ది స్కూల్‌లో ఘనంగా స్వాతంత్య్ర దినోత్సవం-పదో తరగతి టాపర్లకు బహుమతులు

శ్రీ కాళహస్తి, ఆగస్టు 16, (పున్నమి న్యూస్): శ్రీకాళహస్తి పట్టణంలోని స్థానిక ‘ది స్కూల్’ నందు స్వాతంత్య్ర దినోత్సవ వేడుకలను శనివారం అత్యంత ఘనంగా నిర్వహించారు. ఈ వేడుకలను పురస్కరించుకుని, గత విద్యాసంవత్సరం పదవ తరగతి పరీక్షల్లో అత్యుత్తమ మార్కులు సాధించి పాఠశాల కీర్తిని చాటిన ప్రతిభావంతులైన విద్యార్థులకు ప్రత్యేకంగా వెండి నాణేలను (సిల్వర్ కాయిన్స్) బహుమతిగా అందించినట్లు పాఠశాల కరెస్పాండెంట్ జనార్దన్ రావు జె. పవార్ అధికారికంగా వెల్లడించారు. పరీక్షల్లో 594 మార్కులతో అగ్రస్థానంలో నిలిచిన విద్యార్థిని ఎం. రితికకు 30 గ్రాముల వెండి నాణేన్ని, అలాగే 589 మార్కులు సాధించిన ఎ. భవిత, 588 మార్కులు సాధించిన ఎం. అగస్య సాయి, మరియు 581 మార్కులు సాధించిన కె. చరణ్‌లకు ఒకొక్కరికి 20 గ్రాముల వెండి నాణేలను అందజేసి దుశ్శాలువాలతో ఘనంగా సన్మానించారు. ఈ సందర్భంగా కరెస్పాండెంట్ మాట్లాడుతూ.. పట్టణంలోనే విద్యార్థులు ఉత్తమ మార్కులు సాధించడానికి అహర్నిశలు శ్రమించి, ప్రత్యేక శిక్షణ ఇచ్చిన ఉపాధ్యాయ బృందాన్ని కూడా గుర్తించి నగదు బహుమతులతో ఘనంగా సత్కరించినట్లు వివరించారు. తమ పాఠశాలలో కేవలం చదువు మాత్రమే కాకుండా క్రమశిక్షణతో కూడిన పద్ధతులను నేర్పుతూ, విద్యార్థుల భవిష్యత్తుకు ఎంతో అవసరమైన ఆధునిక సాంకేతిక విద్యను అందిస్తున్నట్లు స్పష్టం చేశారు. ఈ వేడుకల్లో పాఠశాల ఉపాధ్యాయ బృందం, విద్యార్థులు, వారి తల్లిదండ్రులు పెద్ద సంఖ్యలో పాల్గొని టాపర్ల ప్రతిభను అభినందించారు.