11వ వార్డులో డ్రైనేజీ మెయిన్ వాల్వ్ మూత నిర్లక్ష్యం
ప్రమాదాలకు ఆహ్వానం పలుకుతున్న తెరిచి ఉన్న డ్రైనేజీ – వెంటనే మరమ్మతులు చేపట్టాలని ప్రజల విజ్ఞప్తి
యాచారం, జూలై 22:
రంగారెడ్డి జిల్లా యాచారం మండలంలోని మేడిపల్లి నక్కర్త గ్రామపంచాయతీ పరిధి 11వ వార్డులో ఇటీవల చేపట్టిన డ్రైనేజీ క్లీనింగ్ పనుల అనంతరం మెయిన్ డ్రైనేజీ వాల్వ్ మూతను సక్రమంగా అమర్చకపోవడంతో స్థానికులు తీవ్ర ఆందోళన వ్యక్తం చేస్తున్నారు. సంబంధిత అధికారులు పనులు పూర్తి చేసినప్పటికీ డ్రైనేజీ మూతను నిర్లక్ష్యంగా వదిలేయడంతో ప్రజలకు నిత్యం ఇబ్బందులు ఎదురవుతున్నాయని స్థానికులు ఆరోపిస్తున్నారు.
ప్రధాన వీధిలో ఉన్న ఈ డ్రైనేజీ మెయిన్ వాల్వ్ మూత సరిగా లేకపోవడంతో వాహనాల రాకపోకలకు తీవ్ర అంతరాయం కలుగుతోంది. ముఖ్యంగా ద్విచక్ర వాహనదారులు, వృద్ధులు, మహిళలు ఈ ప్రాంతంలో ప్రయాణించే సమయంలో ప్రమాదాల బారిన పడే అవకాశం ఉందని స్థానికులు ఆందోళన వ్యక్తం చేస్తున్నారు.
అంతేకాకుండా ప్రతిరోజూ సాయంత్రం పాఠశాలల నుంచి వచ్చిన చిన్నారులు ఈ వీధిలో ఆటలు ఆడుకుంటూ ఉంటారని, ఎప్పుడైనా ప్రమాదవశాత్తు డ్రైనేజీ గుంతలో పడే ప్రమాదం ఉందని తల్లిదండ్రులు భయాందోళన వ్యక్తం చేస్తున్నారు. ఏదైనా ప్రమాదం జరిగిన తర్వాత స్పందించడం కంటే ముందుగానే అధికారులు చర్యలు తీసుకోవాలని వారు కోరుతున్నారు.
డ్రైనేజీ మూత సరిగా లేకపోవడంతో లోపలి నుంచి తీవ్ర దుర్వాసన వెలువడుతోంది. దీంతో పరిసర ప్రాంత ప్రజలు ఇళ్లలో ఉండలేని పరిస్థితి ఏర్పడిందని స్థానికులు చెబుతున్నారు. వర్షాకాలం కావడంతో దోమల సంఖ్య కూడా విపరీతంగా పెరిగి, డెంగ్యూ, మలేరియా, వైరల్ జ్వరాలు వంటి వ్యాధులు ప్రబలే ప్రమాదం ఉందని ఆందోళన వ్యక్తం చేస్తున్నారు.
గ్రామపంచాయతీ అధికారులు ప్రజల భద్రతను దృష్టిలో పెట్టుకుని వెంటనే డ్రైనేజీ మెయిన్ వాల్వ్ మూతను సక్రమంగా అమర్చాలని, అవసరమైతే కొత్త మూత ఏర్పాటు చేయాలని స్థానికులు విజ్ఞప్తి చేస్తున్నారు. అదేవిధంగా గ్రామంలోని ఇతర డ్రైనేజీ మూతల పరిస్థితిని కూడా పరిశీలించి ఇలాంటి సమస్యలు పునరావృతం కాకుండా చర్యలు తీసుకోవాలని కోరుతున్నారు.
స్థానికుల పలుమార్లు విజ్ఞప్తి చేసినప్పటికీ ఇప్పటి వరకు ఎలాంటి చర్యలు తీసుకోలేదని వారు ఆరోపిస్తున్నారు. ప్రమాదం జరిగే వరకు వేచి చూడకుండా గ్రామపంచాయతీ పాలకవర్గం, సంబంధిత అధికారులు వెంటనే స్పందించి సమస్యను శాశ్వతంగా పరిష్కరించాలని ప్రజలు కోరుతున్నారు. ప్రజల ప్రాణాలకు ముప్పుగా మారిన ఈ డ్రైనేజీ సమస్యను అత్యవసరంగా పరిష్కరించి, సురక్షితమైన వాతావరణాన్ని కల్పించాలని 11వ వార్డు ప్రజలు విజ్ఞప్తి చేస్తున్నారు.
