నేర్రపల్లి గ్రామానికి మళ్లీ మధ్యాహ్న బస్సు సౌకర్యం – ప్రజల విజ్ఞప్తికి ఫలితం, గ్రామంలో హర్షాతిరేకం

నేర్రపల్లి గ్రామానికి మళ్లీ మధ్యాహ్న బస్సు సౌకర్యం – ప్రజల విజ్ఞప్తికి ఫలితం, గ్రామంలో హర్షాతిరేకం ప్రజల సమస్యలను అధికారుల దృష్టికి తీసుకెళ్లి పరిష్కారం సాధించిన గ్రామ సర్పంచ్, ఉప సర్పంచ్ మరియు పాలకవర్గ సభ్యులను గ్రామస్తులు ప్రత్యేకంగా అభినందించారు జనం న్యూస్ ప్రతినిధి నేర్రపల్లి, జూలై 6: గత కరోనా మహమ్మారి సమయంలో నిలిపివేయబడిన నేర్రపల్లి గ్రామ మధ్యాహ్న బస్సు సర్వీస్‌ను తిరిగి పునరుద్ధరించడం పట్ల గ్రామ ప్రజలు ఆనందం వ్యక్తం చేశారు. ఎన్నో సంవత్సరాలుగా గ్రామ ప్రజలు ఎదురుచూస్తున్న ఈ సమస్యకు పరిష్కారం లభించడంతో గ్రామంలో పండుగ వాతావరణం నెలకొంది. కరోనా సమయంలో ప్రయాణికుల సంఖ్య తగ్గడం, రవాణా పరిమితులు వంటి కారణాలతో నేర్రపల్లి గ్రామానికి మధ్యాహ్నం నడిచే ఆర్టీసీ బస్సు సర్వీస్ నిలిపివేయబడింది. దీంతో విద్యార్థులు, ఉద్యోగులు, రైతులు, మహిళలు, వృద్ధులు తీవ్ర ఇబ్బందులు ఎదుర్కొన్నారు. ముఖ్యంగా ఆసుపత్రులు, ప్రభుత్వ కార్యాలయాలు, మార్కెట్ ప్రాంతాలకు వెళ్లే గ్రామస్తులు ప్రైవేట్ వాహనాలపై ఆధారపడాల్సి వచ్చింది. ఈ సమస్యను గుర్తించిన గ్రామ సర్పంచ్ గొడ్డండ్ల హేమలత శ్రీహరి, ఉప సర్పంచ్ వెలగ వేణుగోపాల్ రెడ్డి మరియు గ్రామ పాలకవర్గ సభ్యులు పలుమార్లు ఆర్టీసీ అధికారులను కలిసి సమస్యను వివరించారు. జిల్లా ఆర్టీసీ మేనేజర్ (DM) లావణ్య కి పలుమార్లు వినతిపత్రాలు అందజేసి, గ్రామ ప్రజల ఇబ్బందులను వివరించి బస్సు సర్వీస్‌ను పునరుద్ధరించాలని కోరారు. గ్రామ ప్రజల విజ్ఞప్తిని సానుకూలంగా స్వీకరించిన డీఎం లావణ్య గారు నేర్రపల్లి గ్రామానికి మధ్యాహ్న బస్సు సర్వీస్‌ను తిరిగి ప్రారంభించేందుకు చర్యలు తీసుకున్నారు. దీంతో ప్రతిరోజూ మధ్యాహ్నం 12:15 గంటలకు బస్సు నేర్రపల్లి గ్రామానికి చేరుకునే విధంగా సర్వీస్‌ను పునరుద్ధరించారు. ఈ సందర్భంగా గ్రామంలో బస్సు ప్రారంభోత్సవ కార్యక్రమాన్ని ఘనంగా నిర్వహించారు. గ్రామ సర్పంచ్ గొడ్డండ్ల హేమలత శ్రీహరి, ఉప సర్పంచ్ వెలగ వేణుగోపాల్ రెడ్డి బస్సుకు పూలమాలలు వేసి, కొబ్బరికాయ కొట్టి ప్రారంభించారు. అనంతరం వారు మాట్లాడుతూ గ్రామ ప్రజల సహకారం, అధికారుల స్పందనతో ఈ బస్సు సర్వీస్ పునరుద్ధరణ సాధ్యమైందని తెలిపారు. ఈ కార్యక్రమంలో పాలకవర్గ సభ్యులు పద్మ, అరుణ్ యాదవ్, కుతడి అఖిల, నర్సింహా యాదవ్, శ్రీను, శ్రీధర్, గ్రామ కార్యదర్శి రాజ్‌కుమార్ తదితరులు పాల్గొన్నారు. అలాగే గ్రామ పెద్దలు, మహిళలు, యువకులు, విద్యార్థులు, గ్రామస్థులు పెద్ద సంఖ్యలో హాజరై తమ ఆనందాన్ని వ్యక్తం చేశారు. గ్రామ ప్రజలు మాట్లాడుతూ, ఈ బస్సు సర్వీస్ పునరుద్ధరణతో విద్యార్థులు, ఉద్యోగులు, రైతులు మరియు అత్యవసర పనుల కోసం వెళ్లే ప్రజలకు ఎంతో ప్రయోజనం చేకూరుతుందని తెలిపారు. గ్రామానికి మరిన్ని రవాణా సౌకర్యాలు కల్పించాలని ప్రభుత్వం, ఆర్టీసీ అధికారులు దృష్టి సారించాలని వారు కోరారు. ప్రజల సమస్యలను అధికారుల దృష్టికి తీసుకెళ్లి పరిష్కారం సాధించిన గ్రామ సర్పంచ్, ఉప సర్పంచ్ మరియు పాలకవర్గ సభ్యులను గ్రామస్తులు ప్రత్యేకంగా అభినందించారు.