గో టు విలేజ్ కార్యక్రమాన్ని విజయవంతం చేద్దాం
మాదిగ జాతి ఐక్యత, విద్యా చైతన్యం, సామాజిక పురోగతే లక్ష్యం
పున్నమి న్యూస్ ప్రతినిధి
20 జూన్ 2026
రంగారెడ్డి జిల్లా ఇబ్రహీంపట్నం నియోజకవర్గం ఇంచార్జ్
9640204826
మాదిగ జాతి ఆశాకిరణం, దండోరా ఉద్యమ దళపతి మందకృష్ణ మాదిగ ఆలోచనలు, ఆశయాలను గ్రామ గ్రామాన తీసుకెళ్లేందుకు “గో టు విలేజ్” కార్యక్రమాన్ని విజయవంతం చేయాలని ఎంఆర్పీఎస్ నాయకులు పిలుపునిచ్చారు. నేటి సమాజంలో విద్యార్థులు విద్యపై దృష్టి సారించాల్సిన సమయంలో మొబైల్ ఫోన్లు, సోషల్ మీడియా, రీల్స్, ఆన్లైన్ గేమ్స్ వంటి వాటికి ఎక్కువ సమయం కేటాయిస్తూ తమ భవిష్యత్తును ప్రమాదంలో పడేస్తున్నారని ఆందోళన వ్యక్తం చేశారు.
గ్రామాల్లోని విద్యార్థులను కలిసి విద్య యొక్క ప్రాముఖ్యత, ఉన్నత చదువుల ద్వారా సాధించగల అవకాశాలు, ప్రభుత్వ ఉద్యోగాల విలువ, పోటీ పరీక్షల ప్రాధాన్యత గురించి అవగాహన కల్పించాలని నిర్ణయించారు. యువత తమ లక్ష్యాలను నిర్దేశించుకుని సమాజానికి ఉపయోగపడే వ్యక్తులుగా ఎదగాలని సూచించారు.
అదేవిధంగా గ్రామాల్లో చిన్న చిన్న మనస్పర్థలు, విభేదాల కారణంగా దూరమైన పెద్దలను, కుటుంబాలను, సామాజిక వర్గాలను మళ్లీ ఒకే వేదికపైకి తీసుకువచ్చి ఐక్యత, సంఘటిత శక్తి యొక్క ప్రాముఖ్యతను వివరించాలని నాయకులు తెలిపారు. జాతి అభివృద్ధికి ఐకమత్యమే ప్రధాన బలమని, పరస్పర సహకారంతోనే సామాజిక, రాజకీయ, ఆర్థిక రంగాల్లో పురోగతి సాధ్యమవుతుందని పేర్కొన్నారు.
మహిళా అక్కచెల్లెమ్మలను కలిసి మహిళా సాధికారత, రాజకీయ చైతన్యం, విద్య మరియు ఉపాధి అవకాశాలపై అవగాహన కల్పించాలని నిర్ణయించారు. సమాజ నిర్మాణంలో మహిళల పాత్ర ఎంతో కీలకమని, ప్రతి కుటుంబ అభివృద్ధికి మహిళా శక్తి తోడ్పాటే ప్రధానమని వివరించారు.
అలాగే మాదిగ జాతి హక్కుల సాధన కోసం మందకృష్ణ మాదిగ చేసిన త్యాగాలు, ఉద్యమాలు, పోరాటాల చరిత్రను యువతకు, ప్రజలకు తెలియజేసి జాతి చైతన్యాన్ని మరింత బలోపేతం చేయాలని పిలుపునిచ్చారు. దండోరా ఉద్యమం ద్వారా సాధించిన విజయాలు, భవిష్యత్తులో సాధించాల్సిన లక్ష్యాల గురించి గ్రామస్థులకు వివరించాలని నిర్ణయించారు.
గ్రామాల్లో సమావేశాలు నిర్వహిస్తూ విద్య, ఉపాధి, సామాజిక చైతన్యం, రాజకీయ అవగాహన, జాతి ఐక్యత వంటి అంశాలపై ప్రజలతో చర్చలు జరిపి సమాజ పురోగతికి కృషి చేయాలని నాయకులు పేర్కొన్నారు. ప్రతి కార్యకర్త జాతిపట్ల అంకితభావంతో, సమయస్ఫూర్తితో పనిచేస్తూ మందకృష్ణ మాదిగ గారికి మరియు దండోరా ఉద్యమానికి ప్రజల మధ్య వారధిగా నిలవాలని పిలుపునిచ్చారు.
ఈ కార్యక్రమంలో ఎంఆర్పీఎస్ మండల అధ్యక్షుడు మూలి మహేష్ మాదిగ, మండల అధికార ప్రతినిధి మస్కు యాదగిరి మాదిగ, ఉపాధ్యక్షుడు చిన్నోళ్ల యాదయ్య మాదిగ, చింతపట్ల గ్రామ శాఖ అధ్యక్షుడు కొండ్ర శంకర్ మాదిగ, కొత్త పవన్ మాదిగ, కొమ్మగళ్ల రాజు మాదిగ, జిల్లా శంకర్ మాదిగ, కుంటి శంకర్ మాదిగ తదితరులు పాల్గొని “గో టు విలేజ్” కార్యక్రమాన్ని విజయవంతం చేయాలని, మాదిగ జాతిని మరింత సంఘటితం చేసి సామాజిక న్యాయం సాధన దిశగా ముందుకు తీసుకెళ్లాలని పిలుపునిచ్చారు.
