Contact Us Latest News
నిజమైన వార్త. వేగమైన సమాచారం. ఆంధ్రప్రదేశ్ • తెలంగాణ • జాతీయం
Author Panel

Tag: అనకాపల్లి జిల్లా

అనకాపల్లి

అచ్యుతాపురంలో జనసేనకు పెరుగుతున్న ఆదరణ.. వైసీపీ నుంచి భారీ చేరికలు!

ఎలమంచిలి నియోజకవర్గం అచ్యుతాపురం మండలంలో జనసేన పార్టీలోకి భారీగా చేరికలు జరిగాయి. ఎం. జగన్నాథపురం గ్రామానికి చెందిన వైసీపీ నాయకులు, మాజీ ప్రజాప్రతినిధులు, కార్యకర్తలు 30కి పైగా కుటుంబాలతో జనసేన పార్టీలో చేరారు. మాజీ ఎంపీటీసీ రావి రామలక్ష్మి, శోభన్‌బాబు, మాజీ నీటి సంఘం అధ్యక్షుడు పైల రాంబాబు, మాజీ సర్పంచ్ పైల మాణిక్యం కుమారులు, మాజీ వార్డు సభ్యులు, పలువురు వైసీపీ కార్యకర్తలు ఎమ్మెల్యే సుందరపు విజయకుమార్ సమక్షంలో జనసేన కండువాలు కప్పుకున్నారు. అచ్యుతాపురం మండలంలో వైసీపీ నుంచి జనసేన వైపు నాయకులు, కార్యకర్తలు అడుగులు వేయడం స్థానిక రాజకీయాల్లో చర్చనీయాంశంగా మారింది. ఎమ్మెల్యే సుందరపు విజయకుమార్ నివాసం వద్ద జరిగిన ఈ చేరికల కార్యక్రమంతో జనసేన శ్రేణుల్లో ఉత్సాహం నెలకొంది. పార్టీలో చేరిన వారికి ఎమ్మెల్యే స్వాగతం పలికారు. ఈ కార్యక్రమంలో జనసేన పార్టీ నాయకులు, కార్యకర్తలు, పలువురు స్థానిక ప్రజాప్రతినిధులు పాల్గొన్నారు.

అనకాపల్లి

ఎన్నికల ఓటింగ్‌కు విద్యుత్ అంతరాయం కలగకుండా పహారా!

పోలింగ్ కేంద్రాల్లో నిరంతర విద్యుత్ సరఫరా కోసం సిబ్బంది ప్రత్యేక చర్యలు యలమంచిలి మున్సిపల్ ఎన్నికల పోలింగ్ ప్రక్రియకు ఎలాంటి విద్యుత్ అంతరాయం కలగకుండా విద్యుత్ శాఖ సిబ్బంది ప్రత్యేక పర్యవేక్షణ చేపట్టారు. ఏఈ కనకరాజు, లైన్‌మెన్ ఆచంట ఆదినారాయణ సారథ్యంలో పోలింగ్ కేంద్రాల్లో నిరంతర విద్యుత్ సరఫరా ఉండేలా అవసరమైన భద్రతా ఏర్పాట్లు చేశారు.ఎన్నికల పోలింగ్ ప్రారంభమైన ఉదయం నుంచి బ్యాలెట్ బాక్సులు తరలించే ప్రక్రియ పూర్తయ్యే వరకు విద్యుత్ సరఫరాపై నిరంతరం నిఘా ఉంచారు. ఎక్కడైనా విద్యుత్ అంతరాయం ఏర్పడే అవకాశం లేకుండా ముందస్తు జాగ్రత్తలు తీసుకుంటూ, సమస్యలు తలెత్తకుండా సిబ్బంది అప్రమత్తంగా విధులు నిర్వహించారు.ఎన్నికల వంటి కీలక సమయంలో పోలింగ్ కేంద్రాల్లో విద్యుత్ సరఫరా నిరంతరాయంగా కొనసాగేందుకు ఏఈ కనకరాజు, లైన్‌మెన్ ఆచంట ఆదినారాయణతో పాటు విద్యుత్ శాఖ సిబ్బంది చూపిన అంకితభావం పలువురి ప్రశంసలు అందుకుంది. విధి నిర్వహణలో బాధ్యతాయుతంగా వ్యవహరించిన విద్యుత్ శాఖ సిబ్బందిని పలువురు అభినందించారు.

