మద్యం విక్రయాలతో పేద కుటుంబాలు నష్టపోతున్నాయి
ఐద్వా, డీవైఎఫ్ఐ, వ్యవసాయ కార్మిక సంఘం ఆధ్వర్యంలో నిరసన
కాగజ్నగర్, ఆగస్టు 09:
కాగజ్నగర్ మండలం బట్టుపల్లి గ్రామపంచాయతీ పరిధిలో కొనసాగుతున్న బెల్ట్ షాపులను వెంటనే మూసివేయాలని డిమాండ్ చేస్తూ ఐద్వా, డీవైఎఫ్ఐ, వ్యవసాయ కార్మిక సంఘం ఆధ్వర్యంలో ఆదివారం గ్రామపంచాయతీ కార్యాలయం ఎదుట నిరసన కార్యక్రమం నిర్వహించారు. అనంతరం గ్రామ సర్పంచ్కు వినతిపత్రం అందజేశారు.
ఈ సందర్భంగా ఐద్వా జిల్లా కార్యదర్శి దుర్గం అనిత మాట్లాడుతూ గ్రామాల్లో విచ్చలవిడిగా బెల్ట్ షాపులు నిర్వహించడం వల్ల పేద, మధ్యతరగతి కుటుంబాలు తీవ్రంగా నష్టపోతున్నాయని ఆవేదన వ్యక్తం చేశారు. మద్యం సులభంగా అందుబాటులో ఉండటంతో యువత మద్యానికి బానిసలుగా మారుతున్నారని, కుటుంబాల్లో ఆర్థిక ఇబ్బందులు, గొడవలు పెరుగుతున్నాయని అన్నారు.
మద్యం సేవించి ఇళ్లకు వస్తున్న వారి వల్ల మహిళలు, చిన్నారులు భయాందోళనలకు గురవుతున్నారని తెలిపారు. కుటుంబ సంపాదనలో గణనీయమైన భాగం మద్యానికి ఖర్చవుతుండటంతో పిల్లల చదువులు, కుటుంబ అవసరాలు దెబ్బతింటున్నాయని పేర్కొన్నారు.
ప్రభుత్వం మద్యం నియంత్రణకు చర్యలు తీసుకోవాల్సిన సమయంలో గ్రామాల్లో అనధికారికంగా బెల్ట్ షాపులు నిర్వహించడం ఆందోళనకరమన్నారు. మద్యం కారణంగా గ్రామాల్లో శాంతిభద్రతలు, ప్రజల ఆరోగ్యం దెబ్బతింటున్నాయని, ముఖ్యంగా మహిళలు, యువత భవిష్యత్తుపై ప్రతికూల ప్రభావం పడుతోందని అన్నారు.
బట్టుపల్లి గ్రామపంచాయతీ పరిధిలోని బెల్ట్ షాపులను తక్షణమే మూసివేయాలని, గ్రామాల్లో మద్యం విక్రయాలపై అధికారులు కఠిన చర్యలు తీసుకోవాలని డిమాండ్ చేశారు. ప్రజల అభిప్రాయాలను పరిగణనలోకి తీసుకుని మద్యం నియంత్రణకు ప్రత్యేక చర్యలు చేపట్టాలని కోరారు. బెల్ట్ షాపులను మూసివేసే వరకు ప్రజలను సమీకరించి దశలవారీగా ఉద్యమాన్ని కొనసాగిస్తామని హెచ్చరించారు.
ఈ కార్యక్రమంలో ఐద్వా జిల్లా అధ్యక్షురాలు మాచర్ల వినోద, జిల్లా కోశాధికారి షాహిని, డీవైఎఫ్ఐ జిల్లా కార్యదర్శి గొడిసెల కార్తీక్, జిల్లా ఉపాధ్యక్షుడు దుర్గ నిఖిల్, వ్యవసాయ కార్మిక సంఘం జిల్లా కార్యదర్శి ముంజం ఆనంద్, ఆర్టీఏ జిల్లా అధ్యక్షుడు ప్రవీణ్తో పాటు మహిళలు, యువకులు, గ్రామ ప్రజలు తదితరులు పాల్గొన్నారు.
