పున్నమి న్యూస్ ప్రతినిధి జి ప్రకాష్
వేముల, ఆగస్టు 14:
తీవ్ర వర్షాభావ పరిస్థితులు, ఎల్నినో ప్రభావాన్ని ఎదుర్కొనేందుకు రైతులు ప్రత్యామ్నాయ వ్యవసాయ పద్ధతులను అవలంబించాలని రాష్ట్ర వ్యవసాయ శాఖ అదనపు సంచాలకులు విజయలక్ష్మి సూచించారు. శుక్రవారం వైఎస్ఆర్ కడప జిల్లా వేముల మండలం గొల్లలగూడూరు గ్రామంలో రైతులకు శాస్త్రవేత్తలు, వ్యవసాయ శాఖ అధికారులు అవగాహన కల్పించారు.
ప్రస్తుత వాతావరణ మార్పులు, అనిశ్చిత వర్షపాతం, దీర్ఘకాలిక వర్షాభావ పరిస్థితులను దృష్టిలో ఉంచుకుని రైతులు ముందస్తు జాగ్రత్తలు తీసుకోవాలని అధికారులు సూచించారు. వర్షాలు ఆలస్యమైనప్పుడు అధిక నీటి అవసరం ఉన్న పంటలకు బదులుగా తక్కువ నీటితో సాగు చేయగల ప్రత్యామ్నాయ పంటలను ఎంపిక చేసుకోవాలని తెలిపారు.
విత్తనాలు వేసే ముందు స్థానిక వాతావరణ పరిస్థితులు, నేల స్వభావం, నీటి లభ్యతను పరిగణనలోకి తీసుకుని పంటలను ఎంపిక చేసుకోవాలని విజయలక్ష్మి సూచించారు. వర్షాలు ఆలస్యమైతే పంట కాలాన్ని బట్టి ప్రత్యామ్నాయ పంటల ప్రణాళిక రూపొందించుకోవాలని వ్యవసాయ సహాయ సంచాలకులు ప్రభాకర్ రెడ్డి తెలిపారు.
నేలలో తేమను ఎక్కువ కాలం నిల్వ ఉంచేందుకు మల్చింగ్, అంతర పంటలు, పంట అవశేషాల వినియోగం, తక్కువ దున్నకం, నేలను కప్పి ఉంచే పద్ధతులను అవలంబించాలని జిల్లా వ్యవసాయ సంయుక్త సంచాలకులు సుబ్రహ్మణ్యేశ్వర రావు సూచించారు. వర్షపు నీరు వృథాగా వెళ్లకుండా ఫారం పాండ్లు, చిన్న నీటి నిల్వ నిర్మాణాలు, ఇతర నీటి సంరక్షణ చర్యలు చేపట్టాలని తెలిపారు.
ఈ సందర్భంగా ప్రకృతి వ్యవసాయ సిబ్బంది ఆధ్వర్యంలో విత్తనపు గుళికల తయారీ విధానాన్ని రైతులకు ప్రత్యక్షంగా ప్రదర్శించారు. వర్షాభావ ప్రాంతాల్లో విత్తనాలను సంరక్షిస్తూ అనుకూల వాతావరణ పరిస్థితులు ఏర్పడినప్పుడు మొలకెత్తేలా చేయడంలో విత్తనపు గుళికల ఉపయోగాన్ని వివరించారు.
అనంతరం అధికారులు, శాస్త్రవేత్తలు రైతుల పొలాలను సందర్శించి పంటల పరిస్థితిని పరిశీలించారు. పంటల పెరుగుదల, నేలలో తేమ, తెగుళ్లు–పురుగుల ఉధృతి, పోషక లోపాలు, నీటి లభ్యత తదితర అంశాలను పరిశీలించి రైతులకు తగిన సూచనలు, సలహాలు అందించారు.
కార్యక్రమంలో ప్రకృతి వ్యవసాయం జిల్లా ప్రాజెక్టు మేనేజర్ ప్రవీణ్ కుమార్, పశుసంవర్ధక శాఖ డిప్యూటీ డైరెక్టర్ ప్రసన్న, మండల వ్యవసాయ అధికారి జి.పి. ఓబులేష్, గ్రామ వ్యవసాయ సహాయకులు, ఇతర సిబ్బంది, రైతులు పాల్గొన్నారు.
