వార్త ముఖ్యాంశాలు
- నెల్లూరు జిల్లాలో చారిత్రక, రాజకీయ, సాంస్కృతిక ప్రత్యేకత కలిగిన నియోజకవర్గం కోవూరు.
- ఒకప్పుడు ఎర్రజెండాలు ఎగిరిన ఈ నేల కార్మిక, కర్షక ఉద్యమాలకు పురిటిగడ్డగా నిలిచింది.
- దక్షిణ భారత ఉద్యమ సూర్యుడిగా పేరొందిన పుచ్చలపల్లి సుందరయ్య జన్మించిన అలగానిపాడు ఈ నియోజకవర్గంలోనే ఉంది.
నెల్లూరు జిల్లాలో చారిత్రక, రాజకీయ, సాంస్కృతిక ప్రత్యేకత కలిగిన నియోజకవర్గం కోవూరు. ఒకప్పుడు ఎర్రజెండాలు ఎగిరిన ఈ నేల కార్మిక, కర్షక ఉద్యమాలకు పురిటిగడ్డగా నిలిచింది. దక్షిణ భారత ఉద్యమ సూర్యుడిగా పేరొందిన పుచ్చలపల్లి సుందరయ్య జన్మించిన అలగానిపాడు ఈ నియోజకవర్గంలోనే ఉంది. కవికోకిల దువ్వూరి రామిరెడ్డి వంటి ప్రముఖులకు కూడా కోవూరు ప్రాంతంతో అనుబంధం ఉంది.
పచ్చని మాగాణులు, సారవంతమైన పంట పొలాలు కోవూరు ప్రత్యేకత. పెన్నా నది, పైడేరు, మాలిదేవి వాగులు ఈ ప్రాంత వ్యవసాయానికి జీవనాధారాలుగా నిలుస్తున్నాయి. ఆక్వా సాగు, చేనేత, మత్స్యకార వృత్తులు కూడా ఇక్కడి జీవన విధానంలో కీలకం. జొన్నవాడ, రామతీర్థం, గంగపట్నం వంటి పుణ్యక్షేత్రాలు ఆధ్యాత్మిక గుర్తింపును తెచ్చాయి. ఇందుకూరుపేట ప్రాంతం పచ్చదనంతో ఆకట్టుకుంటుంది. తమలపాకు, అరటి పంటలు, పాటూరు చీరలు ఈ ప్రాంత ప్రత్యేకతను చాటుతాయి. జాతీయ రహదారి, రైల్వే మార్గం, సాగర తీరం కోవూరుకు అదనపు బలం. ఉద్యమాలు, వ్యవసాయం, సాహిత్యం, రాజకీయం, ఆధ్యాత్మికత కలగలిసిన కోటి గొంతుకల నేల కోవూరు.
