ఆకస్మిక తనిఖీలో అధికారులను అభినందించిన కలెక్టర్ హిమాన్షు శుక్లా
ఆత్మకూరు, జూలై 10 (హరికిరణ్, పున్నమి ప్రతినిధి):
నెల్లూరు జిల్లా ఆత్మకూరు నియోజకవర్గంలో కొనసాగుతున్న ప్రత్యేక ఇంటెన్సివ్ రివిజన్ (ఎస్ఐఆర్) ఓటర్ల డిజిటలైజేషన్ ప్రక్రియను జిల్లా కలెక్టర్ హిమాన్షు శుక్లా శుక్రవారం ఆకస్మికంగా పరిశీలించారు. ఎన్నికల సంఘం ఆదేశాల మేరకు ఓటర్ల జాబితాను మరింత పారదర్శకంగా, ఖచ్చితత్వంతో రూపొందించే లక్ష్యంతో చేపడుతున్న ఈ కార్యక్రమం పురోగతిని ఆయన క్షేత్రస్థాయిలో పరిశీలించి అధికారులతో సమీక్ష నిర్వహించారు.
ఆత్మకూరులోని డిజిటలైజేషన్ కేంద్రాన్ని సందర్శించిన కలెక్టర్, బూత్ లెవల్ అధికారులు (బీఎల్వోలు) నిర్వహిస్తున్న పనితీరును పరిశీలించారు. ఓటర్ల నుంచి సేకరిస్తున్న వివరాలు, డిజిటల్ నమోదు ప్రక్రియ, ధ్రువీకరణ విధానాలను అడిగి తెలుసుకున్నారు. నమోదైన వివరాల్లో ఎలాంటి పొరపాట్లు జరగకుండా ప్రతి దశలో జాగ్రత్తలు తీసుకోవాలని అధికారులకు సూచించారు.
ఈ సందర్భంగా ఆత్మకూరు నియోజకవర్గంలో ఇప్పటికే 84 శాతం ఎస్ఐఆర్ డిజిటలైజేషన్ పూర్తి కావడం పట్ల జిల్లా కలెక్టర్ హిమాన్షు శుక్లా అధికారులను అభినందించారు. జిల్లా వ్యాప్తంగా ఇప్పటివరకు 76 శాతం డిజిటలైజేషన్ పూర్తికాగా, ఆత్మకూరు నియోజకవర్గం జిల్లా స్థాయిలో అత్యుత్తమ ప్రగతి సాధించడం అభినందనీయమని పేర్కొన్నారు. అధికారులు, బీఎల్వోలు సమన్వయంతో పనిచేయడం వల్లే ఈ స్థాయిలో పురోగతి సాధ్యమైందని ఆయన అన్నారు.
మిగిలిన 16 శాతం డిజిటలైజేషన్ ప్రక్రియను కూడా అత్యంత వేగంగా పూర్తి చేయాలని కలెక్టర్ ఆదేశించారు. ముఖ్యంగా శని, ఆదివారాల్లో ప్రత్యేకంగా క్షేత్రస్థాయిలో పనిచేసి ప్రతి ఇంటిని సందర్శించాలని, ఎవరూ మిగిలిపోకుండా ఓటర్ల వివరాలను నమోదు చేయాలని సూచించారు. ఎన్నికల జాబితాలో అర్హులైన ప్రతి ఓటరు పేరు తప్పనిసరిగా ఉండేలా చర్యలు తీసుకోవాలని పేర్కొన్నారు.
జాడ తెలియని ఓటర్ల వివరాల విషయంలో నిర్లక్ష్యం వహించకుండా మరోసారి క్షేత్రస్థాయిలో సమగ్రంగా పరిశీలించాలని అధికారులను ఆదేశించారు. వారు వేరే ప్రాంతాలకు వెళ్లారా, చిరునామా మారిందా లేదా ఇతర కారణాలున్నాయా అనే అంశాలను పరిశీలించి, వాస్తవ పరిస్థితిని నమోదు చేయాలని సూచించారు. ఆధారాలు లేకుండా ఏ ఒక్కరి పేరును తొలగించకూడదని స్పష్టం చేశారు.
డిజిటలైజేషన్ ప్రక్రియలో నాణ్యతకు అత్యంత ప్రాధాన్యం ఇవ్వాలని కలెక్టర్ సూచించారు. వేగంతో పాటు ఖచ్చితత్వం కూడా అంతే ముఖ్యమని, ప్రతి నమోదును ఒకటికి రెండుసార్లు పరిశీలించి ఎలాంటి సాంకేతిక లేదా సమాచార లోపాలు లేకుండా చూడాలని అధికారులకు తెలిపారు.
ఈ సందర్భంగా ప్రజలకు కూడా జిల్లా కలెక్టర్ హిమాన్షు శుక్లా విజ్ఞప్తి చేశారు. తమ ప్రాంతానికి వచ్చే బీఎల్వోలకు పూర్తిగా సహకరించి, అవసరమైన పత్రాలు అందజేసి ఓటరు వివరాలను సకాలంలో నమోదు చేయించుకోవాలని కోరారు. సరైన వివరాలతో రూపొందిన ఓటర్ల జాబితా ప్రజాస్వామ్య వ్యవస్థను మరింత బలోపేతం చేస్తుందని ఆయన పేర్కొన్నారు.
అనంతరం ఆర్డీవో బి. పావని, తహసీల్దార్ పద్మజాకుమారి, మున్సిపల్ కమిషనర్ గంగాప్రసాద్, ఎంపీడీవోతో పాటు ఎన్నికల ప్రక్రియలో పాల్గొంటున్న అధికారులతో ప్రత్యేక సమావేశం నిర్వహించారు. మిగిలిన పనులను నిర్దేశిత గడువులో పూర్తి చేయడంతో పాటు ప్రతి ఓటరు వివరాలు ఖచ్చితంగా నమోదు అయ్యేలా నిరంతర పర్యవేక్షణ కొనసాగించాలని ఆదేశించారు.
ఈ పరిశీలన కార్యక్రమంలో ఆర్డీవో బి. పావని, తహసీల్దార్ పద్మజాకుమారి, మున్సిపల్ కమిషనర్ గంగాప్రసాద్, ఎంపీడీవో, బూత్ లెవల్ అధికారులు, రెవెన్యూ, మున్సిపల్ మరియు ఎన్నికల శాఖల అధికారులు పాల్గొన్నారు. అధికారులు డిజిటలైజేషన్ పురోగతిపై కలెక్టర్కు వివరాలు అందించగా, నిర్దేశిత గడువులో శాతం వంద పూర్తి చేసి జిల్లాలో ఆత్మకూరును అగ్రస్థానంలో నిలపాలని కలెక్టర్ సూచించారు.