ఎర్రవరంలో టీడీపీకి తిరుగులేదు.. వైసీపీలోకి భారీ వలసల ప్రచారం అవాస్తవం!
యలమంచిలి: మున్సిపాలిటీ పరిధిలోని ఎర్రవరం వార్డు నుంచి టీడీపీకి చెందిన పెద్ద సంఖ్యలో కార్యకర్తలు వైఎస్సార్‌సీపీలో చేరినట్లు జరుగుతున్న ప్రచారం పూర్తిగా కల్పితమని నియోజకవర్గ టీడీపీ ఇన్‌చార్జి ప్రగడ నాగేశ్వరరావు, మాజీ పార్లమెంట్ సభ్యుడు పప్పల చలపతిరావు స్పష్టం చేశారు. ఎర్రవరం వార్డుకు చెందిన ఒక వ్యక్తి కౌన్సిలర్ టికెట్ ఆశించి మరో పార్టీలోకి వెళ్లారని, అంతమాత్రాన పెద్ద సంఖ్యలో టీడీపీ కార్యకర్తలు పార్టీని వీడినట్లు ప్రచారం చేయడం హాస్యాస్పదమని పేర్కొన్నారు. క్రమశిక్షణకు మారుపేరైన టీడీపీ నుంచి భారీగా వలసలు జరిగాయంటూ ప్రచారం చేయడం సరికాదన్నారు. యలమంచిలి మున్సిపాలిటీలోని 16వ వార్డు ఎర్రవరంలో టీడీపీ అత్యంత పటిష్టంగా ఉందని ధీమా వ్యక్తం చేశారు. టౌన్ ప్రెసిడెంట్ గొర్లి శివనారాయణ మాట్లాడుతూ.. వార్డులో క్లస్టర్, యూనిట్, బూత్ స్థాయి నాయకులు, కార్యకర్తలు పార్టీకి అండగా ఉన్నారని తెలిపారు. ఒక్క వ్యక్తి పార్టీ మారితే టీడీపీకి షాక్ తగిలిందంటూ ప్రచారం చేయడం విడ్డూరంగా ఉందన్నారు. కార్యకర్తలే టీడీపీకి బలమని, కూటమికి కట్టుబడి పార్టీ శ్రేణులు పనిచేస్తాయని స్పష్టం చేశారు. ఈ కార్యక్రమంలో క్లస్టర్ ఇన్‌చార్జిలు బొద్దపు శ్రీనివాసరావు, కరణం రవికుమార్, జిల్లా అధికార ప్రతినిధి దాడి రమేష్, యూత్ ప్రెసిడెంట్ నమ్మి రమణ, యూనిట్ ఇన్‌చార్జి శానాపతి రాజమహేష్, బూత్ ఇన్‌చార్జి చంద్రగిరి శ్రీరాములు, శానాపతి నాగేశ్వరరావు పాల్గొన్నారు.
kundhuruanand- October 19, 2026
- 0 Comments
- 34 Views
-
