బిల్లింగ్ విధానం, ధరల వ్యవహారంపై విచారణ కోరిన రైతులు – సమగ్ర దర్యాప్తు చేయాలని రైతు సంక్షేమ సంఘం డిమాండ్
వాంకిడి/ఆసిఫాబాద్, జూలై 4: కొమురం భీం-ఆసిఫాబాద్ జిల్లా వాంకిడి మండలంలోని కొన్ని ఫెర్టిలైజర్ దుకాణాల వ్యాపార విధానంపై రైతుల్లో ఆందోళన వ్యక్తమవుతోంది. ఎరువుల కొనుగోలు సమయంలో కొంత మొత్తం తగ్గించి నగదు లేదా చెక్కు రూపంలో ఇచ్చినట్లు చెప్పినా, తుది బిల్లులో మాత్రం పూర్తి ధరనే నమోదు చేస్తున్నారనే ఆరోపణలు వినిపిస్తున్నాయి. వ్యవసాయ సీజన్లో వ్యాపార లావాదేవీలపై పూర్తి అవగాహన లేని రైతులు అధిక ధరలు చెల్లించి అప్పుల పాలవుతున్నారనే అభిప్రాయాలు వ్యక్తమవుతున్నాయి.
మండల వ్యాప్తంగా కొన్ని ఫెర్టిలైజర్ దుకాణాల్లో ఎరువుల ధరల నిర్ణయం, బిల్లింగ్ విధానం, రైతులకు ఇచ్చే రాయితీలు, బిల్లుల్లో చూపే మొత్తాలపై సందేహాలు ఉన్నాయని రైతులు చెబుతున్నారు. కొంతమంది రైతులు తమకు రాయితీ ఇచ్చినట్లు చెప్పినా, బిల్లులో మాత్రం పూర్తి ధరనే నమోదు చేస్తున్నారని ఆరోపిస్తున్నారు. ఈ ఆరోపణలపై సంబంధిత శాఖలు సమగ్ర విచారణ జరిపి వాస్తవాలు వెలుగులోకి తేవాలని వారు డిమాండ్ చేస్తున్నారు.
ఈ అంశంపై ఫెర్టిలైజర్ దుకాణాల యూనియన్కు నాయకత్వం వహిస్తున్న ఒక వ్యాపారిని మీడియా ప్రతినిధులు సంప్రదించగా, “ఏం రాస్తారో రాసుకోండి… మేమంతా నిజాయితీగా వ్యాపారం చేస్తున్నాం” అని స్పందించినట్లు సమాచారం. అయితే అదే సమయంలో ఆయన ఒక డైరీలో వరుసగా పాత్రికేయుల పేర్లు నమోదు చేస్తున్నట్లు కొందరు విలేకరులు గమనించినట్లు చెబుతున్నారు. అనంతరం ఆ డైరీని పక్కన పెట్టినట్లు కూడా పేర్కొంటున్నారు. వ్యాపార లావాదేవీలు పూర్తిగా పారదర్శకంగా, నిబంధనలకు అనుగుణంగా ఉంటే పాత్రికేయుల పేర్లను ప్రత్యేకంగా నమోదు చేయాల్సిన అవసరం ఏమిటనే ప్రశ్నలు స్థానికంగా చర్చనీయాంశమయ్యాయి. ఆ డైరీలో పేర్లు నమోదు చేయడం వెనుక ఉద్దేశం ఏమిటి? కేవలం సందర్శించిన వారి వివరాల కోసమేనా? లేక మరేదైనా కారణమా? అనే అంశాలపై స్పష్టత రావాల్సి ఉందని స్థానికులు అభిప్రాయపడుతున్నారు.
ఇదిలా ఉండగా, ఫెర్టిలైజర్ షాపులపై సమగ్ర విచారణ జరపాలని కొమురం భీం-ఆసిఫాబాద్ జిల్లా రైతు సంక్షేమ సంఘం జిల్లా అధ్యక్షుడు బోట్పెళ్లి జైరామ్ డిమాండ్ చేశారు. వాంకిడి మండలంలోని కొన్ని ఫెర్టిలైజర్ దుకాణాల్లో రైతులకు విక్రయిస్తున్న ఎరువుల ధరల విషయంలో అక్రమాలు జరుగుతున్నాయనే ఆరోపణలు వినిపిస్తున్నాయని ఆయన పేర్కొన్నారు. రైతులకు నగదు లేదా చెక్కు రూపంలో కొంత మొత్తం తగ్గించి ఇచ్చినట్లు చూపిస్తూ, బిల్లుపై మాత్రం పూర్తి ధర నమోదు చేస్తున్నారనే ఫిర్యాదులు తమ దృష్టికి వచ్చాయని తెలిపారు.
