డైనింగ్ టైం మర్యాద : మీ ఆఫీసు లో కొలీగో, లేక వ్యాపారం లో మిత్రుడో, మీ కంపెనీ వెండరో, మిమ్ములను హోటల్ కి డిన్నర్ కి ఆహ్వానించారు అనుకుందాం . లేదా , మీ పై అధికారి కానీ, కొలీగ్ కానీ,వారి పుట్టిన రోజు, లేదా ఏదైనా శుభ సమయం సందర్భం గా కొందరు సహోద్యోగులను మీ ఊరిలోని మంచి హోటల్ కి తీసుకు వెళ్ళారు అనుకోండి .
డబ్బు చెల్లించేది మీరు కాక పోయినా, ‘ మెనూ ‘ మరియు ధరల పట్టిక చూడండి . అన్నింటికంటే ఖరీదయిన ఐటం ఆర్డర్ చెయ్యకండి ! బాగుండదు ! అన్నింటికన్నా ఉత్తమం ఏమిటంటే , ఎవరైతే పేచేస్తారో , వారినే ఆర్డర్ చెయ్యమని చెప్పండి ! ‘ నువ్వు మా అందరినీ తీసుకు వచ్చావు కాబట్టి, నా వరకూ , నువ్వు ఏది ఆర్డర్ చేసినా నాకు వోకే ! ‘ అని చెప్పండి . మీరు శాకాహారి అయితే , ఆవిషయం చెప్పండి . బిల్లు చెల్లించేది వేరొకరు కాబట్టి , ఖరీదయిన టైగర్ ప్రాన్ లు వగైరాలు ఆర్డర్ చెయ్యకండి . వేరే వారు మీకు డిన్నర్ పార్టీ ఇచ్చేటప్పుడు తిండి విషయం లో మీ సొంత అభిరుచులుపక్కన పెట్టండి . మీకు ఏదైనా ఐటం తినాలి అనిపించినప్పుడు , మీరు మీ కుటుంబాన్ని తీసుకు వెళ్ళినప్పుడు తినండి ! లేదా, మీరు బిల్లు చెల్లించే టప్పుడు, మీ రుచులు అభిరుచులకు చోటుఇవ్వండి .
ఇక ఆ డిన్నర్ పార్టీ లో, ‘ అలా కార్టే ( మనం ఇచ్చిన ఆర్డర్ ప్రకారం వడ్డించడం ) కాకుండా ‘ బఫే సిస్టం ‘ పెడితే, ఇక సమస్యే లేద !! ఒక కుమ్ముడు కుమ్మెయ్యండి ! మిమ్మల్ని యే శక్తీ ఆప లేదు !
3
వ్యాపార మర్యాద , వ్యక్తిగత ప్రశ్నలు :
మీరొక కొత్త కంపెనీ లో చేరతారు . కొందరు కొలీగ్స్ క్లోజ్ అవుతారు . లేదా మీ కంపెనీ లోకే కొత్త వారు చేరతారు , మీ సెక్షన్ లో నే . కలిసి పని చేసే క్రమం లో క్లోజ్ అవుతారు . వారిని వ్యక్తిగత ప్రశ్నలుఅడిగేటప్పుడు కాస్త జాగ్రత్త పాటించండి . వ్యాపారం లో , ఉద్యోగం లో క్లోజ్ అయినంత మాత్రాన , చాలా మంది వారి వ్యక్తిగత జీవితాన్ని మనతో పంచుకోవడానికి ఇష్ట పడక పోవచ్చు ! ఈ క్రిందిప్రశ్నలని మనం పూర్తి గా అడగక పోవడం మంచిది !
(1) సార్ / మేడం ! మీకు పిల్లలు ఎంత మంది ?
(2) మీకు పెళ్ళి అయిందా ? ఇంకా ఎందుకు కాలేదు ? కుటుంబ బాధ్యతల వల్లనా ? ఎవరూ నచ్చక పోవడం వల్ల నా ?
(3) మీరు కాలికి మట్టెలు వేసుకోక పోతే , మీకు పెళ్ళి కాలేదు అనుకున్నాను !
(4) మీకు కారు ఉందా ?
(5) ఇప్పటి దాకా మీరు సొంత ఇల్లు ఎందుకు కట్టుకోలేదు ?
పెళ్ళి అయిన స్త్రీ ఉద్యోగినుల విషయం లో :
మీ వారు ఎక్కడ పని చేస్తారు ? ఉద్యోగమా ? వ్యాపారమా ?
అవతలి వారు ఇబ్బంది పడ వచ్చు . మనను అధిక ప్రసంగి అనుకోవచ్చు . కాస్త దూరం మెయింటెయిన్ చెయ్య వచ్చు .
