కాలం చెల్లిన చిక్కీలు.. HMకు మెమో
మనుబోలు జడ్పీ బాలికల పాఠశాలలో విద్యార్థులకు కాలపరిమితి ముగిసిన చిక్కీలు పంపిణీ చేసిన ఘటనపై ప్రధానోపాధ్యాయుడు నరేంద్రనాథ్ చౌదరికి డీఈవో బాలాజీరావు మెమో జారీ చేశారు. ఘటనపై పూర్తి వివరణ ఇవ్వాలని ఆదేశించారు. శుక్రవారం గూడూరు డిప్యూటీ డీఈవో సనత్కుమార్ ఆధ్వర్యంలోని టాస్క్ఫోర్స్ బృందం పాఠశాలలో తనిఖీలు నిర్వహించింది. తనిఖీల్లో పాడైపోయిన చిక్కీలను విద్యార్థులకు పంపిణీ చేసినట్లు అధికారులు గుర్తించారు. దీంతో పాఠశాల నిర్వహణపై అధికారులు తీవ్రంగా స్పందించారు. విద్యార్థులకు నాణ్యమైన ఆహార పదార్థాలు అందించాల్సిన బాధ్యతను గుర్తుచేస్తూ, నిర్లక్ష్యంపై వివరణ కోరారు. సంబంధిత వివరాలను పరిశీలించిన అనంతరం తదుపరి చర్యలు తీసుకుంటామని అధికారులు తెలిపారు. విద్యార్థుల ఆరోగ్య భద్రత విషయంలో ఎలాంటి నిర్లక్ష్యాన్ని సహించబోమని స్పష్టం చేశారు.