అనకాపల్లి

నేను సైతం…. అంటూ భరోసా కేంద్రంలోకి మరో యువ కెరటం

శ్రీ కృష్ణదేవరాయ సంక్షేమ భరోసా కేంద్రాలు జాతి ఐక్యతకు, అభివృద్ధికి, సంక్షేమానికి, భద్రతకి చేస్తున్న కార్యక్రమాలను చూసి ఆకర్షితుడై నేను కూడా భరోసా కేంద్రాల ద్వారా నా పరిధిలో నేను మన కుటుంబ సభ్యుల సంక్షేమానికి భరోసా ఇస్తానని స్వచ్ఛందంగా ముందుకు వచ్చినందున భావిశెట్టి కిరణ్ గారిని విశాఖపట్నం ఉత్తర నియోజకవర్గానికి భరోసా కన్వీనర్ గా నియమించడమైనది.ఈ సందర్భంగా భరోసా కేంద్రాల వ్యవస్థాపకులు కర్రి వెంకటరమణ మాట్లాడుతూ బావిశెట్టి కిరణ్ గారు యువ వ్యాపారవేత్త, యూ.పీ.వీ.సీ వ్యాపార రంగంలో ఉన్నారు అంతేకాకుండా ఆయన కమ్యూనిటీ ఐక్యత కోసం ఎంతో సేవ చేసి ఉన్నారు, వ్యాపార రంగంలో, రాజకీయ రంగంలో, ఇతర రంగాలలో కూడా అనేక మందితో పరిచయాలు ఉన్నాయి ,భరోసా కేంద్రాల ఆశయాలు కనుగుణంగా భవిష్యత్తులో జాతి ఐక్యతకు ,అభివృద్ధికి, తనకున్న అనుభవం ఉపయోగపడుతుందని తెలిపారు.ఇదేవిధంగా మిగతా ప్రాంతాల నుండి కూడా నేను సైతం…. అంటూ స్వచ్ఛందంగా జాతి సంక్షేమానికి కృషి చేసే వారిని భరోసా కేంద్రాలలోకి ఆహ్వానించడం జరుగుతుంది అని దాని ద్వారా మనలో ఐక్యత పెరిగి మన అభివృద్ధికి ,మన సంక్షేమానికి ,భద్రతకి ఎంతో పడుతుందని తెలిపారు.మరిన్ని వివరాలకు 8500635995కు కాల్ చేసి తెలుసుకోవాలని భరోసా కేంద్రాల వ్యవస్థాపకులు కర్రి వెంకటరమణ తెలిపారు.

అనకాపల్లి

ఎన్నికల కోడ్ ఉల్లంఘిస్తే చర్యలు తప్పవు.. గ్రామాల్లో పోలీసుల అవగాహన

ఏటికొప్పాక: ఎన్నికల కోడ్ నిబంధనలు ఉల్లంఘించకుండా ప్రజలు అప్రమత్తంగా ఉండాలని ఎలమంచిలి రూరల్ పోలీస్ సిబ్బంది సూచించారు. శుక్రవారం ఏటికొప్పాక గ్రామంలో హెడ్ కానిస్టేబుల్ చందర్రావు గ్రామస్థులకు ఎన్నికల నియమ నిబంధనలపై అవగాహన కల్పించారు. ఎన్నికల సమయంలో రాజకీయ పార్టీల నాయకులు, కార్యకర్తలు, ప్రజలు సంయమనం పాటించాలని సూచించారు.ఎన్నికల నేపథ్యంలో చిన్నచిన్న విషయాలకే గొడవలకు దిగడం, ప్రత్యర్థి పార్టీలపై దూషణలకు పాల్పడటం, శాంతిభద్రతలకు విఘాతం కలిగించే చర్యలకు పాల్పడటం వంటివి చేయకూడదని తెలిపారు. ఎన్నికల నిబంధనలను అతిక్రమిస్తే చట్టపరమైన చర్యలు ఎదుర్కోవాల్సి వస్తుందని హెచ్చరించారు. గ్రామంలో ప్రశాంత వాతావరణాన్ని కాపాడేందుకు ప్రతి ఒక్కరూ బాధ్యతగా వ్యవహరించాలని కోరారు.ఎన్నికల సమయంలో తలెత్తే వివాదాలకు దూరంగా ఉండాలని, ఇతరులను రెచ్చగొట్టే వ్యాఖ్యలు చేయకూడదని సూచించారు. ఎలాంటి అవాంఛనీయ సంఘటనలు జరిగినా, అనుమానాస్పద పరిస్థితులు ఎదురైనా వెంటనే పోలీసులకు సమాచారం అందించాలని తెలిపారు. ప్రజలందరూ పోలీసులకు సహకరించి ఎన్నికలు ప్రశాంతంగా జరిగేలా తోడ్పడాలని కోరారు.

