మహిళల భద్రతపై తిరుపతి జిల్లా పోలీసుల అవగాహన*

*మహిళల భద్రతపై తిరుపతి జిల్లా పోలీసుల అవగాహన* *శ్రీ సిటీ,12-08-26 పున్నమి న్యూస్ రిపోర్టర్ మద్దాలి వెంకయ్య దొరవారిసత్రం:* మహిళల భద్రత, మహిళలపై జరుగుతున్న నేరాల నివారణ, చట్టపరమైన రక్షణపై అవగాహన కల్పించేందుకు తిరుపతి జిల్లా పోలీస్ శాఖ ఆధ్వర్యంలో జిల్లా వ్యాప్తంగా విస్తృత కార్యక్రమాలు నిర్వహిస్తున్నారు. జిల్లా ఎస్పీ శ్రీ ఎల్. సుబ్బరాయుడు, ఐపీఎస్., ఆదేశాల మేరకు పోలీసు అధికారులు మహిళలకు అందుబాటులో ఉన్న చట్టపరమైన రక్షణ, పోలీసుల సహాయం, సమస్యలను ధైర్యంగా ఎదుర్కొనే విధానాలపై అవగాహన కల్పిస్తున్నారు. ఇందులో భాగంగా శ్రీ సిటీ పరిధిలోని అడెలా అడ్మైర్ కేబుల్ కంపెనీలో మహిళల భద్రతపై ప్రత్యేక అవగాహన కార్యక్రమం నిర్వహించారు. శ్రీ సిటీ డీఎస్పీ శ్రీ బి.వి. శ్రీనివాసులు, శ్రీ సిటీ పోలీస్ స్టేషన్ మహిళా ఎస్‌ఐ శ్రీమతి ఎం. ప్రియాంక ఆధ్వర్యంలో జరిగిన ఈ కార్యక్రమంలో సంస్థలో పనిచేస్తున్న మహిళా ఉద్యోగులకు వివిధ అంశాలపై అవగాహన కల్పించారు. ఈ సందర్భంగా మహిళలపై జరిగే నేరాలు, వేధింపులు, గృహహింస, సైబర్ వేధింపులు, ఆన్‌లైన్ మోసాలు తదితర సమస్యలపై అధికారులు వివరించారు. మహిళలు తమకు ఎదురయ్యే సమస్యలను దాచిపెట్టకుండా, ఎలాంటి భయాందోళనలకు గురికాకుండా వెంటనే పోలీసుల దృష్టికి తీసుకురావాలని సూచించారు. సమస్య చిన్నదైనా, పెద్దదైనా పోలీసులను సంప్రదించేందుకు వెనుకాడాల్సిన అవసరం లేదని తెలిపారు. ప్రస్తుత కాలంలో సైబర్ నేరాలు పెరుగుతున్న నేపథ్యంలో మహిళలు సోషల్ మీడియా వినియోగంలో అప్రమత్తంగా ఉండాలని అధికారులు సూచించారు. వ్యక్తిగత వివరాలు, ఫొటోలు, పాస్‌వర్డ్‌లు, బ్యాంకింగ్ సమాచారాన్ని అపరిచితులతో పంచుకోకూడదని, అనుమానాస్పద లింకులు, మెసేజ్‌లు, ఫోన్ కాల్స్‌కు స్పందించేటప్పుడు జాగ్రత్తగా వ్యవహరించాలని సూచించారు. ఆన్‌లైన్ వేధింపులకు గురైతే ఆధారాలను భద్రపరచుకుని పోలీసులను ఆశ్రయించాలని తెలిపారు. మహిళలపై నేరాలకు పాల్పడే వ్యక్తులపై చట్ట ప్రకారం కఠిన చర్యలు తీసుకుంటామని పోలీసులు స్పష్టం చేశారు. మహిళలకు సురక్షితమైన వాతావరణం కల్పించడం పోలీస్ శాఖ ప్రధాన బాధ్యతల్లో ఒకటని, వారి భద్రత కోసం పోలీసులు నిరంతరం కృషి చేస్తున్నారని తెలిపారు. మహిళల భద్రత కేవలం పోలీసుల బాధ్యత మాత్రమే కాదని, సమాజంలోని ప్రతి ఒక్కరూ బాధ్యతగా వ్యవహరించాలని అధికారులు పిలుపునిచ్చారు. మహిళల పట్ల గౌరవభావంతో వ్యవహరిస్తూ, వేధింపులు లేదా నేరాలు జరిగినప్పుడు వాటిని నిర్లక్ష్యం చేయకుండా పోలీసులకు సమాచారం అందించాలని కోరారు. మహిళలు ధైర్యంగా ముందుకు వచ్చి తమ సమస్యలను పోలీసుల దృష్టికి తీసుకువస్తే, వారికి అవసరమైన రక్షణ, చట్టపరమైన సహాయం అందించేందుకు పోలీస్ శాఖ ఎల్లప్పుడూ సిద్ధంగా ఉంటుందని అధికారులు పేర్కొన్నారు. మహిళల భద్రత, గౌరవం, హక్కుల పరిరక్షణకు ప్రతి ఒక్కరూ సహకరించాలని విజ్ఞప్తి చేశారు