ఖమ్మం పోలీస్ కమిషనరేట్ పరిధిలో మహిళలను వ్యభిచారంలోకి దింపుతూ ఆర్థిక లాభాలు పొందుతున్న బత్తుల బాలకృష్ణ (30)పై పీడీ యాక్ట్ కింద నిర్బంధ ఉత్తర్వులు జారీ చేసినట్లు పోలీస్ కమిషనర్ సునీల్ దత్ తెలిపారు. ముదిగొండ మండలం చిరుమర్రి గ్రామానికి చెందిన బాలకృష్ణపై ఖమ్మం టూ టౌన్, త్రీ టౌన్ పోలీస్ స్టేషన్లలో అనైతిక రవాణా, వ్యభిచార నిరోధక చట్టం కింద కేసులు నమోదయ్యాయని పేర్కొన్నారు. 2026 జనవరి 6న విశ్వసనీయ సమాచారంతో ఖమ్మం గాంధీచౌక్లోని ఓ లాడ్జిపై పోలీసులు దాడి చేశారు. కాకినాడకు చెందిన మహిళను ఆర్థిక ఇబ్బందులను ఆసరాగా చేసుకుని ఖమ్మంకు తీసుకొచ్చి వ్యభిచారంలోకి దించినట్లు దర్యాప్తులో వెల్లడైంది. ప్రధాన నిందితుడు బాలకృష్ణ, మెరెడ్డి సత్యవతి, లాడ్జి మేనేజర్ అలకుంట్ల శ్రీకాంత్తో కలిసి కుట్రపూరితంగా వ్యవహరించినట్లు పోలీసులు తెలిపారు. నేరప్రవర్తనను అడ్డుకునేందుకు పీడీ యాక్ట్ సెక్షన్ 3(2) కింద ఉత్తర్వులు జారీ చేసి బాలకృష్ణను చంచల్గూడ సెంట్రల్ జైలుకు తరలించారు.
