*అంగన్వాడీ సేవలను మరింత బలోపేతం చేసేందుకు ‘శిశు మహిళా సమృద్ధి’ యాప్*
*వినూత్న ఆలోచనతో ‘శిశు మహిళా సమృద్ధి’ యాప్ రూపకల్పన:జిల్లా కలెక్టర్
—————————————
*జనగామ జిల్లాలోనే తొలిసారిగా ‘శిశు మహిళా సమృద్ధి’ యాప్*
*అంగన్వాడీ కార్యకలాపాల పర్యవేక్షణకు సరికొత్త యాప్*
*వినూత్న ఆలోచనకు కార్యరూపం.. స్వయంగా యాప్ ను రూపొందించి, ప్రారంభించిన కలెక్టర్*
*లబ్ధిదారుల హాజరు, పోషకాహార సరఫరా, సిబ్బంది హాజరు, సెలవుల దరఖాస్తుకు ఒకే వేదిక*
*అంగన్వాడీ సిబ్బందిపై రిజిస్టర్లు, పునరావృత నివేదికల భారం తగ్గింపు*
*జిల్లా కలెక్టర్ సందీప్ కుమార్ ఝా*
మంగళవారం, జిల్లా సమీకృత కలెక్టర్ కార్యాలయంలోని మెయిన్ కాన్ఫరెన్స్ హాల్లో మహిళా, శిశు సంక్షేమ శాఖ ఆధ్వర్యంలో ఏర్పాటు చేసిన కార్యక్రమంలో భాగంగా జిల్లాలో అంగన్వాడీ సేవలను మరింత సమర్థవంతంగా, పారదర్శకంగా అందించేందుకు మహిళా అభివృద్ధి, శిశు సంక్షేమ శాఖకు సంబంధించి జనగామ జిల్లాలోనే మొదటిసారిగా వినూత్న ఆలోచనకు కార్యరూపంగా ‘శిశు మహిళా సమృద్ధి’ మొబైల్ యాప్ను *జిల్లా కలెక్టర్ సందీప్ కుమార్ ఝా* తానే స్వయంగా రూపొందించి, ప్రారంభించారు.
అంగన్వాడీ కేంద్రాల్లో ప్రతిరోజూ నిర్వహించే కార్యకలాపాలను ఒకే సరళమైన వేదికపైకి తీసుకురావడం ఈ యాప్ ప్రధాన ఉద్దేశమని *కలెక్టర్* తెలిపారు. దీని ద్వారా చిన్నారులు, గర్భిణులు, బాలింతలకు అందాల్సిన సేవలు ఎలాంటి అంతరాయం లేకుండా కొనసాగడంతో పాటు, అంగన్వాడీ సిబ్బందిపై ఉన్న పునరావృత రిజిస్టర్ల నిర్వహణ, నివేదికల భారం గణనీయంగా తగ్గుతుందని పేర్కొన్నారు.
ఒకసారి నమోదు చేసిన సమాచారం అన్ని స్థాయిల కార్యాలయాలకు అందుబాటులోకి రావడంతో ఒకే సమాచారాన్ని పలుమార్లు రిజిస్టర్లలో నమోదు చేయడం, పునరావృతంగా నివేదికలు సమర్పించడం వంటి ప్రక్రియలు గణనీయంగా తగ్గుతాయని *కలెక్టర్* తెలిపారు. తద్వారా అంగన్వాడీ సిబ్బంది తమ సమయాన్ని ప్రధానంగా చిన్నారులు, గర్భిణులు, బాలింతలకు మెరుగైన సేవలు అందించడంపై కేంద్రీకరించేందుకు అవకాశం కలుగుతుందని స్పష్టం చేశారు.
