రూ. 4.5 లక్షల ట్రాక్టర్ చోరీ కేసు ఛేద్యం: ఇద్దరు నిందితుల అరెస్ట్

శ్రీ కాళహస్తి, జూన్ 03, (పున్నమి న్యూస్) : శ్రీకాళహస్తి మండల పరిధిలో జరిగిన ఒక ట్రాక్టర్ దొంగతనం కేసును పోలీసులు చాకచక్యంగా ఛేదించి, ఇద్దరు నిందితులను అరెస్ట్ చేశారు. స్థానిక సీఐ ఇబ్రహీం తెలిపిన వివరాల ప్రకారం.. అరవకొత్తూరు గ్రామానికి చెందిన మునివేలు అనే రైతుకు చెందిన రూ. 4.5 లక్షల విలువైన ట్రాక్టర్ గత నెల 20వ తేదీన చోరీకి గురైంది. బాధితుడి ఫిర్యాదు మేరకు కేసు నమోదు చేసిన పోలీసులు ప్రత్యేక బృందాలతో ముమ్మర దర్యాప్తు చేపట్టారు. ఈ క్రమంలో విశ్వసనీయ సమాచారం మేరకు మే 31 ఆదివారం సాయంత్రం పోలీసులు నిందితుల కోసం గాలింపు చేపట్టగా.. చంద్రశేఖర్, సుధీర్ అనే ఇద్దరు వ్యక్తులు అనుమానాస్పదంగా కనిపిస్తూ పట్టుబడ్డారు. వారిని అదుపులోకి తీసుకుని తమదైన శైలిలో విచారించగా, మునివేలు ట్రాక్టర్‌ను తామే దొంగిలించినట్లు నిందితులు నేరాన్ని అంగీకరించారు. దీంతో వారి వద్ద నుండి దొంగిలించబడిన ట్రాక్టర్‌ను స్వాధీనం చేసుకున్నట్లు సీఐ వెల్లడించారు. రికవరీ చేసిన వాహనంతో పాటు నిందితులిద్దరిని కోర్టులో హాజరుపరుస్తున్నట్లు ఆయన పేర్కొన్నారు. ఇంత తక్కువ సమయంలో కేసును ఛేదించి, రైతుకు న్యాయం చేసిన పోలీసు సిబ్బందిని స్థానికులు అభినందించారు.