అనకాపల్లి

పాఠశాలల్లో విద్యార్థుల హాజరుపై ప్రత్యేక శ్రద్ధ పెట్టాలి

అనకాపల్లి: దసరా సెలవుల అనంతరం పాఠశాలలు పునఃప్రారంభమైన నేపథ్యంలో విద్యార్థుల హాజరు శాతం తగ్గకుండా ఉపాధ్యాయులు ప్రత్యేక శ్రద్ధ వహించాలని జిల్లా విద్యాశాఖ అధికారి (డీఈఓ) నాగేశ్వరరావు ఆదేశించారు. ఈ మేరకు పాఠశాలల నిర్వహణ, విద్యాబోధనకు సంబంధించి అధికారులకు, ఉపాధ్యాయులకు పలు సూచనలు జారీ చేశారు. పాఠశాల ఆవరణలు, తరగతి గదులను పరిశుభ్రంగా ఉంచుతూ విద్యార్థులకు ఆహ్లాదకరమైన వాతావరణాన్ని కల్పించాలని సూచించారు. విద్యార్థులందరూ పాఠశాలలకు క్రమం తప్పకుండా హాజరయ్యేలా ఉపాధ్యాయులు తల్లిదండ్రులతో సమన్వయం చేసుకోవాలన్నారు. నాణ్యమైన విద్యాబోధన అందించడంతోపాటు మధ్యాహ్న భోజన పథకం (ఎండీఎం) నిబంధనల ప్రకారం, నాణ్యతా ప్రమాణాలతో అమలయ్యేలా పర్యవేక్షించాలని స్పష్టం చేశారు.రెండో సెమిస్టర్‌కు సంబంధించిన పాఠ్యపుస్తకాలను మండల కేంద్రాల నుంచి పాఠశాలలకు వెంటనే తరలించి విద్యార్థులందరికీ పంపిణీ చేయాలని ఆదేశించారు. ఎన్నికల విధుల్లో నియమితులైన సిబ్బంది సైతం తమ విధులకు తప్పనిసరిగా హాజరుకావాలని డీఈఓ నాగేశ్వరరావు స్పష్టం చేశారు. విద్యార్థుల విద్యాభివృద్ధికి అందరూ సమన్వయంతో పనిచేయాలని సూచించారు.

అనకాపల్లి

గోడ దూకి మున్సిపల్ కార్యాలయంలోకి ప్రవేశం.. వ్యక్తిపై కేసు నమోదు

యలమంచిలి: పురపాలక సంఘం సాధారణ ఎన్నికల నేపథ్యంలో ఎన్నికల నిబంధనలను ఉల్లంఘించి మున్సిపల్ కార్యాలయంలోకి ప్రవేశించిన వ్యక్తిపై పోలీసులు కేసు నమోదు చేశారు. ఈ ఘటన అక్టోబర్ 21న నామినేషన్ల ఉపసంహరణ ప్రక్రియ ముగిసిన అనంతరం చోటుచేసుకుంది.పోలీసులు తెలిపిన వివరాల ప్రకారం.. నామినేషన్ల ఉపసంహరణకు నిర్ణయించిన గడువు మధ్యాహ్నం 3 గంటలకు ముగిసిన తర్వాత సోమలింగపాలెంకు చెందిన పిలా హరి గోవిందరావు మున్సిపల్ కార్యాలయం వెనుకవైపు ప్రహరీ గోడ దూకి లోపలికి ప్రవేశించినట్లు ఎన్నికల అధికారుల దృష్టికి వచ్చింది. ఈ విషయంపై సహాయ ఎన్నికల అధికారి, మున్సిపల్ కమిషనర్ ఇచ్చిన నివేదిక మేరకు పోలీసులు స్పందించి సదరు వ్యక్తిని కార్యాలయం నుంచి బయటకు పంపించారు. నిబంధనలను ఉల్లంఘించి కార్యాలయంలోకి ప్రవేశించిన ఘటనపై ఎలమంచిలి టౌన్ పోలీస్ స్టేషన్‌లో భారతీయ న్యాయ సంహిత (BNS) సెక్షన్లు 331(1), 223 కింద కేసు నమోదు చేశారు. ఈ ఘటనపై పోలీసులు దర్యాప్తు కొనసాగిస్తున్నారు.

