మూడు నెలలుగా పంచాయతీ చుట్టూ తిరుగుతున్నా సమస్య పరిష్కారం కాలేదని ఆవేదన
రాజకీయ విభేదాలను పక్కనపెట్టి అభివృద్ధికి సహకరించాలని విజ్ఞప్తి
వాంకిడి, పున్నమి ప్రతినిధి,(తేది :19.09.2026): ఆసిఫాబాద్ జిల్లా వాంకిడి మేజర్ గ్రామపంచాయతీలో ఉప సర్పంచ్ సంతకం జాప్యం కారణంగా తీవ్ర ఇబ్బందులు ఎదుర్కొంటున్నానని కాంట్రాక్టర్ మండోకర్ అనిల్ ఆవేదన వ్యక్తం చేశారు. తాను చేపట్టిన అభివృద్ధి పనులకు సంబంధించిన పంచాయతీ ప్రక్రియలో సర్పంచ్, పంచాయతీ కార్యదర్శి సంతకాలు పూర్తయినప్పటికీ ఉప సర్పంచ్ సంతకం మాత్రం పెండింగ్లో ఉందని తెలిపారు.
గత మూడు నెలలుగా సంతకం కోసం గ్రామపంచాయతీ కార్యాలయం చుట్టూ తిరుగుతున్నప్పటికీ సమస్య పరిష్కారం కాలేదని అనిల్ పేర్కొన్నారు. గత సర్పంచ్ ఎన్నికల సమయంలో ఏర్పడిన రాజకీయ విభేదాల ప్రభావంతోనే తన పనులకు సంబంధించిన ప్రక్రియలో జాప్యం జరుగుతోందని ఆయన ఆరోపించారు. అయితే ఈ ఆరోపణలపై సంబంధిత ఉప సర్పంచ్ వివరణ అందాల్సి ఉంది.
“చంపేస్తే… ఒకేసారి చంపేయ్.. మానసిక క్షోభకు గురిచేయొద్దు”
సంతకం జాప్యంతో తాను ఎదుర్కొంటున్న మానసిక వేదనను వ్యక్తం చేస్తూ కాంట్రాక్టర్ అనిల్ తీవ్ర ఆవేదన వ్యక్తం చేశారు. “మరి ఇంతలా టార్చర్ చేస్తావా… నీకేం నేను అన్యాయం చేశాను” అంటూ తన పరిస్థితిని వెల్లడించారు. ఒక సంతకం కోసం ఇంతకాలం వేచి ఉండాల్సి రావడం వల్ల ఆర్థికంగా, వ్యక్తిగతంగా ఇబ్బందులు ఎదురవుతున్నాయని తెలిపారు.
అభివృద్ధి పనులకు రాజకీయాలు అడ్డుకావొద్దు
ఎన్నికల సమయంలో ఉన్న రాజకీయ విభేదాలను పక్కనపెట్టి గ్రామ అభివృద్ధికి అందరూ సహకరించాలని అనిల్ కోరారు. ప్రజల అవసరాల కోసం చేపట్టే అభివృద్ధి పనులు వ్యక్తిగత లేదా రాజకీయ విభేదాల కారణంగా ఆలస్యం కాకూడదన్నారు. పంచాయతీకి సంబంధించిన ప్రతి ప్రక్రియ నిబంధనల ప్రకారం పారదర్శకంగా జరిగేలా అధికారులు పర్యవేక్షించాలని విజ్ఞప్తి చేశారు.
“పనులు నాణ్యంగా ఉన్నాయి” – వార్డు సభ్యురాలు
వాంకిడి గ్రామపంచాయతీ 11వ వార్డు సభ్యురాలు నాగోసే తానుబాయి మాట్లాడుతూ కాంట్రాక్టర్ మండోకర్ అనిల్ చేపట్టిన పనులు నాణ్యంగా ఉన్నాయని తెలిపారు. ప్రజలకు ఉపయోగపడే విధంగా పనులు చేపట్టారని పేర్కొన్నారు. అభివృద్ధి పనులకు సంబంధించిన ప్రక్రియలో జాప్యం జరిగితే దాని ప్రభావం ప్రజలపై పడే అవకాశం ఉందని, అధికారులు సమస్యను పరిశీలించి నిబంధనల ప్రకారం పరిష్కరించాలని కోరారు.
అధికారుల జోక్యం అవసరం
ఉప సర్పంచ్ సంతకం ఎందుకు పెండింగ్లో ఉంది? పనులకు సంబంధించిన పత్రాలు నిబంధనలకు అనుగుణంగా ఉన్నాయా? ప్రక్రియ ఏ దశలో నిలిచిపోయింది? అనే అంశాలపై సంబంధిత అధికారులు విచారణ జరిపి స్పష్టత ఇవ్వాల్సిన అవసరం ఉందని స్థానికులు కోరుతున్నారు.
కలెక్టర్ను ఆశ్రయించిన కాంట్రాక్టర్
మూడు నెలలుగా సమస్య పరిష్కారం కాకపోవడంతో జిల్లా కలెక్టర్ను ఆశ్రయించి తనకు న్యాయం చేయాలని కాంట్రాక్టర్ మండోకర్ అనిల్ విజ్ఞప్తి చేశారు. సమస్యపై పూర్తిస్థాయి విచారణ జరిపి వాస్తవ పరిస్థితులను పరిశీలించాలని, నిబంధనల ప్రకారం పంచాయతీ ప్రక్రియను ముందుకు తీసుకెళ్లేలా సంబంధిత అధికారులకు ఆదేశాలు ఇవ్వాలని కోరారు.
ఈ వ్యవహారంపై సంబంధిత ఉప సర్పంచ్, పంచాయతీ అధికారులు ఏ విధంగా స్పందిస్తారో వేచి చూడాల్సి ఉంది.
