ప్రజా సేవలో మరో అడుగు భీమిలి పోలీసులు

చిప్పాడలో మెగా మెడికల్ క్యాంప్.. 14 మందికి ఉచిత వైద్య సేవలు విశాఖపట్నం జిల్లా, భీమిలి, ఆగస్టు 9 (పున్నమి ప్రతినిధి): ప్రజల భద్రతతో పాటు వారి ఆరోగ్య సంక్షేమానికి కూడా భీమిలి పోలీసులు ప్రాధాన్యత ఇస్తున్నారు. విశాఖపట్నం సిటీ పోలీస్ కమిషనర్ శ్రీ శంకబ్రత బగ్చి, IPS ఆదేశాల మేరకు భీమిలి పోలీసుల ఆధ్వర్యంలో చిప్పాడ గ్రామంలో మెగా మెడికల్ క్యాంప్ నిర్వహించారు. ఈ వైద్య శిబిరంలో చిప్పాడ గ్రామంతో పాటు పరిసర ప్రాంతాల ప్రజలకు ఉచిత వైద్య పరీక్షలు, వైద్య సేవలు అందించారు. మొత్తం 14 మంది గ్రామస్తులు క్యాంప్‌ను సద్వినియోగం చేసుకుని వైద్య పరీక్షలు చేయించుకున్నారు. అవసరమైన వారికి ఉచితంగా మందులు పంపిణీ చేశారు. ప్రజలతో స్నేహపూర్వక సంబంధాలే లక్ష్యం పోలీసులు–ప్రజల మధ్య మరింత సన్నిహిత, స్నేహపూర్వక వాతావరణం పెంపొందించేందుకు ఇలాంటి సేవా కార్యక్రమాలను నిరంతరం నిర్వహిస్తామని భీమిలి సీఐ తెలిపారు. ప్రజల సమస్యలకు స్పందిస్తూ, వారి సంక్షేమానికి అండగా నిలవడం పోలీసుల సామాజిక బాధ్యతలో భాగమని పేర్కొన్నారు. మెడికల్ క్యాంప్ విజయవంతంగా నిర్వహించేందుకు సహకరించిన డాక్టర్లు, వైద్య సిబ్బంది, పోలీసు సిబ్బందికి సీఐ కృతజ్ఞతలు తెలిపారు. ప్రజల భద్రతే కాదు.. ప్రజల ఆరోగ్యం కూడా మా బాధ్యత అన్న సందేశాన్ని భీమిలి పోలీసులు చాటిచెప్పారు.