Contact Us Latest News
నిజమైన వార్త. వేగమైన సమాచారం. ఆంధ్రప్రదేశ్ • తెలంగాణ • జాతీయం
Author Panel

Tag: ఎలమంచిలి

అనకాపల్లి

కొక్కిరాపల్లిలో పచ్చదనం.. పరిశుభ్రతే లక్ష్యంగా గ్రామ జ్యోతి యువత శ్రమదానం!

యలమంచిలి మున్సిపాలిటీ పరిధిలోని 31వ వార్డు కొక్కిరాపల్లి గ్రామంలో గ్రామ పరిశుభ్రత, పచ్చదనం, పర్యావరణ పరిరక్షణే ధ్యేయంగా గ్రామ జ్యోతి యువత ఆదర్శంగా నిలుస్తున్నారు. ప్రతి ఆదివారం ఉదయం రెండు గంటల పాటు శ్రమదానం నిర్వహిస్తూ గ్రామాభివృద్ధిలో తమవంతు బాధ్యతను నిర్వర్తిస్తున్నారు.ఈ క్రమంలో ఆదివారం నిర్వహించిన శ్రమదాన కార్యక్రమంలో గ్రామ ప్రధాన రహదారిపై సీతా రాజు ఇంటి నుంచి ఆర్.కె. లేఔట్ వరకు రోడ్డుకు ఇరువైపులా పేరుకుపోయిన చెత్తాచెదారం, ప్లాస్టిక్ వ్యర్థాలు, పిచ్చిమొక్కలను తొలగించి పరిసరాలను శుభ్రం చేశారు.ఈ సందర్భంగా యువత మాట్లాడుతూ రహదారులు పరిశుభ్రంగా ఉంటే విషపురుగులు, ప్రమాదకర జీవుల సంచారాన్ని అరికట్టవచ్చని, ప్లాస్టిక్ వ్యర్థాల వల్ల భూమి కలుషితం కాకుండా పర్యావరణాన్ని పరిరక్షించవచ్చని తెలిపారు. గ్రామాన్ని పరిశుభ్రంగా ఉంచడం ఒక్కరి బాధ్యత కాదని, ప్రతి ఒక్కరూ సామాజిక బాధ్యతగా స్వీకరించి శ్రమదాన కార్యక్రమాల్లో భాగస్వాములు కావాలని పిలుపునిచ్చారు.ఈ కార్యక్రమంలో గ్రామ జ్యోతి యువత సభ్యులు దేవి ప్రసాద్, నాగేష్, లక్ష్మి, శ్రావణి, ధరిణి, ఓంకార్, యశ్వంత్, యువరాజ్, జయరాజ్, గోపేష్‌తో పాటు పలువురు చిన్నారులు పాల్గొన్నారు.

అనకాపల్లి

నెహ్రూ ఆశయాలను స్ఫూర్తిగా తీసుకోవాలి.. బాలల దినోత్సవ వేడుకల్లో విద్యార్థులకు పిలుపు

ఎస్.రాయవరం జిల్లా పరిషత్ ఉన్నత పాఠశాలలో శనివారం బాలల దినోత్సవ వేడుకలను ఘనంగా నిర్వహించారు. భారత తొలి ప్రధానమంత్రి పండిట్ జవహర్‌లాల్ నెహ్రూ చిత్రపటానికి పూలమాలలు వేసి, జ్యోతి ప్రజ్వలనతో కార్యక్రమాన్ని ప్రారంభించారు. ఈ సందర్భంగా విద్యార్థుల్లో సృజనాత్మకతను, ప్రతిభను వెలికితీసే ఉద్దేశంతో చిత్రలేఖనం, వ్యాసరచన పోటీలను నిర్వహించారు. పోటీల్లో ప్రతిభ కనబరిచిన విజేతలకు బహుమతులను అందజేసి అభినందించారు. అనంతరం విద్యార్థులు ప్రదర్శించిన సాంస్కృతిక కార్యక్రమాలు అందరినీ ఆకట్టుకున్నాయి. పాటలు, నృత్యాలతో పాఠశాల ప్రాంగణం సందడిగా మారింది. బాలల ప్రతిభను ప్రోత్సహిస్తూ, వారి ఆనందోత్సాహాల మధ్య వేడుకలు ఉత్సాహభరితంగా సాగాయి. ఈ కార్యక్రమంలో ప్రధానోపాధ్యాయులు వీసం ప్రసాద్, ఉపాధ్యాయులు, విద్యార్థులు పాల్గొన్నారు.

