వార్డుల విభజన సరిచేయాలని ఆర్డీఓకు వైఎస్సార్సీపీ వినతి

ప్రజలకు ఇబ్బందులు కలిగించేలా డీలిమిటేషన్ జరిగిందని ఆరోపణ

ఆత్మకూరు (హరికిరణ్, పున్నమి ప్రతినిధి):

ఆత్మకూరు మున్సిపాలిటీలో ఇటీవల చేపట్టిన వార్డుల పునర్విభజనపై వైఎస్సార్సీపీ నాయకులు తీవ్ర అభ్యంతరం వ్యక్తం చేశారు. మున్సిపాలిటీలో కొత్తగా ఐదు వార్డులను పెంచే క్రమంలో చేపట్టిన డీలిమిటేషన్ ప్రజలకు అనుకూలంగా కాకుండా అస్తవ్యస్తంగా జరిగిందని ఆరోపిస్తూ సోమవారం ఆత్మకూరు ఆర్డీఓ కార్యాలయంలో వినతిపత్రం సమర్పించారు. మున్సిపల్ స్పెషల్ ఆఫీసర్ హోదాలో ఉన్న ఆర్డీఓ బి.పావనికి వైఎస్సార్సీపీ మున్సిపల్ విభాగ రాష్ట్ర కార్యదర్శి అల్లారెడ్డి ఆనంద్ రెడ్డి ఆధ్వర్యంలో నాయకులు ఈ వినతిపత్రాన్ని అందజేశారు.ఈ సందర్భంగా నాయకులు మాట్లాడుతూ ప్రస్తుతం చేపట్టిన వార్డుల విభజన ప్రజలకు తీవ్ర అయోమయం కలిగించేలా ఉందన్నారు. ఒకే ప్రాంతంలో నివసిస్తున్న ప్రజలను వేర్వేరు వార్డుల్లో చేర్చడమే కాకుండా, ఒకే వీధిలోని కుటుంబాలను కూడా విడదీసి ఇతర వార్డులకు మార్చడం సరైన విధానం కాదని పేర్కొన్నారు. కొందరి ఓట్లను దూర ప్రాంత వార్డులకు మార్చడం వల్ల ప్రజలు తమ ఓట్లు ఎక్కడ ఉన్నాయో తెలుసుకునేందుకు ఇబ్బందులు పడుతున్నారని తెలిపారు.ప్రజల సౌకర్యాన్ని దృష్టిలో ఉంచుకొని చేపట్టాల్సిన వార్డుల పునర్విభజనలో రాజకీయ ప్రయోజనాలు ప్రధానంగా కనిపిస్తున్నాయని ఆరోపించారు. కాలనీలు, వీధులు, కుటుంబాలను విభజించడం వల్ల భవిష్యత్తులో పరిపాలనా సమస్యలు తలెత్తే అవకాశం ఉందన్నారు. ఒకే ప్రాంత ప్రజలు వేర్వేరు వార్డుల్లో ఉండడం వల్ల అభివృద్ధి పనులు, పౌరసేవల అమలులో కూడా గందరగోళం ఏర్పడుతుందని అభిప్రాయపడ్డారు.ప్రజల అభిప్రాయాలను పరిగణనలోకి తీసుకోకుండా తొందరపాటుగా ఈ ప్రక్రియను పూర్తి చేశారని నాయకులు విమర్శించారు. వార్డుల హద్దులు ఎలా నిర్ణయించారో ప్రజలకు స్పష్టత లేకపోవడంతో పట్టణంలో అయోమయ పరిస్థితి నెలకొందన్నారు. ప్రజలకు అర్థమయ్యేలా వీధులు, కాలనీలు, ల్యాండ్‌మార్కులు ఆధారంగా వార్డుల వివరాలను ప్రకటించాలని డిమాండ్ చేశారు.స్థానిక పరిస్థితులు, జనాభా, భౌగోళిక అనుసంధానం ఆధారంగా వార్డులను సక్రమంగా పునర్విభజించాలని ఆర్డీఓను కోరారు. ప్రజల అభిప్రాయాలను స్వీకరించి, అన్ని రాజకీయ పార్టీలతో చర్చించి పారదర్శకంగా నిర్ణయం తీసుకోవాలని విజ్ఞప్తి చేశారు. ప్రజలకు ఇబ్బందులు కలగకుండా వార్డుల విభజనను మరోసారి సమగ్రంగా పరిశీలించాలని అధికారులను కోరారు.ఈ కార్యక్రమంలో ఎస్సీ సెల్ విభాగ రాష్ట్ర కార్యదర్శి కొండా వెంకటేశ్వర్లు, యువత నాయకుడు నోటి వినయ్ కుమార్ రెడ్డి, టౌన్ బూత్ కమిటీ కన్వీనర్ బత్తిన నారాయణరెడ్డి తదితరులు పాల్గొన్నారు.