రాజమండ్రి: జిల్లాలో ప్రత్యేక బియ్యం విక్రయ కేంద్రాలు

తూర్పుగోదావరి జిల్లా సెప్టెంబర్ 13 (పౌర్ణమి ప్రతినిధి) **రాజమహేంద్రవరం:** పండుగను దృష్టిలో ఉంచుకుని సామాన్య ప్రజలకు అందుబాటు ధరల్లో బియ్యం అందించేందుకు జిల్లాలో ప్రత్యేక బియ్యం విక్రయ కేంద్రాలను ఏర్పాటు చేశారు. జిల్లాలోని రైతు బజార్లు, 36 రైస్ మిల్ పాయింట్ల వద్ద ప్రత్యేక విక్రయ కేంద్రాలను ఏర్పాటు చేసినట్లు ఎంఎస్‌ఓ జి. బాపిరాజు తెలిపారు. పండుగ సమయంలో బియ్యానికి డిమాండ్ పెరిగే అవకాశం ఉన్న నేపథ్యంలో వినియోగదారులపై అదనపు భారం పడకుండా తక్కువ ధరకు నాణ్యమైన బియ్యం అందించడమే లక్ష్యంగా ఈ కేంద్రాలను ఏర్పాటు చేసినట్లు అధికారులు తెలిపారు. ప్రజలు ఈ అవకాశాన్ని సద్వినియోగం చేసుకోవాలని సూచించారు. సాధారణ మార్కెట్‌లో బియ్యం ధరలు కిలోకు సుమారు రూ.62 వరకు ఉండగా, ప్రత్యేక విక్రయ కేంద్రాల్లో మాత్రం కిలో రూ.52, రూ.50 చొప్పున బియ్యం విక్రయిస్తున్నట్లు అధికారులు వెల్లడించారు. దీంతో మార్కెట్ ధరలతో పోలిస్తే వినియోగదారులకు కొంత మేరకు ధర తగ్గింపు లభించనుంది. ప్రత్యేక కేంద్రాల ద్వారా తక్కువ ధరకు బియ్యం లభించడం వల్ల పండుగ సందర్భంగా బియ్యం కొనుగోలు చేసే కుటుంబాలకు ఆర్థికంగా కొంత ఉపశమనం కలగనుంది. రైతు బజార్లు, రైస్ మిల్ పాయింట్ల వద్ద ఏర్పాటు చేసిన కేంద్రాల్లో ప్రజలకు సులభంగా బియ్యం అందేలా అధికారులు ఏర్పాట్లు చేశారు. అర్హులైన వినియోగదారులు ప్రత్యేక విక్రయ కేంద్రాలను వినియోగించుకోవాలని, బియ్యం విక్రయాల్లో నాణ్యత, తూకం, ధరల విషయంలో ఎలాంటి అవకతవకలకు తావులేకుండా అధికారులు పర్యవేక్షించాలని ప్రజలు కోరుతున్నారు. పండుగను పురస్కరించుకుని తక్కువ ధరకు బియ్యం అందుబాటులోకి తీసుకురావడం పట్ల వినియోగదారులు హర్షం వ్యక్తం చేస్తున్నారు.