అనకాపల్లి

వై.లోవ గ్రామాభివృద్ధికి రూ.6.50000/లక్షల విరాళం ప్రకటించిన బద్ది ఆనంద్

వై.లోవ సర్పంచ్ పదవికి గ్రామస్థులు ఏకగ్రీవంగా అవకాశం కల్పిస్తే, గ్రామాభివృద్ధి కోసం తన సొంత నిధుల నుంచి రూ.6.50000/ లక్షలు విరాళంగా అందిస్తానని వై.లోవ గ్రామానికి చెందిన బద్ది ఆనంద్ ప్రకటించారు. ఈ మొత్తాన్ని మౌలిక సదుపాయాలు, గ్రామ అభివృద్ధి పనులు, ప్రజా సంక్షేమ కార్యక్రమాలకు పారదర్శకంగా వినియోగిస్తానని తెలిపారు. ఫోటోగ్రఫీ రంగంలో వ్యాపారవేత్తగా, వైసీపీ పార్టీ కార్యకర్తగా ప్రసిద్ధి చెందిన బద్ది ఆనంద్ , స్వగ్రామం వై.లోవ అభివృద్ధికి ప్రత్యేక దృష్టి సారిస్తున్నారు. గతంలో రాంబిల్లి మండల వైసీపీ పార్టీ కమిటీ సభ్యుడిగా, ప్రస్తుతం ఎలమంచిలి నియోజకవర్గ వైసీపీ పార్టీ కమిటీ సభ్యుడిగా బాధ్యతలు నిర్వహిస్తున్నారు.విద్యార్థులకు సహకారం ప్రతి సంవత్సరం ఆర్థికంగా వెనుకబడిన ఇద్దరు విద్యార్థుల కళాశాల ఫీజులను తన సొంత ఖర్చులతో చెల్లిస్తున్నారు. అలాగే రక్తదాన శిబిరాలు, సామాజిక అవగాహన కార్యక్రమాల్లో క్రియాశీలకంగా పాల్గొంటున్నారు.గ్రామ యువతకు స్థానికంగా ఉపాధి అవకాశాలు కల్పించడం, పేద విద్యార్థులకు ఉన్నత విద్యకు అండగా నిలవడం, ప్రతి కుటుంబానికి అభివృద్ధి ఫలాలు చేర్చడమే తన లక్ష్యమని ఆనంద్ అన్నారు. అందరి సహకారం కోరిక రాజకీయ పార్టీల భేదాలను పక్కన పెట్టి, గ్రామాభివృద్ధి కోసం పెద్దలు, యువత, మహిళలు, నాయకులు కలిసి ముందుకు రావాలని ఆనంద్ కోరారు. “పదవి కోసం కాదు, గ్రామ ప్రగతి కోసం” సేవ చేయాలని పేర్కొన్నారు. వై.లోవను ఆదర్శ గ్రామంగా తీర్చిదిద్చడమే తన సంకల్పమని, గ్రామస్థుల ఆశీస్సులు, సలహాలు, సహకారంతో ముందుకు సాగుతానని బద్ది ఆనంద్ తెలిపారు.

అనకాపల్లి

పుస్తక పఠనంతోనే విజ్ఞానం.. ఉన్నత భవిష్యత్తుకు బాటలు!

యలమంచిలి శాఖా గ్రంథాలయంలో శనివారం 59వ జాతీయ గ్రంథాలయ వారోత్సవాలను ఘనంగా ప్రారంభించారు. ఈ కార్యక్రమానికి ముఖ్య అతిథిగా డిగ్రీ కళాశాల అధ్యాపకులు డాక్టర్ సి.హెచ్. శ్రీనివాసరావు పాల్గొన్నారు. ఈ సందర్భంగా ఆయన మాట్లాడుతూ విద్యార్థులు చిన్ననాటి నుంచే గ్రంథాలయాలకు వెళ్లడం, పుస్తక పఠనాన్ని అలవాటు చేసుకోవడం ద్వారా విజ్ఞానాన్ని పెంపొందించుకోవచ్చని తెలిపారు. చదువుతో పాటు పుస్తక పఠనం అలవర్చుకుంటే జీవితంలో ఉన్నత స్థాయికి చేరుకోవచ్చని సూచించారు. గ్రంథాలయాధికారి వి. ఆనంద్ మాట్లాడుతూ వారోత్సవాల్లో భాగంగా విద్యార్థులకు చిత్రలేఖనం, వ్యాసరచన, వక్తృత్వం, క్విజ్, పాటల పోటీలు నిర్వహిస్తున్నట్లు తెలిపారు. కార్యక్రమానికి రిటైర్డ్ వైస్ ప్రిన్సిపాల్ ఆడారి పూరి జగన్నాధం అధ్యక్షత వహించారు. రిటైర్డ్ ప్రధానోపాధ్యాయులు సోమయాజుల సన్యాసిబాబు, వై. అప్పారావు, కె. నటరాజ్, రిటైర్డ్ బ్రాంచ్ మేనేజర్ తదితరులు పాల్గొన్నారు. తొలుత జవహర్‌లాల్ నెహ్రూ చిత్రపటానికి పూలమాల వేసి జ్యోతి ప్రజ్వలన చేశారు. ఈ కార్యక్రమంలో విద్యార్థినీ విద్యార్థులు, పాఠకులు ఉత్సాహంగా పాల్గొన్నారు.