వ్యవసాయ సీజన్లో యూరియా, పత్తి విత్తనాలు, పురుగుమందుల విక్రయాల్లో అధిక ధరలు వసూలు చేస్తున్నారనే అనుమానాలు వ్యక్తమవుతున్నాయని జైరామ్ అన్నారు. అమాయక రైతులు వ్యాపార లావాదేవీల్లో అవగాహన లేక అధిక ధరలు చెల్లించి అప్పుల పాలవుతున్నారని ఆయన ఆవేదన వ్యక్తం చేశారు. ఈ ఆరోపణలపై సంబంధిత అధికారులు నామమాత్రపు తనిఖీలతో కాకుండా లోతైన విచారణ చేపట్టి వాస్తవాలు వెలికితీయాలని డిమాండ్ చేశారు.
అలాగే, ఫెర్టిలైజర్ దుకాణాల యూనియన్కు చెందిన ఓ వ్యాపారిని మీడియా ప్రతినిధులు సంప్రదించిన సమయంలో పాత్రికేయుల పేర్లను వరుసగా ఒక డైరీలో నమోదు చేస్తున్నట్లు కొందరు గమనించారని జైరామ్ పేర్కొన్నారు. ఒకవేళ అన్ని లావాదేవీలు నిబంధనల ప్రకారమే, పారదర్శకంగా జరుగుతున్నట్లయితే పాత్రికేయుల పేర్లను ప్రత్యేకంగా నమోదు చేయాల్సిన అవసరం ఏమిటనే సందేహాలు తలెత్తుతున్నాయని అన్నారు. ఈ అంశంపైనా అధికారులు దృష్టి సారించాలని కోరారు.
కొన్ని ఫెర్టిలైజర్ దుకాణాలకు సంబంధించిన లైసెన్సులు, అనుమతులు, ఇతర చట్టబద్ధ పత్రాలు సక్రమంగా ఉన్నాయా అనే విషయంపై కూడా అనుమానాలు వ్యక్తమవుతున్నాయని జైరామ్ తెలిపారు. లైసెన్సు ఒకరి పేరుపై ఉండి, వ్యాపారం మాత్రం మరొకరు నిర్వహిస్తున్నారనే ఆరోపణలు వినిపిస్తున్నాయని, వాటిపై వ్యవసాయ శాఖతో పాటు లీగల్ మెట్రాలజీ, వాణిజ్య పన్నుల శాఖ, జిల్లా యంత్రాంగం సంయుక్తంగా తనిఖీలు నిర్వహించాలని కోరారు.
ప్రతి ఏడాది వ్యవసాయ సీజన్లో యూరియా, పత్తి విత్తనాలు, పురుగుమందుల ధరలు పెరగడం వల్ల రైతులు అప్పుల ఊబిలో కూరుకుపోతున్నారని, కొంతమంది తీవ్ర ఆర్థిక ఇబ్బందులు ఎదుర్కొంటూ కుటుంబాలతో కలిసి సంక్షోభంలో పడుతున్నారని జైరామ్ ఆవేదన వ్యక్తం చేశారు. రైతుల కష్టార్జిత ధనాన్ని దోచుకునే చర్యలను ప్రభుత్వం ఎట్టి పరిస్థితుల్లోనూ ఉపేక్షించకూడదని అన్నారు. రైతుల పక్షాన తమ సంఘం ఎల్లప్పుడూ నిలుస్తుందని, సమస్యలను ప్రభుత్వ దృష్టికి తీసుకెళ్లేందుకు కృషి చేస్తామని హామీ ఇచ్చారు.
రైతులు మరోవైపు, ఎరువుల విక్రయంలో బిల్లింగ్ విధానం, ధరల నిర్ణయం, రాయితీల అమలు, స్టాక్ నిర్వహణ, లైసెన్సుల చెల్లుబాటు వంటి అంశాలపై ప్రత్యేక దర్యాప్తు చేపట్టాలని కోరుతున్నారు. నిజంగా ఎక్కడైనా అవకతవకలు జరిగితే బాధ్యులపై కఠిన చర్యలు తీసుకోవాలని, ఆరోపణలు అసత్యమైతే వాటిపై కూడా స్పష్టత ఇవ్వాలని ప్రజలు అభిప్రాయపడుతున్నారు. పూర్తి వాస్తవాలు, సంబంధిత పత్రాలు, రైతుల వాంగ్మూలాలు, అధికారుల స్పందన వెలుగులోకి వచ్చిన తర్వాతే ఈ వ్యవహారంపై స్పష్టమైన చిత్రం బయటపడే అవకాశం ఉందని స్థానిక వర్గాలు పేర్కొంటున్నాయి.
