, నిత్యావసర సరుకులను ముందర ఉంచి నిరసన తెలిపాయి. కందిపప్పు, నూనె, ఉల్లి, చక్కెర, బియ్యం ధరలను తక్షణమే తగ్గించాలని డిమాండ్ చేశారు. ఎన్నికలు ఎప్పుడు వచ్చినా కూటమి ప్రభుత్వానికి పతనం తప్పదని, ప్రజలే తగిన బుద్ధి చెప్తారని హెచ్చరించారు. ఈ కార్యక్రమంలో సీపీఎం నాయకులు పుల్లా నరసింహ, మహ్మద్ గౌస్, వెంకటలింగం, మౌలాలి, తోట మద్దులు తదితరులు పాల్గొన్నారు.

shaikabdulmazeed
August 29, 2026
0 Comments
18 Views

నంద్యాల

ప్రభుత్వ భూములను ఆక్రమిస్తే కఠిన చర్యలు: మున్సిపల్ కమిషనర్ హెచ్చరిక

నంద్యాల పట్టణంలోని ఎన్జీవోస్ కాలనీ పరిధిలోని ఐయూడీపీ పథకం (IDSMT) కింద కేటాయించిన భూములను ఆక్రమించినా, అనధికారికంగా బోర్డులు ఏర్పాటు చేసినా చట్టపరంగా కఠిన చర్యలు తీసుకుంటామని నంద్యాల పురపాలక సంఘం కమిషనర్ ఒక ప్రకటనలో హెచ్చరించారు.గతంలో భూసేకరణ ద్వారా స్వాధీనం చేసుకున్న 94.24 ఎకరాల భూమిని మున్సిపాలిటీకి కేటాయించారని తెలిపారు. ప్రస్తుతం ఖాళీగా ఉన్న నంద్యాల విలేజ్ సర్వే నంబర్లు 2311, 2312, 2313, 2314, 2318/A&C, నూనెపల్లె విలేజ్ సర్వే నంబర్లు 410, 411, 412/2 భూములను సెక్షన్ 22-ఎ కింద నిషిద్ధ ఆస్తుల జాబితాలో చేర్చినట్లు పేర్కొన్నారు. ఈ భూములపై న్యాయస్థానంలో కేసులు పెండింగ్‌లో ఉన్నందున, ఎవరైనా ఆక్రమణలకు పాల్పడితే చట్టపరమైన చర్యలు తప్పవని కమిషనర్ స్పష్టం చేశారు.

shaikabdulmazeed
August 27, 2026
0 Comments
25 Views

నంద్యాల

రైతును మోసగించిన వీఆర్వో అబ్దుల్లా పై కలెక్టర్‌తో విచారణ జరిపించాలి

వెలుగోడు :పొలం పేరుతో పేద రైతును మోసగించిన వీఆర్వో అబ్దుల్లాపై కలెక్టర్ నేతృత్వంలో విచారణ కమిటీ వేసి కఠిన చర్యలు తీసుకోవాలని సిపిఐ (ఎంఎల్) న్యూడెమోక్రసీ పార్టీ నాయకులు డిమాండ్ చేశారు. ఈ మేరకు గురువారం వెలుగోడు తహశీల్దార్ శ్రీనివాసులు గౌడ్‌కు వినతిపత్రం అందజేశారు.ఈ సందర్భంగా పార్టీ జిల్లా నాయకుడు పి. లాజరస్, రైతు కూలీ సంఘం మండల అధ్యక్షుడు చాంద్ బాషా మాట్లాడుతూ.. బాధితుడు షేక్ హుస్సేన్ మియా దంపతుల వద్ద వీఆర్వో అబ్దుల్లా ఆయన సోదరులు పొలం అమ్మకం కోసం ₹7.30 లక్షలు తీసుకుని అగ్రిమెంట్ చేశారన్నారు. 2024 జూన్ 3న ఆన్‌లైన్‌లో ఎక్కించిన పేరును ఆ తర్వాత తొలగించి, వీఆర్వో తన బంధువుల పేర్లను చేర్చి రైతును మోసం చేశారని మండిపడ్డారు. బాధితుడికి న్యాయం జరిగే వరకు తమ పార్టీ అండగా ఉండి పోరాడుతుందని హెచ్చరించారు. ఈ కార్యక్రమంలో నాయకుడు రవి, బాధితుడు హుస్సేన్ మియా దంపతులు పాల్గొన్నారు.