అనకాపల్లి

భక్తుల సౌకర్యార్థం బండిమాంబ జాతర తేదీ మార్పు.. డిసెంబర్ 6న ఘనంగా నిర్వహణ!

యలమంచిలి మండలం ఏటికొప్పాక గ్రామంలో ప్రతి సంవత్సరం భక్తజన సందోహం మధ్య అత్యంత వైభవంగా నిర్వహించే శ్రీశ్రీశ్రీ బండిమాంబ అమ్మవారి జాతర తేదీని మార్చినట్లు ఆలయ కమిటీ ప్రకటించింది. ముందుగా నవంబర్ 29, 2026న జాతర నిర్వహించాలని నిర్ణయించగా, అదే రోజు గ్రామ పంచాయతీ ఎన్నికలు జరగనున్న నేపథ్యంలో జాతర తేదీని వాయిదా వేయాలని నిర్ణయించారు. ఆలయ కమిటీ చైర్మన్ చింతలపాటి దేవి ప్రసాద్, గ్రామ పెద్దలు, గ్రామ ప్రజల సమిష్టి అభిప్రాయం మేరకు ఈ నిర్ణయం తీసుకున్నారు. దీంతో అమ్మవారి జాతరను డిసెంబర్ 6, 2026 ఆదివారం నాడు అంగరంగ వైభవంగా నిర్వహించనున్నారు. ఈ సందర్భంగా ఏటికొప్పాక గ్రామ ప్రజలతో పాటు చుట్టుపక్కల గ్రామాల భక్తులు, అమ్మవారి భక్తులందరూ తేదీ మార్పును గమనించాలని కమిటీ కోరింది. నవంబర్ 29న జాతర ఉండదని, డిసెంబర్ 6న మాత్రమే నిర్వహిస్తామని స్పష్టం చేసింది. భక్తులందరూ పెద్ద సంఖ్యలో తరలివచ్చి అమ్మవారి జాతరలో పాల్గొని ఉత్సవాలను విజయవంతం చేయాలని ఆలయ కమిటీ విజ్ఞప్తి చేసింది.

అనకాపల్లి

అనకాపల్లి జిల్లాలో మూడు విడతల్లో పంచాయతీ ఎన్నికలు

అనకాపల్లి జిల్లాలో గ్రామ పంచాయతీల రెండో సాధారణ ఎన్నికల నిర్వహణకు నోటిఫికేషన్ విడుదల చేసినట్లు జిల్లా కలెక్టర్, జిల్లా ఎన్నికల అధికారి విజయ కృష్ణన్ శుక్రవారం తెలిపారు. జిల్లాలోని 24 మండలాల పరిధిలో మొత్తం 642 గ్రామ పంచాయతీలకు మూడు విడతల్లో ఎన్నికలు నిర్వహించనున్నట్లు వెల్లడించారు. ఇందుకోసం 6,335 పోలింగ్ కేంద్రాలను ఏర్పాటు చేశారు. జిల్లాలో మొత్తం 12,28,253 మంది ఓటర్లు తమ ఓటు హక్కును వినియోగించుకోనున్నారు. వీరిలో 5,98,959 మంది పురుషులు, 6,29,277 మంది మహిళలు, 17 మంది ఇతర ఓటర్లు ఉన్నారు. మొదటి విడతలో అనకాపల్లి, చోడవరం, పెందుర్తి నియోజకవర్గాల పరిధిలోని 8 మండలాల్లో 217 పంచాయతీలకు, రెండో విడతలో పాయకరావుపేట, యలమంచిలి నియోజకవర్గాల పరిధిలోని 8 మండలాల్లో 213 పంచాయతీలకు ఎన్నికలు జరగనున్నాయి. మూడో విడతలో మాడుగుల, నర్సీపట్నం నియోజకవర్గాల పరిధిలోని 8 మండలాల్లో 212 పంచాయతీలకు పోలింగ్ నిర్వహించనున్నట్లు కలెక్టర్ వివరించారు

