నాన్నగారి ఆశయాలే నా మార్గదర్శకం-ఎమ్మెల్యే బొజ్జల సుధీర్ రెడ్డి భావోద్వేగ నివాళి.

శ్రీకాళహస్తి, ఏప్రిల్ 15 (పున్నమి న్యూస్) ప్రజా నాయకుడు, మాజీ మంత్రి, స్వర్గీయ బొజ్జల గోపాలకృష్ణ రెడ్డి గారి 78వ జయంతి వేడుకలు శ్రీకాళహస్తిలో ఘనంగా జరిగాయి. ఈ సందర్భంగా ఎమ్మెల్యే శ్రీ బొజ్జల సుధీర్ రెడ్డి తన నివాసంలో కుటుంబ సభ్యులతో కలిసి తండ్రి చిత్రపటానికి పూలమాలలు వేసి ఘన నివాళులర్పించారు. ఈ సందర్భంగా ఎమ్మెల్యే సుధీర్ రెడ్డి మాట్లాడుతూ.. “జన హృదయ విజేతగా నిలిచిన నాన్నగారు నా ప్రతి అడుగుకు నిరంతర స్ఫూర్తి. ఆయన మన మధ్య భౌతికంగా లేకపోయినా, ఆయన ఆశీస్సులు ఎల్లప్పుడూ మనందరిపై ఉంటాయని ఆశిస్తున్నాను,” అని భావోద్వేగానికి లోనయ్యారు. తండ్రి చూపిన బాటలోనే నడుస్తూ, శ్రీకాళహస్తి నియోజకవర్గ ప్రజల సంక్షేమం కోసం అంకితభావంతో పనిచేస్తానని ఆయన స్పష్టం చేశారు. “నాన్నగారి ఆశయాల సాధనే నా లక్ష్యం. నియోజకవర్గ అభివృద్ధికి, ప్రజల సేవకు నేను ఎల్లప్పుడూ సిద్ధంగా ఉంటానని ఈ సందర్భంగా మరోసారి పునరంకితం అవుతున్నానని ఎమ్మెల్యే పేర్కొన్నారు. ఈ కార్యక్రమంలో బొజ్జల కుటుంబ సభ్యులతో పాటు పలువురు ముఖ్య నాయకులు, కార్యకర్తలు పాల్గొని స్వర్గీయ గోపాలకృష్ణ రెడ్డి నియోజకవర్గానికి చేసిన సేవలను స్మరించుకున్నారు.