ఆత్మకూరు, జూలై 15 (హరికిరణ్, పున్నమి ప్రతినిధి):
శ్రీ పొట్టి శ్రీరాములు నెల్లూరు జిల్లా ఇండియన్ రెడ్ క్రాస్ సొసైటీ జిల్లా కార్యవర్గ సభ్యునిగా ఆత్మకూరు పట్టణానికి చెందిన బీజేపీ జిల్లా సీనియర్ నాయకుడు, ప్రముఖ సామాజిక సేవకుడు కుడుముల సుధాకర్ రెడ్డి నియమితులయ్యారు. ఆయన నియామకంపై ఆత్మకూరు ప్రాంత ప్రజలు, వివిధ రాజకీయ, సామాజిక, స్వచ్ఛంద సంస్థల ప్రతినిధులు హర్షం వ్యక్తం చేస్తూ అభినందనలు తెలియజేశారు.
సామాజిక సేవను తన జీవిత లక్ష్యంగా ఎంచుకున్న కుడుముల సుధాకర్ రెడ్డి ఎన్నో సంవత్సరాలుగా ప్రజా సేవలో చురుకుగా పాల్గొంటున్నారు. రక్తదాన శిబిరాల నిర్వహణ, ఆరోగ్య శిబిరాలు, పేదలకు నిత్యావసర వస్తువుల పంపిణీ, ప్రకృతి విపత్తుల సమయంలో సహాయక చర్యలు, అత్యవసర పరిస్థితుల్లో బాధిత కుటుంబాలకు అండగా నిలవడం వంటి అనేక సేవా కార్యక్రమాలను నిర్వహిస్తూ ప్రజల మన్ననలు పొందారు. మానవతా దృక్పథంతో ఆయన అందిస్తున్న సేవలను గుర్తించిన ఇండియన్ రెడ్ క్రాస్ సొసైటీ జిల్లా కార్యవర్గంలో సభ్యునిగా అవకాశం కల్పించింది.
ఈ సందర్భంగా కుడుముల సుధాకర్ రెడ్డి మాట్లాడుతూ, తనపై విశ్వాసం ఉంచి ఈ బాధ్యతలను అప్పగించిన రాష్ట్ర దేవాదాయ, ధర్మాదాయ శాఖ మంత్రి, ఆత్మకూరు శాసనసభ్యులు ఆనం రామనారాయణ రెడ్డికి ప్రత్యేక కృతజ్ఞతలు తెలిపారు. రెడ్ క్రాస్ ఆశయాలకు అనుగుణంగా మరింత అంకితభావంతో పనిచేస్తూ మానవతా సేవలను ప్రజలకు చేరువ చేస్తానని చెప్పారు.
ముఖ్యంగా రక్తదానంపై యువతలో అవగాహన పెంపొందించడం, అత్యవసర వైద్య సహాయం అందించడం, ప్రకృతి వైపరీత్యాలు, ప్రమాదాల సమయంలో సహాయక చర్యలు చేపట్టడం, పేద మరియు నిరుపేద కుటుంబాలకు అవసరమైన సేవలు అందించడం, స్వచ్ఛంద సేవా కార్యక్రమాలను విస్తృతంగా నిర్వహించడం తన ప్రధాన లక్ష్యమని పేర్కొన్నారు.
ఆయన నియామకం ఆత్మకూరు ప్రాంతానికి గర్వకారణమని పలువురు నాయకులు, సామాజిక సేవకులు, అభిమానులు అభిప్రాయపడ్డారు. నూతన బాధ్యతల్లో విజయవంతంగా రాణిస్తూ రెడ్ క్రాస్ సేవలను మరింత విస్తృతం చేయాలని ఆకాంక్షిస్తూ శుభాకాంక్షలు తెలిపారు.