31-05-2020 బుచ్చిరెడ్డిపాలెం (పున్నమి విలేఖరి – జి.పి.ప్రవీణ్) బచ్చిరెడ్డిపాలెం మండలం ఇస్కపాలెం గ్రామ పంచాయితీలో షుమారు 20 సంవత్సరాల క్రితం ఆనాటి ప్రభుత్వం మండలంలో ఉన్న పలు నిరుపేద గిరిజన కుటుంబాలకు పోలినాయుడు చెరువు గ్రామంలో ఇళ్లస్థలాలను మంజూరు చేశారు. కానీ 20 సంవత్సరాలు నుండి ఆ గ్రామం అభివృద్ధికి ఆమడదూరములో ఉందని, నేటికి ఈ ప్రాంత గిరిజనులు త్రాగునీటికోసం షుమారు కిలోమీటర్ దూరం వెళ్లి పడిగాపులు కాసి త్రాగునీరు తెచ్చుకోవాల్సిన పరిస్థితి నేటికి ఉంది. ఈ గ్రామంలోని కొన్ని కుటుంబాలలో ఎటువంటి చేయూతను అందించే కుటుంబ సభ్యులు లేని వృద్దులు, వికలాంగులు త్రాగునీటి కష్టాలు పరమాత్ముడికి ఎరుక. నేడు దేశం అన్ని రంగాలలో అభివృద్ధి చెందుతున్న సందర్భములో ఈ ప్రాంత వాసులు త్రాగునీటికోసం ప్రతీరోజు యుద్ధం చేయాల్సిన పరిస్థితి నెలకొనడం గమనార్హం. ఈ సమస్యపై గతపాలకులు ఇచ్చిన వాగ్దానాలన్ని నీటి మీద రాతలువలె మిగిలిపోయాయి. ఎన్నో సంవత్సరాలు నుండి పల్లప్రోలు దగ్గర మలిదేవి వాగు కట్టపై మోటార్లు వేసి అక్కడనుండి షుమారు 3కిలోమీటర్ల దూరం పైపులైన్ ద్వారా ఈ నీటిని పోలీనాయుడు చెరువు గిరిజన కాలనీకి త్రాగునీటి అవసరాలకోసం తరలిస్తుండేవారు. ఈ మధ్యకాలంలో పల్లప్రోలు గ్రామంలో పెరిగిన జనాభా దృష్ట్యా త్రాగునీటి అవసరాలకొరకు ఈ తరలించే నీటిలో ఎక్కువ శాతం త్రాగునీరు పల్లాపల్లి గ్రామంలోనే వినియోగిస్తున్నారు. కాగా మిగిలిన అరాకొర నీటితో ఈ గిరిజన కాలనీ వాసులు తీవ్ర త్రాగునీటి ఎద్దటిని ఎదురుకొంటున్నారు. గత రెండు నెలల క్రితం త్రాగునీటిని సరఫరా చేసే పైపులైన్ మరమ్మత్తులకు గురికావడంతో సమాచారం అందుకున్న బుచ్చిరెడ్డిపాలెం మండల MPDO డి.వి.నరసింహారావు వెంటనే స్పందించి యుద్ధప్రాతిపదికన పైపులైన్ మరమ్మత్తులు చేయించారు. కానీ ఆ ప్రయత్నం తాత్కాలికంగా పరిష్కారం చూపగలిగిందే కానీ శాశ్వత పరిష్కారం చూపలేకపోయింది. ఇప్పటికైనా పాలకులు అధికారులు ఈ ప్రాంతంలో వాటర్ ట్యాంక్ నిర్మాణాన్ని చేపట్టి శాశ్వతమైన మంచినీటి సదుపాయాన్ని కల్పించి, ఈ సమస్యకు శాశ్వత పరిష్కారం చూపాలని స్థానికుడు బూదూరు కుమార్ మరియు ఇక్కడి గిరిజన వాసులు కోరుకుంటున్నారు.