పర్యాటక గుమ్మం ఖమ్మానికి కొత్త శోభ.. రూ.40 కోట్లతో ‘హరిత భవన్’… మంత్రి తుమ్మల చొరవతో వేగంగా అడుగులు.. జూపల్లికి లేఖ..

హైదరాబాద్, జూలై (పున్నమి న్యూస్ జిల్లా రిపోర్టర్/ పువ్వాడ నాగేంద్ర కుమార్ ) ఖమ్మం జిల్లాను రాష్ట్ర పర్యాటక పటంలో ప్రముఖంగా నిలిపేందుకు ప్రభుత్వం చర్యలు వేగవంతం చేస్తోంది. లకారం పార్క్ సమీపంలో సుమారు 5 ఎకరాల విస్తీర్ణంలో నిర్మించనున్న ‘హరిత భవన్’ ప్రాజెక్టుకు రూపకల్పన జరుగుతోంది. సుమారు రూ.40 కోట్ల అంచనా వ్యయంతో చేపట్టనున్న ఈ ప్రతిష్టాత్మక ప్రాజెక్టుపై వ్యవసాయ, మార్కెటింగ్, సహకార, చేనేత-జౌళి శాఖల మంత్రి తుమ్మల నాగేశ్వరరావు సచివాలయంలో ఉన్నతస్థాయి సమీక్ష నిర్వహించారు. ఈ సందర్భంగా మంత్రి తుమ్మల మాట్లాడుతూ.. “ఖమ్మం జిల్లా పర్యాటక గుమ్మంగా అభివృద్ధి చెందుతోంది. జిల్లాకు వచ్చే పర్యాటకులు, భక్తులు, వాణిజ్య సందర్శకులకు మెరుగైన వసతి సదుపాయాలు కల్పించేందుకు హరిత భవన్ ఎంతో ఉపయోగపడుతుంది” అని పేర్కొన్నారు. ‘హరిత హోటల్’ కాదు.. ‘హరిత భవన్’ లకారం పార్క్ పరిసరాల్లో నిర్మించనున్న ఆధునిక వసతి సముదాయానికి తొలుత ‘హరిత హోటల్’గా ప్రతిపాదించగా.. తెలంగాణ సంస్కృతి, సంప్రదాయాలను ప్రతిబింబించేలా దానికి **‘హరిత భవన్’**గా పేరు మార్చాలని మంత్రి సూచించారు. వెంటనే ప్రతిపాదనలు సిద్ధం చేయాలి ప్రాజెక్టు నిర్మాణానికి సుమారు రూ.40 కోట్ల వ్యయం అవుతుందని అధికారులు వివరించగా.. అవసరమైన ప్రతిపాదనలు వెంటనే సమర్పించాలని మంత్రి ఆదేశించారు. పరిపాలనా అనుమతులు త్వరితగతిన మంజూరు చేసి పనుల్లో ఎలాంటి జాప్యం లేకుండా చూడాలని సూచించారు. జూపల్లి కృష్ణారావుకు మంత్రి తుమ్మల లేఖ హరిత భవన్ నిర్మాణానికి అవసరమైన నిధులను త్వరగా మంజూరు చేయాలని కోరుతూ మంత్రి తుమ్మల నాగేశ్వరరావు పర్యాటక శాఖ మంత్రి జూపల్లి కృష్ణారావుకు లేఖ రాశారు. లేఖలో.. తెలంగాణ పర్యాటక అభివృద్ధి సంస్థ నియమించిన కన్సల్టెంట్ ప్రాథమిక అంచనా ప్రకారం ఈ ప్రాజెక్టు వ్యయం రూ.40 కోట్లుగా ఉందని, ఇప్పటికే జిల్లా యంత్రాంగం 5 ఎకరాల భూమిని గుర్తించి కేటాయించిందని తెలిపారు. ఖమ్మం ముఖచిత్రాన్ని మార్చే ప్రాజెక్టు హరిత భవన్ పూర్తయితే పర్యాటకులు, భక్తులు, వ్యాపార వర్గాలు, అధికారులకు నాణ్యమైన వసతి కల్పించడంతో పాటు సమావేశాలు, సదస్సులకు అంతర్జాతీయ స్థాయి వేదికగా ఉపయోగపడుతుందని మంత్రి పేర్కొన్నారు. ప్రాజెక్టుకు ప్రాధాన్యతతో అనుమతులు మంజూరు చేసి టెండర్ల ప్రక్రియ ప్రారంభించాలని జూపల్లి కృష్ణారావును మంత్రి తుమ్మల కోరారు. ఈ భవన్ నిర్మాణంతో ఖమ్మం జిల్లా రాష్ట్ర పర్యాటక రంగంలో మరింత ప్రత్యేక గుర్తింపు పొందుతుందని అధికారులు అభిప్రాయపడుతున్నారు.