shaikabdulmazeed
August 27, 2026
0 Comments
25 Views

నంద్యాల

శ్రీశైలం నీటి తరలింపును ఆపాలి: బొజ్జా దశరథరామిరెడ్డి

నంద్యాల :శ్రీశైలం జలాశయం నుంచి నాగార్జునసాగర్‌కు నీటి తరలింపును వెంటనే నిలిపివేసి, రాయలసీమ తాగు, సాగునీటి అవసరాలకు నీటిని భద్రపరచాలని రాయలసీమ సాగునీటి సాధన సమితి అధ్యక్షుడు బొజ్జా దశరథరామిరెడ్డి డిమాండ్ చేశారు. ఈ మేరకు గురువారం ఉమ్మడి కర్నూలు జిల్లా నీటిపారుదల శాఖ చీఫ్ ఇంజనీర్‌ను కలసి వినతిపత్రం అందజేశారు.ఇప్పటికే శ్రీశైలం నుంచి 53 టీఎంసీల నీటిని నాగార్జునసాగర్‌కు తరలించడం రాయలసీమ నీటి భద్రతకు ప్రమాదకరమని ఆందోళన వ్యక్తం చేశారు. కృష్ణా జలాల సమస్యపై కేఆర్‌ఎంబీ, సీడబ్ల్యూసీ పరిధిలో పరిష్కారం కాకపోతే ముఖ్యమంత్రి నారా చంద్రబాబు నాయుడు కేంద్రం దృష్టికి తీసుకెళ్లి శాశ్వత పరిష్కారం చూపాలని విజ్ఞప్తి చేశారు. కార్యక్రమంలో సమితి నాయకులు ఏరువ రామచంద్రారెడ్డి, మహేశ్వరరెడ్డి, నిట్టూరు సుధాకర్‌రావు పాల్గొన్నారు.

shaikabdulmazeed
August 27, 2026
0 Comments
17 Views

నంద్యాల

ముస్లింల హామీలు అమలు చేయాలి: ఇన్సాఫ్‌

నంద్యాల :గత ఎన్నికల సమయంలో ముస్లింలకు ఇచ్చిన హామీలను కూటమి ప్రభుత్వం వెంటనే నెరవేర్చాలని ఆల్‌ ఇండియా తంజీమ్‌-యే-ఇన్సాఫ్‌ జిల్లా సమితి డిమాండ్‌ చేసింది. ఈ మేరకు మంగళవారం జిల్లా రెవెన్యూ అధికారి రామ్‌నాయక్‌కు వినతిపత్రం అందజేశారు.ఈ సందర్భంగా ఇన్సాఫ్‌ రాష్ట్ర ఉపాధ్యక్షుడు ఎస్. రియాజ్ మాట్లాడుతూ.. 50 శాతం రాయితీతో మైనార్టీ రుణాలు, దుల్హన్‌ పథకానికి ₹1 లక్ష, నిరుద్యోగులకు ₹3 వేల భృతి, మహిళలకు ₹1,500 సాయం అందించాలని కోరారు. ఉర్దూ ఉపాధ్యాయ పోస్టులను భర్తీ చేయడంతో పాటు ఇమామ్‌లు, మౌజన్‌లకు సకాలంలో గౌరవ వేతనాలు ఇవ్వాలని, ఆక్రమణకు గురైన వక్ఫ్‌ ఆస్తులను ప్రభుత్వం స్వాధీనం చేసుకోవాలని డిమాండ్‌ చేశారు. కార్యక్రమంలో నాయకులు బాబా ఫక్రుద్దీన్‌, బాదుల్లా, కలాం, మహమ్మద్‌ అలీ పాల్గొన్నారు

shaikabdulmazeed
August 27, 2026
0 Comments
17 Views

Contact Info

Some Populer Post

Contact Info

Tag: Mumcipility

follow us

About Us

Top Categories​

Subscribe

Top Categories