అనకాపల్లి

ఏటికొప్పాక పంచాయతీ పీఠం ఎవరికీ దక్కేను? కూటమి పార్టీల్లో ఆశావహులెందరో.. అధ్యక్ష పదవిపై ఉత్కంఠ!

ఏటికొప్పాక గ్రామ పంచాయతీ అధ్యక్ష పీఠం ఎవరికి దక్కనుందన్న అంశంపై గ్రామంలో ఆసక్తి నెలకొంది. రాష్ట్రంలో అధికారంలో ఉన్న కూటమి ప్రభుత్వంలో భాగస్వాములైన తెలుగుదేశం, జనసేన, బీజేపీ పార్టీల నుంచి అధ్యక్ష పదవికి ఎవరెవరు ఆశావహులుగా ముందుకొస్తారన్న చర్చ రాజకీయ వర్గాల్లో సాగుతోంది. మరోవైపు స్వతంత్ర అభ్యర్థులు కూడా బరిలో నిలిస్తే పోటీ మరింత ఆసక్తికరంగా మారే అవకాశం ఉంది. గ్రామ పంచాయతీ అధ్యక్ష పదవితో పాటు ఎంపీటీసీ, జడ్పీటీసీ స్థానాలపై కూడా రాజకీయ నాయకులు దృష్టి సారిస్తున్నారు. కూటమి పార్టీల మధ్య అభ్యర్థుల ఎంపిక, స్థానిక నాయకుల అభిప్రాయాలు, గ్రామస్థుల మద్దతు కీలక అంశాలుగా మారనున్నాయి. ఆయా పార్టీల బలాబలాలు, అభ్యర్థుల ప్రజాసంబంధాలు, గ్రామ సమస్యలపై వారి స్పందన ఎన్నికల సమయంలో ప్రాధాన్యం సంతరించుకోనున్నాయి. అయితే, ఏ పార్టీ నుంచి ఎవరు పోటీ చేస్తారు? కూటమి పార్టీల్లో ఎవరికి అవకాశం లభిస్తుంది? ప్రజలు ఎవరిని ఆదరిస్తారు? అన్నది ఇంకా స్పష్టతకు రాలేదు. అధికారిక అభ్యర్థుల ప్రకటన, ఎన్నికల ప్రచారం తర్వాతే రాజకీయ పరిస్థితిపై మరింత స్పష్టత వచ్చే అవకాశం ఉంది.ఏటికొప్పాక పంచాయతీ పీఠం కూటమిలో ఏ పార్టీకి దక్కుతుంది? అధ్యక్ష బాధ్యతలు ఎవరు చేపడతారు? అన్న ఉత్కంఠ గ్రామంలో నెలకొంది.

అనకాపల్లి

పెదకాలవలపల్లిలో టీడీపీకి షాక్‌.. వైఎస్సార్‌సీపీలోకి ముగ్గురు నాయకులు

రాంబిల్లి: అనకాపల్లి జిల్లా యలమంచిలి నియోజకవర్గం రాంబిల్లి మండలం పెదకాలవలపల్లి గ్రామంలో తెలుగుదేశం పార్టీకి చెందిన ముగ్గురు నాయకులు వైఎస్సార్‌ కాంగ్రెస్‌ పార్టీలో చేరారు. టీడీపీలో కొనసాగిన పుణ్యమంతుల చిన్ననాయుడు (10వ వార్డు సభ్యుడు), పుణ్యమంతుల ప్రసాద్ (మాజీ స్కూల్‌ చైర్మన్‌), సిగిరెడ్డి సూరిబాబు (కేబుల్‌ ఆపరేటర్‌) వైఎస్సార్‌సీపీ తీర్థం పుచ్చుకున్నారు.మాజీ సర్పంచ్‌ కనకారావు, తాతబాబు, ఈశ్వరరావు సమక్షంలో మాజీ ఎమ్మెల్యే కరణం ధర్మశ్రీ వారికి వైఎస్సార్‌సీపీ కండువాలు కప్పి పార్టీలోకి ఆహ్వానించారు. ఈ సందర్భంగా పార్టీలో చేరిన నాయకులకు వైఎస్సార్‌సీపీ నాయకులు స్వాగతం పలికారు. స్థానికంగా చోటుచేసుకున్న ఈ పరిణామం రాజకీయంగా ప్రాధాన్యం సంతరించుకుంది. రాబోయే స్థానిక రాజకీయ పరిణామాల నేపథ్యంలో ఈ చేరిక చర్చనీయాంశంగా మారింది. కార్యక్రమంలో పార్టీ నాయకులు, కార్యకర్తలు, స్థానికులు పాల్గొన్నారు.

