మా బతుకులు ఆగం చేసే వైన్ అండ్ బార్ షాపులు శని ఆదివారాల్లో బంద్ చేయాలి

మా బతుకులు ఆగం చేసే వైన్ అండ్ బార్ షాపులు శని ఆదివారాల్లో బంద్ చేయాలి

పున్నమి న్యూస్
తెలంగాణ ఇంచార్జి
మే 2026

ప్రస్తుతం పెట్రోల్ బంకులు ప్రతి శని, ఆదివారాల్లో బంద్ చేయాలనే డిమాండ్ రాష్ట్రవ్యాప్తంగా చర్చనీయాంశంగా మారుతున్న వేళ, సామాన్య ప్రజల నుంచి మరో కీలక ప్రశ్న వినిపిస్తోంది. ప్రజల జీవన విధానాన్ని దెబ్బతీస్తూ, కుటుంబాల్లో కలహాలకు కారణమవుతూ, యువత భవిష్యత్తును నాశనం చేస్తున్న వైన్ షాపులు మరియు బార్‌లను కూడా వారాంతాల్లో మూసివేయాలని పలువురు సామాజికవేత్తలు, మహిళా సంఘాలు, యువజన సంఘాలు డిమాండ్ చేస్తున్నాయి.
పెట్రోల్ బంకులు బంద్ చేస్తే ప్రజలు కొంత అసౌకర్యానికి గురవుతారు. కానీ మద్యం దుకాణాలు తెరిచి ఉండటం వల్ల అనేక కుటుంబాలు ఆర్థికంగా, మానసికంగా తీవ్ర ఇబ్బందులు పడుతున్నాయని మహిళలు ఆవేదన వ్యక్తం చేస్తున్నారు. రోజువారీ కూలీలు సంపాదించిన డబ్బు అంతా మద్యం కోసం ఖర్చవుతుండటంతో కుటుంబ పోషణ కష్టమవుతోందని అంటున్నారు.
గ్రామాలు, పట్టణాల్లో ప్రతి వీధిలోనూ వైన్ షాపులు ఏర్పాటు చేయడం వల్ల యువత మద్యం బారిన పడుతోందని పెద్దలు ఆందోళన వ్యక్తం చేస్తున్నారు. పాఠశాలలు, దేవాలయాలు, కాలనీల సమీపంలో కూడా బార్‌లు నడవడం వల్ల సామాజిక వాతావరణం దెబ్బతింటోందని ప్రజలు చెబుతున్నారు. రోడ్డు ప్రమాదాలు, కుటుంబ హింస, నేరాలు పెరగడానికి మద్యం ఒక ప్రధాన కారణమని అభిప్రాయపడుతున్నారు.
ప్రభుత్వం ప్రజల ఆరోగ్యం, కుటుంబాల సంక్షేమం దృష్టిలో పెట్టుకుని కనీసం శని, ఆదివారాల్లో అయినా వైన్ షాపులు మరియు బార్‌లను బంద్ చేయాలని డిమాండ్ చేస్తున్నారు. వారాంతాల్లో కుటుంబ సభ్యులతో గడపాల్సిన సమయాన్ని చాలా మంది మద్యం దుకాణాల వద్ద గడుపుతున్నారని మహిళలు ఆవేదన వ్యక్తం చేస్తున్నారు.
“పెట్రోల్ లేకపోతే ఒకరోజు ఇబ్బంది పడతాం… కానీ మద్యం వల్ల జీవితాంతం కుటుంబాలు నష్టపోతున్నాయి” అంటూ పలువురు మహిళలు ప్రభుత్వాన్ని ప్రశ్నిస్తున్నారు. సమాజంలో శాంతి భద్రతలు కాపాడాలంటే మద్యం నియంత్రణపై కఠిన నిర్ణయాలు తీసుకోవాలని ప్రజాసంఘాలు కోరుతున్నాయి.
ఇప్పటికైనా ప్రభుత్వం స్పందించి, ప్రజల అభిప్రాయాలను గౌరవించి, వారాంతాల్లో వైన్ అండ్ బార్ షాపులను బంద్ చేయాలని ప్రజలు విజ్ఞప్తి చేస్తున్నారు.