అనకాపల్లి

స్థానిక ఎన్నికల్లో టీడీపీ అభ్యర్థుల విజయమే లక్ష్యం: ప్రగడ నాగేశ్వరరావు

మునగపాకలో సర్పంచ్ అభ్యర్థులు, ముఖ్య నాయకులతో ప్రత్యేక సమావేశం రాబోయే స్థానిక సంస్థల ఎన్నికల్లో తెలుగుదేశం పార్టీ బలపరిచిన అభ్యర్థుల విజయమే లక్ష్యంగా నాయకులు, కార్యకర్తలు సమష్టిగా పనిచేయాలని APRDC చైర్మన్, ఎలమంచిలి నియోజకవర్గ టీడీపీ ఇన్‌చార్జి ప్రగడ నాగేశ్వరరావు పిలుపునిచ్చారు. మునగపాక మండల టీడీపీ కార్యాలయంలో శుక్రవారం సర్పంచ్ అభ్యర్థులు, ముఖ్య నాయకులతో ప్రత్యేక సమావేశం నిర్వహించారు. ఈ సమావేశానికి ఆయన ముఖ్య అతిథిగా హాజరయ్యారు.ఈ సందర్భంగా ప్రగడ నాగేశ్వరరావు మాట్లాడుతూ కూటమి ప్రభుత్వం గ్రామీణ ప్రాంతాల అభివృద్ధికి ప్రాధాన్యతనిస్తూ పనిచేస్తోందన్నారు. మండలంలోని అన్ని పంచాయతీల్లో టీడీపీ బలపరిచిన సర్పంచ్ అభ్యర్థులు గెలుపొందేలా నాయకులు, కార్యకర్తలు సమన్వయంతో ముందుకు సాగాలని సూచించారు. ప్రభుత్వం అమలు చేస్తున్న సంక్షేమ పథకాలు, గ్రామాల్లో చేపడుతున్న అభివృద్ధి కార్యక్రమాలను ప్రజల్లోకి విస్తృతంగా తీసుకెళ్లాలని కోరారు.రాష్ట్ర మాజీ కార్యదర్శి కర్రీ సాయి కృష్ణ మాట్లాడుతూ కార్యకర్తల కష్టమే పార్టీకి అసలైన బలమని, ప్రతి బూత్ స్థాయిలో పార్టీని బలోపేతం చేస్తూ అభ్యర్థుల విజయానికి కృషి చేయాలని పిలుపునిచ్చారు.ఈ సమావేశంలో మునగపాక మండల టీడీపీ అధ్యక్షులు, సీనియర్ నాయకులు, వివిధ గ్రామాల సర్పంచ్ అభ్యర్థులు, పార్టీ నాయకులు, కార్యకర్తలు పెద్ద సంఖ్యలో పాల్గొన్నారు.

అనకాపల్లి

యలమంచిలిలో మహిళ అదృశ్యం.. ఆచూకీ కోసం పోలీసుల విజ్ఞప్తి

యలమంచిలి పట్టణంలో మహిళ అదృశ్యమైన ఘటన కలకలం రేపింది. కోర్టు పేట, భాష్యం స్కూల్ సమీపంలో నివాసం ఉంటున్న ఉప్పులూరి సునీత (36) ఈ నెల 12వ తేదీ ఉదయం ఇంటి నుంచి వెళ్లి తిరిగి రాలేదు. భర్త ఉప్పులూరు కిరణ్ కుమార్ మధ్యాహ్నం 1.20 గంటలకు ఇంటికి వచ్చి చూడగా ఆమె కనిపించలేదు. దీంతో రైల్వే స్టేషన్, ఆర్టీసీ కాంప్లెక్స్, పెంజేరువు ప్రాంతాలతో పాటు ఇతర తెలిసిన ప్రదేశాల్లో వెతికినా ఆచూకీ లభించలేదు. తల్లి, అన్నయ్య, బంధువులను విచారించినప్పటికీ ఆమె వారి వద్దకు వెళ్లినట్లు తెలియలేదు. దీంతో భర్త పోలీసులకు ఫిర్యాదు చేయగా, యలమంచిలి పట్టణ పోలీసులు మహిళ అదృశ్యమైనట్లు కేసు నమోదు చేశారు.అదృశ్యమైన సునీత తెలుపు రంగు కలిగి, సుమారు 5 అడుగుల 6 అంగుళాల ఎత్తు ఉంటుందని, చివరిగా బ్లూ, వైట్ రంగు చుడిదార్ ధరించిందని పోలీసులు తెలిపారు. మహిళ ఆచూకీ తెలిసినవారు లేదా ఎక్కడైనా కనిపిస్తే వెంటనే యలమంచిలి పట్టణ పోలీస్ స్టేషన్‌కు 9440796103 నంబర్‌కు సమాచారం అందించాలని ఎస్ఐ సావిత్రి ప్రజలకు విజ్ఞప్తి చేశారు.