అనకాపల్లి

ఎన్నికల నేపథ్యంలో యలమంచిలిలో వాహనాలు, లాడ్జీల తనిఖీలు

యలమంచిలి: స్థానిక సంస్థల ఎన్నికల నేపథ్యంలో యలమంచిలి పట్టణ పరిధిలో పోలీసులు తనిఖీలు ముమ్మరం చేశారు. యలమంచిలి సీఐ ధనుంజయరావు, ఎస్‌ఐ ఉపేంద్ర పోలీసు సిబ్బందితో కలిసి వాహనాలు, లాడ్జీలను తనిఖీ చేశారు. ఎన్నికల సమయంలో అక్రమ కార్యకలాపాలను అరికట్టడం, అనుమానాస్పద వ్యక్తుల కదలికలను గుర్తించడం, ప్రజల భద్రతను కాపాడటం లక్ష్యంగా ఈ తనిఖీలు చేపట్టారు. వాహనాల రాకపోకలను పరిశీలిస్తూ, లాడ్జీల్లో బస చేస్తున్న వారి వివరాలను తనిఖీ చేశారు. ఎన్నికల ప్రక్రియ ప్రశాంతంగా, పారదర్శకంగా జరిగేలా పోలీసు శాఖ అప్రమత్తంగా వ్యవహరిస్తోంది. శాంతిభద్రతలకు విఘాతం కలిగించే చర్యలకు తావులేకుండా ముందస్తు భద్రతా చర్యలు చేపడుతున్నారు. పట్టణంలో ఎలాంటి అవాంఛనీయ సంఘటనలు చోటుచేసుకోకుండా పోలీసు సిబ్బంది నిరంతరం నిఘా కొనసాగిస్తున్నారు. ఎన్నికల నిబంధనలను ప్రతి ఒక్కరూ పాటించాలని పోలీసులు సూచిస్తున్నారు.

అనకాపల్లి

ఏటికొప్పాకలో రేపు కనకదుర్గమ్మ మహోత్సవం

ఏటికొప్పాక గ్రామంలో శ్రీశ్రీశ్రీ కనకదుర్గమ్మ అమ్మవారి మహోత్సవాన్ని మంగళవారం (అక్టోబర్ 20) వైభవంగా నిర్వహించేందుకు ఏర్పాట్లు పూర్తయ్యాయి. ఈ సందర్భంగా వివిధ పూజా కార్యక్రమాలతో పాటు అమ్మవారి నిమజ్జన ఊరేగింపును ఘనంగా నిర్వహించనున్నారు.ఉదయం 5 గంటల నుంచి డైలీ మార్కెట్ వద్ద ఉన్న అమ్మవారి ఆలయం సమీపంలో వాహన పూజలు నిర్వహించనున్నారు. మధ్యాహ్నం 2 గంటలకు జమ్మి పూజ జరగనుంది. సాయంత్రం 6 గంటలకు అమ్మవారి నిమజ్జన ఊరేగింపు ప్రారంభం కానుంది.ఈ ఊరేగింపులో ఉమా ఆర్కెస్ట్రా, అన్నవరం వారి కోలాటం, తప్పెటగుళ్లు ప్రత్యేక ఆకర్షణగా నిలవనున్నాయి. భారీ మందుగుండు సామగ్రి ప్రదర్శనతో ఊరేగింపును వైభవంగా నిర్వహించేందుకు మహాత్మా యూత్ కమిటీ ఏర్పాట్లు చేసింది. గ్రామ ప్రజలు, భక్తులు అధిక సంఖ్యలో పాల్గొని అమ్మవారి ఆశీస్సులు పొందాలని, మహోత్సవాన్ని విజయవంతం చేయాలని కమిటీ సభ్యులు విజ్ఞప్తి చేశారు.