విద్యార్థుల భద్రతకు ప్రభుత్వం తక్షణ చర్యలు తీసుకోవాలి: దుర్గం దినకర్
కెరమెరి, ఆగస్టు 12, 2026:కుమురం భీం ఆసిఫాబాద్ జిల్లా కెరమెరి మండలం ఇందాపూర్ గ్రామంలోని ప్రభుత్వ పాఠశాల భవనం శిథిలావస్థకు చేరుకోవడంతో విద్యార్థుల భద్రతపై ఆందోళన వ్యక్తమవుతోంది. పాఠశాల భవనాన్ని వెంటనే పునర్నిర్మించడంతో పాటు విద్యార్థులకు కనీస మౌలిక వసతులు కల్పించాలని KVPS జిల్లా కార్యదర్శి దుర్గం దినకర్ ప్రభుత్వాన్ని డిమాండ్ చేశారు.
పాఠశాలలో సుమారు 86 మంది విద్యార్థులు విద్యనభ్యసిస్తున్నప్పటికీ విద్యార్థుల సంఖ్యకు అనుగుణంగా తరగతి గదులు, ఉపాధ్యాయులు, భద్రమైన భవనం వంటి కనీస సౌకర్యాలు లేకపోవడం బాధాకరమన్నారు. ప్రస్తుతం ఉన్న భవనం ఎప్పుడు ఏ ప్రమాదం జరుగుతుందో తెలియని పరిస్థితిలో ఉందని ఆవేదన వ్యక్తం చేశారు.
విద్యార్థుల భద్రతపై ప్రత్యేక దృష్టి
పాఠశాల భవనాన్ని అధికారులు తక్షణమే క్షేత్రస్థాయిలో పరిశీలించి, నూతన భవనం నిర్మాణానికి చర్యలు చేపట్టాలని దుర్గం దినకర్ కోరారు. విద్యార్థుల సంఖ్యకు అనుగుణంగా అదనపు తరగతి గదులు, తాగునీరు, మరుగుదొడ్లు, ఇతర మౌలిక సదుపాయాలు కల్పించాలని డిమాండ్ చేశారు.
ఈ సమస్యలపై జిల్లా విద్యాధికారి సదానందం చారికి ఇందాపూర్ గ్రామ సర్పంచ్, గ్రామస్తులతో కలిసి KVPS ఆధ్వర్యంలో వినతిపత్రం అందజేశారు.
“గిరిజన గ్రామాల్లో విద్యా వసతులు అందని ద్రాక్ష”
ఈ సందర్భంగా దుర్గం దినకర్ మాట్లాడుతూ.. గిరిజన గ్రామాల్లోని ప్రభుత్వ పాఠశాలలకు కనీస విద్యా వసతులు కల్పించడంలో ప్రభుత్వం నిర్లక్ష్యం చేయడం సరికాదన్నారు. గ్రామీణ ప్రాంతాల్లోని పాఠశాలలను బలోపేతం చేసి విద్యార్థులకు నాణ్యమైన విద్య అందేలా ప్రభుత్వం ప్రత్యేక చర్యలు చేపట్టాలని కోరారు.
“విద్యార్థుల భవిష్యత్తు, భద్రతను దృష్టిలో పెట్టుకుని ఇందాపూర్ పాఠశాల సమస్యను వెంటనే పరిష్కరించాలి. శిథిల భవనంలో విద్యార్థులు చదువుకోవాల్సిన పరిస్థితి లేకుండా నూతన భవనం నిర్మించాలి” అని డిమాండ్ చేశారు.
పరిష్కారం కాకపోతే ఆందోళన
పాఠశాల సమస్యలను ప్రభుత్వం వెంటనే పరిష్కరించకపోతే గ్రామ ప్రజలు, విద్యార్థుల తల్లిదండ్రులతో కలిసి ఆందోళన చేపట్టాల్సి వస్తుందని దుర్గం దినకర్ హెచ్చరించారు.
ఈ కార్యక్రమంలో వెలిశాల కృష్ణమాచారి, సీఐటీయూ జిల్లా సంయుక్త కార్యదర్శి, ఇందాపూర్ గ్రామపంచాయతీ సర్పంచ్, గ్రామస్తులు, యువకులు తదితరులు పాల్గొన్నారు.
తేదీ: 12-08-2026పున్నమి రిపోర్టర్: దుర్గం శ్రీనివాస్