ఉదాహరణకు పిల్లల విషయం తీసుకుందాం . అవతలి వారు, తనంతట తాను వారి పిల్లల గురించి చెబితే , వినండి . చెప్పక పోతే , అడగకండి .
ఇక మీ పిల్లల గురించి . అవతలి వారు అడిగితే నే చెప్పడం మంచిది. అది కూడా మీకు ఆసక్తి ఉంటేనే సుమా ! మన పిల్లల చిన్న నాటి ముచ్చట లూ, వారి చిలిపి చేష్టలు , లేక స్కూలు / కాలేజీ లోపిల్లలు సాధించిన విషయాలు , చెప్పడం మీకు ఆనందం కావచ్చు కానీ, అవతలి వారికి బోర్ కొట్ట వచ్చు . మనం చెబితే , వారు ‘ అబ్బా ! ‘ అని ఆశ్చర్య పోకుండా, ‘ డబ్బా ! ‘ అని విసుగు చెందవచ్చు !
అయినా, మనకి ఆఫీసు లో ఉద్యోగం ఇచ్చింది కంపెనీ వారు మన పిల్లని చూసి కాదు . మీరు వ్యాపారస్తులు అయితే, మీ దగ్గర సరుకు కొనే వారు , మీ పిల్లల టాలెంటు ని చూసి కొనరు కదా ?
ఉద్యోగ / వ్యాపార ప్రపంచం తో , మనకి ఆ వ్యక్తి తో నే సంబంధం, వారి కుటుంబం తో కాదు . వారంతట వారు వివరాలు చెబితే తప్ప .
ఉద్యోగ వ్యాపార జీవితం లో, మన సంభాషణలను వాటికే పరిమితం చెయ్యడం మంచిది .
మీరు బయట నుంచి ఆఫీస్ లోపలికి వస్తున్నారు . లేదా ఒక క్యాబిన్ నుంచి మరొక క్యాబిన్ లోనికి వెళుతున్నారు . మీ వెనక ఎవరు నిలబడి ఉన్నా, వారు డోరు దాటే దాకా , తలుపు తీసిపట్టుకోండి ! అది మీ పై అధికారికే కానవసరం లేదు ! మీ వెనక నిలబడి ఉన్నది ఎవరన్నది ముఖ్యం కాదు . మీ జూనియర్ కావచ్చు , స్త్రీ ఉద్యోగిని / పురుషుడు కావచ్చు . లేక మీ ఆఫీస్ లో పనిచేసే ఆయా కావచ్చు . మీ వెనక టీ కప్పుల ట్రే తో కుర్రాడు నిలబడి ఉండ వచ్చు . తలుపు తీసి మీరు బయటికి / లోపలికి వెళ్ళాక , మీరు ఒక సారి వెనుకకు చూసి , డోరు తీసి పట్టుకున్ని, ఆ టీకప్పుల ట్రే కుర్రాడు కూడా డోరు దాటాక మాత్రమే డోరు వెయ్యండి . చిన్నవారైనా, ఒకరికి మర్యాద నిస్తే, మన పెద్దతనము ఏమీ తగ్గి పోదు !
నా క్యారీర్ లో గతం లో కొంతమంది పై అధికారులు ఇందుకు విరుద్ధం గా ఉండే వారు . వారి క్రింది వారిని పురుగుల వలె చూసే వారు . నేను కొందరి బాసుల వెనకాల నడుస్తున్నప్పుడు , వారుఆఫిస్ డోరు తీసుకుని వెళుతూ ఉంటే, వారి వెనక నేను . తీసి పట్టుకుంటారేమో నని నేను వడివడి గా వారి వనకే వెళ్ళడం, వారు వెనక్కి తిరిగి కూడా చూడకుండా , సీరియస్ గా మొహం పెట్టుకుని,డోర్ ను లాగి వదిలెయ్యడమూ, అది స్పీడు గా వెనక్కి వచ్చి నా మొహానికో, ముక్కు పచ్చడి అయ్యే రిస్కు కలగడమూ, నేను సమసస్పూర్తి తో వెనక్కి తగ్గి ఆ ప్రమాదాన్ని తప్పించుకోవడమూ -జరిగాయి ఎన్నో సార్లు ! ఈ రోజు వరకూ నా ముక్కు టొమాటో చట్నీ కాక్కుండా , ఇలా సేఫ్ గా ఉంది అంటే దానికి నా సమయ స్పూర్తే కారణం !
మీరు అలాంటి రిస్కు ఇతరులకి ఇవ్వకండి . మీరు డోరు తీసి బయటకి వెళుతున్నా, లేక లోపలికి వస్తున్నా, వెనకాల ఎవరు ఉన్నారో ఒక సారి చూసి , వారు దోఋ దాటే దాక తీసి పట్టుకోండి ,కొంచెం స్మైల్ ఇవ్వండి , నష్టం లేదు , డబ్బు ఖర్చు అసలే లేదు !