*యాప్ ప్రధానంగా నాలుగు అంశాలపై ఆధారపడి పనిచేస్తుంది*
*లబ్ధిదారుల హాజరు నమోదు:*
ప్రతి అంగన్వాడీ కేంద్రంలో హాజరయ్యే చిన్నారులు, గర్భిణులు, బాలింతల వివరాలను రోజువారీగా రియల్టైమ్లో యాప్లో నమోదు చేయవచ్చు. దీంతో ప్రతి కేంద్రంలో సేవల పరిధి, లబ్ధిదారుల హాజరు పరిస్థితి వెంటనే ఉన్నతాధికారులకు అందుబాటులో ఉంటుంది. వరుసగా గైర్హాజరవుతున్న చిన్నారుల కుటుంబాలను గుర్తించి అవసరమైన చర్యలు తీసుకునేందుకు కూడా ఇది దోహదపడుతుంది.
*పోషకాహార సరఫరా నిర్వహణ:*
అంగన్వాడీ కేంద్రాల్లో ఉన్న పోషకాహార పదార్థాల ప్రారంభ నిల్వ, వినియోగం, అందిన సరఫరా, మిగిలిన నిల్వ వివరాలను యాప్లోనే నమోదు చేయవచ్చు. దీంతో అవసరమైన సరఫరాను ముందుగానే అంచనా వేసి, ఏ కేంద్రంలోనూ పోషకాహార పదార్థాల కొరత ఏర్పడకుండా ముందస్తు చర్యలు తీసుకునే అవకాశం ఉంటుంది.
*తక్షణ పనితీరు పర్యవేక్షణ:*
అంగన్వాడీ కేంద్రాల్లో రోజువారీగా నిర్వహించే కార్యకలాపాల వివరాలు అదే రోజు సెక్టార్, ప్రాజెక్టు, జిల్లా స్థాయి అధికారులకు అందుబాటులోకి వస్తాయి. దీంతో మంచి పనితీరు కనబరుస్తున్న కేంద్రాలను వెంటనే గుర్తించడంతో పాటు, అదనపు సహాయం అవసరమైన కేంద్రాలకు తగిన సహకారం అందించేందుకు అవకాశం కలుగుతుంది.
*సెలవుల దరఖాస్తు సౌకర్యం:*
అంగన్వాడీ టీచర్లు, హెల్పర్లు తమ మొబైల్ ఫోన్ల నుంచే సెలవుల కోసం దరఖాస్తు చేసుకోవచ్చు. జిల్లా విధానాలకు అనుగుణంగా సంబంధిత అధికారులు సెలవులను ఆమోదిస్తారు. దీంతో సెలవుల కోసం సెక్టార్ లేదా ప్రాజెక్టు కార్యాలయాలకు సిబ్బంది స్వయంగా వెళ్లాల్సిన అవసరం ఉండదు.
అంగన్వాడీ సిబ్బంది మొబైల్ ఫోన్ ద్వారా ఫొటో, లొకేషన్తో హాజరు నమోదు చేయవచ్చు. నెట్వర్క్ సదుపాయం సరిగా లేని ప్రాంతాల్లో కూడా నమోదు చేసిన వివరాలు సేవ్ అవుతాయి. తిరిగి నెట్వర్క్ అందుబాటులోకి వచ్చిన వెంటనే ఆ వివరాలు స్వయంచాలకంగా సంబంధిత వ్యవస్థకు చేరుతాయి. దీంతో సిగ్నల్ సమస్యల కారణంగా సిబ్బందికి ఎలాంటి ఇబ్బంది కలగకుండా హాజరు, ఇతర వివరాల నమోదు కొనసాగుతుంది.
అంతకుముందు యాప్ వినియోగంపై అవగాహన కల్పించేందుకు *అదనపు కలెక్టర్ (రెవెన్యూ), జిల్లా సంక్షేమ అధికారి బెన్షాలోం* ఆధ్వర్యంలో శిక్షణా కార్యక్రమం నిర్వహించారు. జిల్లాలోని అంగన్వాడీ టీచర్లు, హెల్పర్లు, సూపర్వైజర్లు, శిశు అభివృద్ధి ప్రాజెక్టు అధికారులు శిక్షణలో పాల్గొని, యాప్ వినియోగం, హాజరు నమోదు, పోషకాహార నిల్వల నిర్వహణ, సెలవుల దరఖాస్తు, తదితర అంశాలపై అవగాహన పొందారు.
