దేశవ్యాప్తంగా సంచలనం సృష్టించిన నీట్-యూజీ 2026 ప్రశ్నాపత్రం లీక్ ఘటనపై సుప్రీంకోర్టు తీవ్ర ఆందోళన వ్యక్తం చేసింది. ఈ ఘటన వల్ల విద్యార్థులు మాత్రమే కాకుండా వారి కుటుంబాలు కూడా తీవ్ర మానసిక వేదనకు గురయ్యాయని కోర్టు పేర్కొంది. ఎన్నో సంవత్సరాల కష్టం, భావోద్వేగాలు, ఆశలు ఒక్కసారిగా వృథా అయ్యాయని వ్యాఖ్యానించింది.
జాతీయ పరీక్షల నిర్వహణ సంస్థ (ఎన్టీఏ)లో వ్యవస్థాపక లోపాలు ఉన్నాయని, యూపీఎస్సీ వంటి సంస్థలు తప్పులు చేయకుండా పరీక్షలు నిర్వహిస్తుంటే ఎన్టీఏ ఎందుకు పదేపదే తప్పులు చేస్తోందని కోర్టు ప్రశ్నించింది. సంస్థలో స్థిరమైన వ్యవస్థ, అనుభవాల పరిరక్షణ, బాధ్యతాయుత విధానం అవసరమని స్పష్టం చేసింది.
ఇకపై నీట్ పరీక్షలను కంప్యూటర్ ఆధారిత విధానంలో నిర్వహించేందుకు చర్యలు తీసుకుంటున్నట్లు ఎన్టీఏ కోర్టుకు తెలిపింది. ప్రశ్నాపత్రాల భద్రత, పర్యవేక్షణ, రవాణా విధానాల్లో కూడా కీలక మార్పులు చేపడుతున్నట్లు వెల్లడించింది.
