గోవింద నామస్మరణతో మారుమోగనున్న అప్పలాయగుంట
పున్నమి ప్రతినిధి వడమాల పేట మండలం
అప్పలాయగుంటలోని శ్రీ ప్రసన్న వేంకటేశ్వరస్వామివారి ఆలయంలో వార్షిక బ్రహ్మోత్సవాలకు బుధవారం సాయంత్రం శాస్త్రోక్తంగా అంకురార్పణ మహోత్సవం వైభవంగా నిర్వహించారు. సాయంత్రం 6.30 గంటల నుండి రాత్రి 8 గంటల వరకు జరిగిన ఈ కార్యక్రమంలో ముందుగా మేదినిపూజ నిర్వహించి, అనంతరం సేనాధిపతి ఉత్సవాన్ని చేపట్టారు.
సంప్రదాయం ప్రకారం శ్రీ విష్వక్సేనులవారు నాలుగు మాడవీధుల్లో విహరించి బ్రహ్మోత్సవాల ఏర్పాట్లను పరిశీలించి, అన్ని కార్యక్రమాలు నిర్విఘ్నంగా జరిగేలా అనుగ్రహిస్తారని భక్తుల విశ్వాసం. అనంతరం యాగశాలలో అంకురార్పణ నిర్వహించి బ్రహ్మోత్సవాలకు మంగళారంభం పలికారు.
జూన్ 25న ధ్వజారోహణంతో బ్రహ్మోత్సవాల ప్రారంభం
జూన్ 25 గురువారం ఉదయం 8.30 గంటల నుండి 9.00 గంటల మధ్య కర్కాటక లగ్నంలో ధ్వజారోహణం నిర్వహించి బ్రహ్మోత్సవాలను ప్రారంభించనున్నారు. రాత్రి 7 గంటలకు పెద్దశేష వాహనంపై శ్రీ ప్రసన్న వేంకటేశ్వరస్వామివారు ఆలయ మాడవీధుల్లో విహరించి భక్తులను అనుగ్రహించనున్నారు.
దివ్య వాహనసేవలతో భక్తులకు ఆధ్యాత్మికానందం
బ్రహ్మోత్సవాల్లో ప్రతిరోజూ ఉదయం 8 నుండి 9 గంటల వరకు, రాత్రి 7 నుండి 8 గంటల వరకు స్వామివారు వివిధ దివ్య వాహనాలపై విహరించి భక్తులకు దర్శనభాగ్యం కల్పించనున్నారు.
వాహనసేవల వివరాలు
జూన్ 25 – ధ్వజారోహణం, పెద్దశేష వాహనం
జూన్ 26 – చిన్నశేష వాహనం, హంస వాహనం
జూన్ 27 – సింహ వాహనం, ముత్యపుపందిరి వాహనం
జూన్ 28 – కల్పవృక్ష వాహనం, కల్యాణోత్సవం, సర్వభూపాల వాహనం
జూన్ 29 – మోహినీ అవతారం, గరుడ వాహనం
జూన్ 30 – హనుమంత వాహనం, గజ వాహనం
జూలై 1 – సూర్యప్రభ వాహనం, చంద్రప్రభ వాహనం
జూలై 2 – రథోత్సవం, అశ్వవాహనం
జూలై 3 – చక్రస్నానం, ధ్వజావరోహణం
భక్తి, సంగీత, సాంస్కృతిక కార్యక్రమాలు
బ్రహ్మోత్సవాల సందర్భంగా టీటీడీ హిందూ ధర్మప్రచార పరిషత్, దాససాహిత్య ప్రాజెక్టుల ఆధ్వర్యంలో ప్రతిరోజూ ఆధ్యాత్మిక ప్రసంగాలు, భక్తి సంగీత కార్యక్రమాలు, భజనలు, కోలాటాలు, సాంస్కృతిక ప్రదర్శనలు నిర్వహించి భక్తుల్లో ఆధ్యాత్మిక చైతన్యాన్ని పెంపొందించనున్నారు.
ఈ కార్యక్రమంలో కంకణ భట్టర్ శ్రీ సూర్యకుమార్ ఆచార్యులు, టిటిడి డిప్యూటీ ఈవో శ్రీ హరీంద్రనాథ్, ఏఈవో శ్రీ దేవరాజులు, సూపరింటెండెంట్ శ్రీమతి శ్రీవాణి, వీజీవో శ్రీ వి.గిరిధర్, అదనపు హెల్త్ ఆఫీసర్ డా. సునీల్, ఏవీఎస్వో శ్రీ రాధాకృష్ణ, టెంపుల్ ఇన్స్పెక్టర్ శ్రీ వేణుగోపాల్, ఆలయ అర్చకులు, ఇతర అధికారులు, శ్రీవారి సేవకులు పాల్గొన్నారు.
—————————-
టీటీడీ ముఖ్య ప్రజా సంబంధాల అధికారిచే విడుదల చేయబడినది.
