ఏరియా ఆసుపత్రిలో సీబీహెచ్ఐ బృందం తనిఖీలు-రికార్డుల నిశిత పరిశీలన

శ్రీ కాళహస్తి, ఆగస్టు 19, (పున్నమి న్యూస్): శ్రీకాళహస్తి పట్టణంలోని ఏరియా ప్రభుత్వ ఆసుపత్రిని సెంట్రల్ బ్యూరో ఆఫ్ హెల్త్ ఇంటెలిజెన్స్ (CBHI) ఉన్నతాధికారుల బృందం బుధవారం నాడు సందర్శించి ముమ్మర తనిఖీలు నిర్వహించింది. ఆసుపత్రిలోని అంటువ్యాధులు (CD), దీర్ఘకాలిక వ్యాధుల (NCD) విభాగాలకు సంబంధించిన కీలక రికార్డులను అధికారులు నిశితంగా పరిశీలించారు. ఆసుపత్రిలో రోజువారీగా నిర్వహిస్తున్న అవుట్ పేషెంట్ (OP), ఇన్ పేషెంట్ (IP) నమోదు పుస్తకాలను తనిఖీ చేసి, రోగుల వ్యాధుల వివరాలను సక్రమంగా నమోదు చేయడంపై సిబ్బందికి పలు కీలక సూచనలు చేశారు. ప్రపంచ ఆరోగ్య సంస్థ నిబంధనల ప్రకారం అంతర్జాతీయ వ్యాధుల వర్గీకరణ (ICD) కోడ్లను ప్రతిరోజూ ఓపీ, ఐపీ రికార్డుల్లో విధిగా అమలు చేయాలని ఆదేశించారు. ఈ తనిఖీ కార్యక్రమంలో సీబీహెచ్ఐ డిప్యూటీ డైరెక్టర్ జి. రామచంద్ర, తిరుపతి ఎన్సీడీ ఇన్‌చార్జి డాక్టర్ రెడ్డి ప్రసాద్, స్టాటిస్టికల్ ఆఫీసర్ నాగేంద్ర పాల్గొని ఆసుపత్రి డేటా నిర్వహణ తీరును పరిశీలించారు. రికార్డుల క్రమబద్ధీకరణ, రోజువారీ వ్యాధుల వర్గీకరణ కోడ్ల నమోదు ద్వారానే రోగుల వైద్య సమాచారం అత్యంత ఖచ్చితంగా ఉంటుందని, భవిష్యత్తు ప్రణాళికలకు ఇది ఎంతగానో దోహదపడుతుందని అధికారులు స్పష్టం చేశారు. ఈ ప్రాధాన్యత కలిగిన తనిఖీ కార్యక్రమంలో ఏరియా ఆసుపత్రి మెడికల్ సూపరింటెండెంట్ డాక్టర్ మురళీకృష్ణ, సీఎస్ఆర్ఎంఓ డాక్టర్ మణి, నర్సింగ్ సూపరింటెండెంట్ రత్నకుమారి, హెడ్ నర్స్ విజయకుమారి, సీపీఓ నాగరాజుతో పాటు ఆసుపత్రి వివిధ విభాగాల సిబ్బంది పాల్గొన్నారు.