అనకాపల్లి

పద్మనాభరాజుపేటలో వైభవంగా దీపాలంకరణ.. భక్తులను ఆకట్టుకున్న ఆలయ సౌందర్యం!

అనకాపల్లి జిల్లా యలమంచిలి మండలం పద్మనాభరాజుపేట గ్రామంలో ఆధ్యాత్మిక శోభ వెల్లివిరిసింది. గ్రామంలోని శ్రీ నూకాలమ్మ, శ్రీ దుర్గమ్మ, శ్రీ శివపార్వతుల ఆలయాలను రంగురంగుల విద్యుత్ దీపాలతో ప్రత్యేకంగా అలంకరించారు. దీపాల కాంతులతో ఆలయ ప్రాంగణం కన్నుల పండువగా మారి భక్తులను విశేషంగా ఆకట్టుకుంది.ఆలయాల అందాలను వీక్షించేందుకు గ్రామస్తులు, భక్తులు పెద్ద సంఖ్యలో తరలివచ్చి అమ్మవార్లను, శివపార్వతులను దర్శించుకుని ప్రత్యేక పూజలు నిర్వహించారు. ఈ సందర్భంగా గ్రామంలో భక్తి భావం వెల్లివిరిసింది. ఈ కార్యక్రమంపై టీడీపీ యలమంచిలి మండల ఆర్గనైజింగ్ సెక్రటరీ యడ్ల చినబాబు మాట్లాడుతూ.. ఇటువంటి ఆధ్యాత్మిక, సంప్రదాయ కార్యక్రమాలకు తమ సహాయ సహకారాలు ఎల్లప్పుడూ ఉంటాయని తెలిపారు. ఆలయాల దీపాలంకరణ గ్రామానికి ప్రత్యేక ఆకర్షణగా నిలిచింది.

అనకాపల్లి

ఏటికొప్పాకలో కూటమి విజయోత్సవ సంబరాలు.. విజేతలకు ఘన సన్మానం!

ప్రజల ఆదరణే మా విజయానికి పునాది.. గెలుపును గ్రామ ప్రజలకు అంకితం చేసిన నాయకులు ఏటికొప్పాక గ్రామంలో జడ్పీటీసీ, ఎంపీటీసీ ఎన్నికల్లో ఘన విజయం సాధించిన కూటమి అభ్యర్థులను ఆదివారం సాయంత్రం గ్రామ ప్రజలు, కూటమి నాయకులు, కార్యకర్తలు ఘనంగా సన్మానించారు. జడ్పీటీసీగా విజయం సాధించిన రావి చలపతి, ఎంపీటీసీ-1గా గెలుపొందిన రాయి నాగేశ్వరరావు, ఎంపీటీసీ-2గా విజయం సాధించిన అన్నం స్వరాజ్యరావులకు పూలమాలలు వేసి శాలువాలతో సత్కరించారు. అనంతరం కేక్ కట్ చేసి విజయోత్సవ సంబరాలు నిర్వహించారు.ఈ సందర్భంగా విజేతలు మాట్లాడుతూ.. ఈ విజయం తమ వ్యక్తిగత విజయం కాదని, ఏటికొప్పాక గ్రామ ప్రజలు, కూటమి నాయకులు, కార్యకర్తలు అందించిన అపారమైన ఆదరణ, నమ్మకం, కష్టానికి దక్కిన ఫలితమని భావోద్వేగంగా పేర్కొన్నారు. తమపై ఉంచిన నమ్మకాన్ని నిలబెట్టుకుంటూ గ్రామ అభివృద్ధికి నిరంతరం కృషి చేస్తామని, ప్రజల సమస్యల పరిష్కారానికి అందుబాటులో ఉంటామని హామీ ఇచ్చారు. ఈ విజయాన్ని గ్రామ ప్రజలకు, కూటమి శ్రేణులకు అంకితం చేస్తున్నట్లు తెలిపారు. ఈ కార్యక్రమం గ్రామంలో పండుగ వాతావరణాన్ని తలపించింది. గ్రామ ప్రజలు, కూటమి నాయకులు, కార్యకర్తలు పెద్ద సంఖ్యలో పాల్గొని విజేతలకు శుభాకాంక్షలు తెలియజేస్తూ ఆనందోత్సాహాల మధ్య విజయోత్సవాలను ఘనంగా నిర్వహించారు.