ఖమ్మం–వరంగల్–నల్గొండ పట్టభద్రుల శాసన మండలి నియోజకవర్గ ఓటర్ల జాబితా రూపకల్పన ప్రక్రియ త్వరలో ప్రారంభం కానుంది. ఈ నెల 28న ఎన్నికల సంఘం నోటిఫికేషన్ జారీ చేయనున్నట్లు సమాచారం. నవంబర్ 6లోగా అర్హులైన పట్టభద్రులు ఫారం–18 ద్వారా ఓటరుగా నమోదు చేసుకోవాలి. నవంబర్ 20న ముసాయిదా ఓటర్ల జాబితాను, డిసెంబర్ 30న తుది జాబితాను విడుదల చేయనున్నారు. గతంలో ఓటరుగా నమోదైన పట్టభద్రులు సైతం కొత్తగా ఫారం–18 సమర్పించాల్సి ఉంటుంది. 2024లో జరిగిన ఎమ్మెల్సీ ఎన్నికల్లో ఈ నియోజకవర్గంలో 3,36,013 మంది ఓటు హక్కును వినియోగించుకున్నారు. అర్హులైన పట్టభద్రులు గడువులోగా నమోదు చేసుకోవాలని అధికారులు సూచిస్తున్నారు.
